Ravi Teja | టాలీవుడ్ మాస్ మహారాజా రవితేజ ప్రస్తుతం తన కెరీర్లో అత్యంత కీలక దశలో ఉన్నారు. వరుసగా విభిన్న కథలతో ప్రేక్షకులను ఆకట్టుకునేందుకు ప్రయత్నిస్తున్న ఆయన, ఇప్పుడు దర్శకుడు శివ నిర్వాణతో కలిసి ఇరుముడి అనే పవర్ఫుల్ ప్రాజెక్ట్లో నటిస్తున్నారు. ప్రముఖ నిర్మాణ సంస్థ మైత్రీ మూవీ మేకర్స్ ప్రతిష్టాత్మకంగా నిర్మిస్తున్న ఈ చిత్రంపై ఇప్పటికే భారీ అంచనాలు నెలకొన్నాయి. రవితేజ కెరీర్లో ఇది ఒక ప్రత్యేకమైన సినిమాగా నిలవబోతుందనే టాక్ ఇండస్ట్రీ వర్గాల్లో వినిపిస్తోంది. ఈ సినిమాలో రవితేజ సరసన నటి ప్రియా భవానీ శంకర్ హీరోయిన్గా నటిస్తుండగా, కథలో కీలక పాత్రలో బేబీ నక్షత్ర కనిపించనుంది. అయితే ఇప్పుడు ఈ సినిమాకు సంబంధించిన మరో ఆసక్తికరమైన అంశం బయటకు వచ్చి అభిమానుల్లో ఉత్సాహాన్ని పెంచుతోంది.
సరికొత్త గెటప్తో షాక్ ఇవ్వనున్న రవితేజ
ఫిల్మ్ నగర్ వర్గాల సమాచారం ప్రకారం ఇరుముడి సినిమాలో ఒక ప్రత్యేక ఎపిసోడ్ కోసం రవితేజ ఇప్పటివరకు చేయని సరికొత్త ప్రయోగానికి సిద్ధమైనట్లు తెలుస్తోంది. సినిమాలో ఆయన వయసు పైబడిన వ్యక్తి పాత్రలో, ఓల్డ్ ఏజ్ గెటప్లో కనిపించనున్నారనే వార్త వైరల్ అవుతోంది.
ఇప్పటికే విడుదలైన ఫస్ట్ లుక్ పోస్టర్లో నల్లని వస్త్రాలు ధరించి, నుదుటిపై విభూతితో అయ్యప్ప స్వామి భక్తుడి లుక్లో కనిపించిన రవితేజ అభిమానులను ఆకట్టుకున్నారు. ఇప్పుడు ఈ వృద్ధుడి పాత్ర గురించి వస్తున్న వార్తలతో సినిమాపై ఆసక్తి మరింత పెరిగింది.
యాక్షన్తో పాటు ఎమోషనల్ బాండింగ్
శివ నిర్వాణ సినిమాలు అంటే బలమైన భావోద్వేగాలకు ప్రత్యేక గుర్తింపు ఉంటుంది. ఇరుముడి కూడా అదే తరహాలో కేవలం యాక్షన్ కథగా కాకుండా, తండ్రి-కూతుళ్ల మధ్య ఉండే ఎమోషనల్ రిలేషన్ చుట్టూ తిరుగుతుందని సమాచారం.
రవితేజ భార్య పాత్రలో ప్రియా భవానీ శంకర్ కనిపించనుండగా, కూతురు పాత్రలో బేబీ నక్షత్ర నటిస్తోంది. కుటుంబ భావోద్వేగాలతో పాటు మాస్ ఎలిమెంట్స్ కూడా ఈ చిత్రంలో సమపాళ్లలో ఉండనున్నాయని తెలుస్తోంది.
సూపర్ హిట్ భక్తి పాట రీమేక్?
ఈ సినిమాకు సంబంధించిన మరో ఆసక్తికర అంశం కూడా ఇప్పుడు చర్చనీయాంశమవుతోంది. గతంలో మంచి ప్రజాదరణ పొందిన భక్తి గీతం “విల్లాలి వీరుడు ఎక్కినాడు పల్లకి…” పాటను ఈ చిత్రంలో కొత్తగా రీక్రియేట్ చేస్తున్నారనే వార్త వినిపిస్తోంది.
సంగీత దర్శకుడు జీవీ ప్రకాశ్ కుమార్ ఈ చిత్రానికి సంగీతం అందిస్తున్నారు. ఈ పాట సినిమాలో కీలక సందర్భంలో రావచ్చని, అది అభిమానులకు ప్రత్యేక అనుభూతిని ఇవ్వొచ్చని ఇండస్ట్రీ వర్గాలు చెబుతున్నాయి.
నిర్మాతల కోసం రెమ్యునరేషన్ తగ్గించిన రవితేజ?
ప్రస్తుతం సోషల్ మీడియాలో మరో అంశం హాట్ టాపిక్గా మారింది. సాధారణంగా హీరోలు విజయాల తర్వాత రెమ్యునరేషన్ పెంచుతుంటారు. కానీ రవితేజ మాత్రం నిర్మాతలపై భారం పడకూడదనే ఉద్దేశంతో తన పారితోషికాన్ని తగ్గించుకున్నారనే వార్త ప్రచారంలో ఉంది.
గతంలో ఒక్కో సినిమాకు సుమారు రూ.25 కోట్ల వరకు తీసుకున్న మాస్ మహారాజా, ఇరుముడి కోసం దాదాపు రూ.15 కోట్లకు తగ్గించుకున్నట్లు టాలీవుడ్ వర్గాల్లో టాక్ వినిపిస్తోంది. తన మార్కెట్ తిరిగి బలపడే వరకు నిర్మాతలకు భరోసా ఇవ్వాలనే ఆలోచనతోనే ఈ నిర్ణయం తీసుకున్నారంటున్నారు.
షూటింగ్ చివరి దశలో ‘ఇరుముడి’
ప్రస్తుతం ఇరుముడి సినిమా షూటింగ్ తుదిదశకు చేరుకున్నట్లు తెలుస్తోంది. దాదాపు ఒక నెల రోజుల చిత్రీకరణ మాత్రమే మిగిలి ఉందని సమాచారం. త్వరలోనే సినిమా గ్లింప్స్ విడుదల చేయడానికి మేకర్స్ ప్లాన్ చేస్తున్నారట. ఈ ఏడాది చివర్లో సినిమాను ప్రేక్షకుల ముందుకు తీసుకురావాలనే లక్ష్యంతో చిత్రబృందం పనిచేస్తోంది. రవితేజ రెగ్యులర్ మాస్ ఫార్ములాకు భిన్నంగా, ఎమోషన్తో కూడిన ఇంటెన్స్ కథలో కనిపించనున్న ఈ చిత్రం బాక్సాఫీస్ వద్ద ఎలాంటి మ్యాజిక్ చేస్తుందో చూడాలి.