Richard Mille RM 27-04 | హార్దిక్ పాండ్యా చేతికి రూ.20 కోట్లు విలువైన రిచర్డ్ మిల్లే RM 27-04 వాచ్‌

ఆసియా కప్​ వేదిక దుబాయ్ ప్రాక్టీస్‌లో హార్దిక్ పాండ్యా చేతికి ₹20 కోట్లు విలువైన రిచర్డ్ మిల్లే RM 27-04 వాచీతో ఆకట్టుకున్నాడు. రఫెల్ నడాల్ కోసం డిజైన్ చేసిన ఈ అరుదయిన మోడల్ 50 పీసెస్ మాత్రమే తయారుచేసారు.

Richard Mille RM 27-04 | దుబాయ్‌లో ఆసియా కప్‌కు ముందు టీమ్‌ ఇండియా ప్రాక్టీస్ సెషన్‌లో హార్దిక్ పాండ్యా మరోసారి వార్తల్లోకెక్కాడు. అతడి చేతిపై మెరిసిన రిచర్డ్ మిల్లే RM 27-04 వాచ్​ విలువ సుమారు ₹20 కోట్లు. టెన్నిస్ దిగ్గజం రఫెల్ నడాల్ కోసం ప్రత్యేకంగా రూపొందించిన ఈ మోడల్ ప్రపంచవ్యాప్తంగా కేవలం 50 పీసెస్ మాత్రమే తయారవ్వడంతో అభిమానుల్లో అరుదైన స్థానం సంపాదించుకుంది. తక్కువ బరువు, అత్యధిక ఇంపాక్ట్‌ రెసిస్టెన్స్‌ వంటి ఇంజనీరింగ్‌ లక్షణాల వల్లే దీని ధర ఆకాశాన్నంటినట్లు వాచ్‌ ప్రేమికులు చెబుతున్నారు. ఈ అరుదైన వాచీతో పాండ్యా ప్రాక్టీస్‌కు హాజరైన దృశ్యాలు సోషల్‌ మీడియాలో చర్చకు దారి తీస్తుండగా, “స్టైల్‌ సెట్ అయ్యింది; ఇప్పుడు ఫీల్డ్‌లో పనితీరు కూడా అదే రేంజ్‌లో ఉండాలి” అనే కామెంట్లు అధికంగా కనిపించాయి.

ఏంటీ రిచర్డ్ మిల్లే RM 27-04 వాచ్‌ ? ఎందుకు అంత ఖరీదు?

• మొదటగా రఫెల్ నడాల్ కోసం డిజైన్ చేసిన ప్రత్యేక లిమిటెడ్ ఎడిషన్.
• తక్కువ బరువు (~30 గ్రా.) అయినా, 12,000 G-ఫోర్సెస్ వరకు తట్టుకునేలా నిర్మాణం.
• కేవలం 50 వాచీలు మాత్రమే తయారు చేయడంతో కొనేవారిలో అరుదైనదిగా డిమాండ్.
• హై-ఎండ్ మెకానికల్ ఇంజనీరింగ్, ఎగ్జాటిక్ మెటీరియల్స్ వాడకం—ఇవే ధరకు ప్రధాన కారణాలు.

గతంలోనూ విలాసవంతమైన వాచీలతో హార్దిక్‌ వార్తల్లో నిలిచాడు. ఈ ఏడాది ప్రారంభంలో RM 27-02 ధరించి గ్రౌండ్‌లో కనిపించిన ఫోటోలు అభిమానుల్లో హాట్‌ టాపిక్‌ అయ్యాయి. ఇప్పుడు RM 27-04తో మళ్లీ స్పాట్‌లైట్‌లోకి వచ్చాడు. పాండ్యా తాజాగా “Back to Business” అంటూ షేర్‌ చేసిన ఫోటోలు హల్‌చల్‌ రేపాయి. కొత్త హెయిర్‌ లుక్‌తో పాటు అరుదైన వాచీ పైన అభిమానం చూపించినా, అసలు పరీక్ష మాత్రం గ్రౌండ్‌లోనే ఉండనుంది. వాచ్‌ విలువతో పోలిస్తే ఆసియా కప్‌ విజేతల బహుమతి తక్కువని సోషల్‌ మీడియాలో సరదా పోలికలు వెల్లువెత్తినప్పటికీ, టోర్నమెంట్‌ ప్రైజ్ మనీపై అధికారిక ధృవీకరణ ఇంకా లేదు.

ఆసియాకప్​ పోటీలకు టీమిండియా సిద్ధం

కాగా,  సూర్యకుమార్‌ యాదవ్‌ నాయకత్వంలోని భారత జట్టు ఆసియా కప్​ షెడ్యూల్‌ సిద్ధమైంది. భారత్ సెప్టెంబర్‌ 10న దుబాయ్‌ అంతర్జాతీయ క్రికెట్‌ స్టేడియంలో ఆతిథ్య యుఎఈతో తొలి మ్యాచ్‌ ఆడుతుంది. ఎంతో ఆసక్తికరంగా మారబోతున్న భారత్–పాకిస్తాన్‌ పోరు సెప్టెంబర్‌ 14న అదే వేదికపై జరగనుంది. గ్రూప్‌ దశను భారత్‌ ఒమాన్‌తో అబుదాబిలోని షేక్‌ జాయెద్‌ స్టేడియంలో ముగించనుంది. సమీప భవిష్యత్తులో వరల్డ్‌ కప్‌ ఉన్న నేపథ్యంతో ఈ ఎడిషన్‌ T20 ఫార్మాట్‌లోనే జరుగుతోంది ఎనిమిది టైటిళ్లతో ఆసియా కప్‌ చరిత్రలో అతిపెద్ద విజయాల సంఖ్య భారత్‌కే ఉండడం మరో ప్రత్యేకత.

అయితే జట్టు వర్గాలు మాత్రం దృష్టి అంతా బలమైన ఆల్‌రౌండ్‌ కూర్పు, మిడిల్​ఆర్డర్​ బాధ్యతలు, డెత్‌ ఓవర్లలో బౌలింగ్‌పై ఉందని చెబుతున్నాయి. ఆసియా కప్‌ కోసం ఇప్పటికే భారీగా అభిమానులు దుబాయ్‌ చేరుతుండగా, భారత జట్టు సన్నాహక మ్యాచ్‌ల్లో బౌలర్ల వర్క్‌ లోడ్‌, బ్యాటింగ్‌ ఆర్డర్‌ స్థిరీకరణపై కోచింగ్‌ సిబ్బంది వ్యూహాత్మకంగా కసరత్తు చేస్తోంది.

ప్రారంభ మ్యాచ్‌ నుంచే బౌలింగ్‌–బ్యాటింగ్‌ రెండింట్లోనూ ప్రభావం చూపించాలనే అంచనాలు  పెరుగుతున్నాయి. దుబాయ్‌లో ప్రారంభమయ్యే ఈ ఆసియా ఖండ టోర్నీలో భారత్‌ టైటిల్‌ నిలబెట్టుకునే పోరాటాన్ని ఎలా ఆరంభిస్తుందో చూడాల్సి ఉంది.