NHRC | స్లీపర్ కోచ్ బస్సులకు ఇక మంగళం!

ఇటీవల దేశంలోని పలు ప్రాంతాల్లో వరుసగా బస్సు ప్రమాదాలు జరుగుతున్న విషయం తెలిసిందే. దీంతో ప్రజలు తీవ్ర భయాందోళనకు గురవుతున్న ఈ నేపథ్యంలో ప్రైవేటు బస్సుల్లో భద్రతపై జాతీయ మానవ హక్కుల కమిషన్ (NHRC) రాష్ట్ర ప్రభుత్వాలకు కీలక సూచనలు చేసింది.

విధాత, హైదరాబాద్ :

ఇటీవల దేశంలోని పలు ప్రాంతాల్లో వరుసగా బస్సు ప్రమాదాలు జరుగుతున్న విషయం తెలిసిందే. దీంతో ప్రజలు తీవ్ర భయాందోళనకు గురవుతున్న ఈ నేపథ్యంలో ప్రైవేటు బస్సుల్లో భద్రతపై జాతీయ మానవ హక్కుల కమిషన్ (NHRC) రాష్ట్ర ప్రభుత్వాలకు కీలక సూచనలు చేసింది. నిబంధనలకు విరుద్ధంగా ఉన్న స్లీపర్‌ బస్సుల (Sleeper Coach Buses)ను పక్కన పెట్టేయాలని అన్ని రాష్ట్రాల ప్రధాన కార్యదర్శులకు(సీఎస్) మార్గదర్శకాలు జారీ చేసింది.

దూర ప్రాంతాలకు వెళ్లే ప్రైవేటు స్లీపర్‌ బస్సుల్లో ఇటీవల ఘోర ప్రమాదాలు సంభవించడంతో అనేకమంది ప్రాణాలు కోల్పోయారు. భద్రతా ప్రమాణాలు పాటించకపోవడం, తనిఖీలు చేపట్టకపోవడం, అత్యవసర ద్వారాలను మూసేసి, అగ్నిప్రమాదం జరిగితే నియంత్రించే పరికరాలు లేకుండా, ఇష్టానుసారం బస్సులను మార్పులు చేర్పులు (ఆల్ట్రేషన్‌) చేయించ నడపడం వంటి కారణాల వల్లే ఈ ప్రమాదాలు జరిగినట్లు నివేదికలు పేర్కొంటున్నాయి. కర్నూలు, యూపీ, సౌదీ బస్సు ప్రమాదాల నేపథ్యంలో ట్రావెల్స్‌ బస్సుల్లో ప్రయాణం ఎంతవరకు సురక్షితమనే అనుమానాలు నెలకొంటున్నాయి. నిబంధనలు ఉల్లంఘించి, ప్రయాణికుల ప్రాణాలను పణంగా పెడుతున్న ట్రావెల్స్‌ సంస్థలపై ప్రభుత్వ అధికారులు కఠిన చర్యలు తీసుకుంటున్నారు. ఈ నేపథ్యంలో పలువురు ఫిర్యాదు చేయడంతో మానవ హక్కుల కమిషన్‌ ((NHRC) అన్ని రాష్ట్ర ప్రభుత్వాలకు ఆదేశాలు జారీ చేసింది.

బస్సు ప్రమాదాలకు కారణాలు ఇవే : ప్రస్తుతం తిరుగుతున్న బస్సుల్లో 50 శాతం పైగా స్లీపర్‌ ఏసీ బస్సులే ఉంటున్నాయి. వీటి లోపల భాగం ఇరుగ్గా ఉండడం వల్ల అగ్ని ప్రమాదాలు, రోడ్డు ప్రమాదాలు జరిగినప్పుడు వెంటనే బయటకు వచ్చే అవకాశం చాల తక్కువగా ఉంటోంది. ప్రతి బస్సులోనూ అగ్ని ప్రమాదాలను నియంత్రించే రక్షణ వ్యవస్థ ఉండాలి కానీ, చాలా వాటిల్లో ఇలాంటివి ఉండటం లేదు. ట్రావెల్స్ సంస్థలు బస్సుల కండిషన్‌పై ఎప్పటికప్పుడు తనిఖీలు చేపట్టకపోవడం. ఎమర్జెన్సీ డోర్ ఉన్నచోట్ల కూడా సీట్లు ఏర్పాటు, అదనపు సీట్ల నిర్మాణంతో ప్రమాద సమయాల్లో ఇవి అంతగా ఉపయోగపడటం లేదు. స్లీపర్‌ బస్సుల అడుగు భాగంలో సరుకు నిల్వకు ఏర్పాట్లు ఉంటాయి. వీటిలో అగ్ని ప్రమాదాలు జరిగితే నేరుగా ప్రయాణికులపై ప్రభావం చూపెడుతున్నాయి.