Karnataka CM change | ముఖ్యమంత్రి మార్పు విషయంలో చర్చించేందుకు కర్ణాటక సీఎం సిద్ధరామయ్య, ఉప ముఖ్యమంత్రి డీకే శివకుమార్‌ మధ్య సమస్యకు తుది పరిష్కారం చూపేందుకు కాంగ్రెస్‌ అధిష్ఠానం సిద్ధమైంది. ఈ మేరకు శనివారం ఢిల్లీకి రావాల్సిందిగా ఇద్దరికీ పార్టీ అధినాయకత్వం సమాచారాలు పంపిందని తెలుస్తున్నది. ఈ నేపథ్యంలో ఒకరిపై ఒకరు ఆరోపణలు సంధించుకునేందుకు ఎవరికి వారు చిట్టాలు తయారు చేసుకున్నారన్న వార్తలు గుప్పుమంటున్నాయి.
శివకుమార్‌ శిబిరం చెబుతున్నట్టుగా పవర్‌ షేరింగ్‌ ఫార్ములా అంటూ ఏమీ లేదని సిద్దరామయ్య వర్గం వాదిస్తున్నది. 2023 మేలో కర్ణాటకలో ప్రభుత్వాన్ని ఏర్పాటు చేసిన సమయంలో దీన్ని చర్చించడం లేదా ఖరారు చేయడం వంటివి ఏమీ లేవని తేల్చి చెబుతున్నది. అయితే.. శివకుమార్‌ మాత్రం పవర్‌ షేరింగ్‌ ఫార్ములా అనేది కాంగ్రెస్‌ అధినాయకత్వంలో ఐదారుగురు వ్యక్తుల మధ్య రహస్యమని చెబుతున్నారు. గతంలో కాంగ్రెస్‌ ఆర్గనైజేషన్‌ సెక్రటరీ కేసీ వేణుగోపాల్‌ మీడియాతో మాట్లాడుతూ పవర్‌ షేరింగ్‌ అంశాన్ని చర్చించాం కానీ.. అది ప్రజలకు అధికారాన్ని పంచడం గురించేనని చెప్పిన విషయాన్ని సిద్ధరామయ్య వర్గం గుర్తు చేస్తున్నది.
మహాకుంభ్‌ మేళాను బీజేపీ తన రాజకీయ అవసరాలకు వినియోగిస్తున్నదని ఆరోపిస్తూ యావత్‌ కాంగ్రెస్‌ పార్టీ దానికి దూరంగా ఉన్నది. కానీ.. ఆ సమయంలో శివకుమార్‌ ప్రయాగ్‌రాజ్‌ వెళ్లి కుంభమేళాలో పాల్గొనడం ఆయనలోని కాషాయ భావనలకు సంకేతాలని అధిష్ఠానం వద్ద చెప్పేందుకు ప్రయత్నిస్తారని తెలుస్తున్నది. 2025 ఫిబ్రవరిలో ఈసీ ఫౌండేషన్‌ కార్యక్రమంలో కేంద్ర హోం మంత్రి అమిత్‌షాతో డీకే వేదిక పంచుకోవడాన్ని కూడా వారు ప్రస్తావిస్తున్నారు. అసెంబ్లీలో ఆరెస్సెస్‌ గీతాన్ని డీకే ఆలపించిన అంశాన్ని కూడా వారు లేవనెత్తుతున్నారు.
ఇక డీకే శివకుమార్‌ శిబిరం సైతం గట్టి అంశాలనే ప్రస్తావిస్తున్నది. పవర్‌ షేరింగ్‌ ఒప్పందాన్ని గౌరవిస్తూ సిద్దరామయ్య ముఖ్యమంత్రి పదవిని డీకేకు అప్పగించాలని పట్టుబడుతున్నది. నిజానికి సిద్దరామయ్య ఆది నుంచి కాంగ్రెస్‌లో ఉన్న వ్యక్తి కాదని, జనతా పరివార్‌ నుంచి వచ్చిన నాయకుడని గుర్తు చేస్తున్నది. అదే సమయంలో డీకే శివకుమార్‌ మొదటి నుంచీ కాంగ్రెస్‌ పార్టీలోనే ఉన్నారని, అటువంటి నాయకుడికి 2028 ఎన్నికలకు నాయకత్వం వహించే బాధ్యతను అప్పగించాలని డిమాండ్‌ చేస్తున్నారు. శివకుమార్‌ అన్నివేళలా పార్టీ అధినాయకత్వానికి విధేయుడిగా ఉన్నారని ఆయన వర్గం చెబుతున్నది.
2023 ఎన్నికలకు పార్టీని నడిపించేందుకు ఎవరూ ముందుకు రాని సమయంలో తాను బాధ్యత తీసుకుని పార్టీని విజయతీరాలకు చేర్చిన నాయకుడని వాడిస్తున్నది. నిజానికి సిద్దరామయ్య అనుచరవర్గంలో ఎక్కువ మంది పూర్వ జనతాదళ్‌కు చెందినవారేనని డీకే శిబిరం వాదిస్తున్నది. వాళ్లంతా 2006లో కాంగ్రెస్‌ను వీడి జనతాదళ్‌లో చేరారని, అక్కడి నుంచి మళ్లీ కాంగ్రెస్‌లోకి వచ్చారని గుర్తు చేస్తున్నారు. వచ్చిన తర్వాత నిజమైన కాంగ్రెస్‌ నాయకులకు, కార్యకర్తలకు గుర్తింపు ఇవ్వడానికి నిరాకరించారని అంటున్నారు. తన వాదనలకు మద్దతుగా మైసూర్‌ అర్బన్‌ డెవలప్‌ మెంట్‌ అథార్టీలో అవకతవకలను డీకే శివకుమార్‌ అధినాయకత్వం వద్ద ప్రస్తావిస్తారని ఆయన వర్గం అంటున్నది.
Read Also |
Deeksha Divas : ‘స్థానికం’ వేళ..మళ్లీ బీఆర్ఎస్ ‘సెంటిమెంట్’ రాగం!
Credit Score vs Credit Report : క్రెడిట్ స్కోర్, క్రెడిట్ రిపోర్ట్ కు మధ్య తేడా ఏంటి?
హైదరాబాద్‌కు కొత్త క్రికెట్‌ స్టేడియం అడియాసేనా? కొత్త సేడియాల్లో తెలంగాణకేదీ చోటు?
Andhrapradesh Vs Telangana : బనకచర్ల కాదు..నల్లమల సాగర్ లింక్ ప్రాజెక్టు