టీమిండియా జట్టులో ఆరున్నర​ అడుగుల స్పీడ్​ బుల్లెట్ : ఎవరీ గుర్​నూర్​ బ్రార్​?

Who Is Gurnoor Brar: 6’5 Punjab Pacer Earns India Call-Up For Afghanistan Series

విధాత స్పోర్ట్స్ డెస్క్ | మే 19, 2026:

ముంబయి: అఫ్గానిస్థాన్‌తో జరగనున్న ఏకైక టెస్ట్‌, మూడు వన్డేల సిరీస్‌కు భారత జట్లను బీసీసీఐ ప్రకటించగా.. అందులో ఒక పేరు క్రికెట్ అభిమానుల దృష్టిని ప్రత్యేకంగా ఆకర్షించింది. ఆ పేరు గుర్​నూర్​ బ్రార్ . పంజాబ్‌కు చెందిన ఈ 6.5 అడుగుల పొడవైన ఫాస్ట్ బౌలర్‌కు తొలిసారి భారత జట్టులో చోటు దక్కింది. బుమ్రా, రవీంద్ర జడేజాకు విశ్రాంతి ఇవ్వడం, యువ ఆటగాళ్లకు అవకాశాలు కల్పించే దిశగా సెలెక్టర్లు అడుగులు వేయడంతో బ్రార్ పేరు వెలుగులోకి వచ్చింది. భారత్-అఫ్గానిస్థాన్ ఏకైక టెస్ట్ జూన్ 6 నుంచి న్యూ చండీగఢ్‌లో జరగనుంది. వన్డే సిరీస్ జూన్ 14, 17, 20 తేదీల్లో నిర్వహించనున్నారు.

దేశవాళీ క్రికెట్‌లో నిలకడే ఎంపికకు కారణం

గుర్​నూర్ బ్రార్ ప్రస్తుతం ఐపీఎల్‌లో గుజరాత్ టైటాన్స్ జట్టులో ఉన్నాడు. అయితే ఈ సీజన్‌లో అతనికి ఇంకా ఆడే అవకాశం రాలేదు. అయినప్పటికీ దేశవాళీ క్రికెట్‌లో చూపిన నిలకడైన ప్రదర్శనలే అతన్ని జాతీయ జట్టుకు ఎంపిక  చేశాయి. పంజాబ్ తరఫున రెడ్‌బాల్ క్రికెట్‌లో అతని పేస్‌, బౌన్స్‌, క్రమశిక్షణతో కూడిన లైన్ అండ్ లెంగ్త్ సెలెక్టర్లను ఆకట్టుకున్నాయి.

 

2024-25 సీజన్‌లో గుర్​నూర్ బ్రార్ తన ప్రతిభను బలంగా నిరూపించుకున్నాడు. రంజీ ట్రోఫీలో 12 మ్యాచ్‌ల్లో 33 వికెట్లు సాధించి, 3.43 ఎకానమీతో ఆకట్టుకున్నాడు. బీహార్‌పై 14 పరుగులకే 5 వికెట్లు తీసిన స్పెల్ అతని సామర్థ్యాన్ని ప్రస్ఫుటంగా ప్రదర్శించింది.

అతని ఎత్తు వల్ల పిచ్‌పై సహజంగానే బౌన్స్ లభిస్తుంది. భారత పిచ్‌లపై కూడా బ్యాటర్లను వెనుకంజ వేయించగలిగే ప్రతిభ అతనిలో ఉందని సెలెక్టర్లు భావిస్తున్నారు. బుమ్రాకు విశ్రాంతి ఇవ్వడంతో మహ్మద్ సిరాజ్ పేస్ దళానికి నాయకత్వం వహించనుండగా, ప్రసిద్ధ్ కృష్ణతో పాటు గుర్​నూర్ బ్రార్‌కు అవకాశం లభించడం టీమిండియా భవిష్యత్ పేస్ బౌలింగ్​ దళంపై సెలక్టర్లకు ఉన్న దూరదృష్టిని చూపిస్తోంది.

శుభ్‌మన్ గిల్‌తో పాత అనుబంధం.. ఐపీఎల్ నుంచి టీమిండియా వరకు

గుర్​నూర్ ​కెరీర్‌లో మరో ఆసక్తికరమైన విషయం, అతనికి శుభ్‌మన్ గిల్‌తో ఉన్న పాత అనుబంధం. అండర్-19 రోజుల నుంచే గిల్‌కు బౌలింగ్ చేశానని బ్రార్ గతంలో చెప్పాడు. కటోచ్ షీల్డ్ మ్యాచ్‌ల సమయంలో తన బౌలింగ్‌ను చూసిన గిల్.. జిల్లా జట్టులోకి రావడానికి సాయం చేశాడని బ్రార్ వెల్లడించాడు. అతని బౌలింగ్​ వైవిధ్యం అక్కడి నుంచి మొహాలీ జట్టు, ఆ తర్వాత పంజాబ్ అండర్-23 జట్టుకు ప్రాతినిధ్యం వహించేలా చేసింది.

ఐపీఎల్ ప్రయాణం కూడా బ్రార్ ఎదుగుదలలో కీలక భాగమే. 2019లో ముంబై ఇండియన్స్‌కు నెట్ బౌలర్‌గా ఉన్న అతను, 2023లో పంజాబ్ కింగ్స్ తరఫున ఐపీఎల్ అరంగేట్రం చేశాడు. తర్వాత దేశవాళీ క్రికెట్‌లో నిలకడగా రాణించడంతో 2025 ఐపీఎల్ వేలంలో గుజరాత్ టైటాన్స్ అతన్ని రూ.1.3 కోట్లకు కొనుగోలు చేసింది. ప్రస్తుతం అతనికి అంతర్జాతీయ వేదికపై తనను తాను నిరూపించుకునే అవకాశం దక్కింది.

గుర్​నూర్​ బ్రార్ ఎంపికను కేవలం ఒక కొత్త పేసర్‌కు వచ్చిన అవకాశంగా మాత్రమే చూడలేం. టీమిండియా తన భవిష్యత్తు పేస్ దళాన్ని విస్తరించుకునే ప్రయత్నంలో భాగంగా ఇది కీలక నిర్ణయం. ఎత్తు, బౌన్స్‌, మంచి లెంగ్త్‌తో బౌలింగ్ చేసే సామర్థ్యం ఉన్న బ్రార్ అఫ్గానిస్థాన్ సిరీస్‌లో తుది జట్టులో చోటు దక్కించుకుంటే.. భారత క్రికెట్‌కు మరో ఆసక్తికరమైన ఫాస్ట్ బౌలింగ్ ఆప్షన్‌గా మారే అవకాశం ఉంది.