IND vs NZ 3rd ODI | భారత్​లో తొలి సిరీస్​ గెలిచిన కివీస్​ : ఆదుకోలేకపోయిన విరాట్​ సెంచరీ​

ఇండోర్‌లో జరిగిన నిర్ణాయక 3వ వన్డేలో న్యూజీలాండ్ 40 పరుగుల తేడాతో భారత్‌పై విజయం సాధించింది. డారెల్ మిచెల్–గ్లెన్ ఫిలిప్స్ శతకాలతో 337 పరుగుల భారీ స్కోరు చేసిన కివీస్, సిరీస్‌ను 2–1తో చేజిక్కించుకుంది. విరాట్ కోహ్లీ శతకం, నితీశ్​, హర్షిత్ రాణాల హాఫ్ సెంచరీలు వృథా కాగా, భారత్ 296 పరుగులకు ఆలౌట్ అయింది. ఇది న్యూజీలాండ్‌కు భారత్​లో తొలి వన్డే సిరీస్ విజయం.

IND vs NZ 3rd ODI: Virat Kohli’s century in vain as New Zealand seal historic series win in India

విధాత క్రీడా విభాగం | 18 జనవరి 2026 | హైదరాబాద్​:

IND vs NZ 3rd ODI | భారత్​, న్యూజీలాండ్​ల మధ్య జరిగిన సిరీస్​ నిర్ణాయక 3వ వన్డేలో భారత్​ పరాజయం పాలైంది. తొలుత బ్యాటింగ్​ చేసిన కివీస్​ 338 పరుగుల భారీ లక్ష్యాన్ని విధించింది. ఛేదనలో విఫలమైన భారత్​ 40 పరుగుల తేడాతో ఓడిపోయింది. దీంతో సిరీస్​ 2 – 1 తేడాతో న్యూజీలాండ్​ చేజిక్కించుకుంది. భారత్​లో వారికేదే తొలి సిరీస్​ విజయం కాగా, ఇండోర్​లో భారత్​కిదే తొలి ఓటమి. ఛేజ్​మాస్టర్​ విరాట్​ కోహ్లీ సెంచరీ, హర్షిత్​ రాణా మెరుపు అర్థసెంచరీలు వృథా అయ్యాయి.

బ్యాట్లు వదిలేసిన భారత వీరులు

338 పరుగుల భారీ లక్ష్యంతో బరిలోకి దిగిన భారత్​ ఆరంభంలో ఏమాత్రం పోటీనివ్వకుండా వికెట్లు కోల్పోయింది. బ్యాటింగ్​కు స్వర్గధామమైన ఇండోర్​ పిచ్​పై రోహిత్​శర్మ(11), కెప్టెన్​ శుభమన్​ గిల్​(23), శ్రేయస్​ అయ్యర్​(3), కేఎల్​ రాహుల్​(1) త్వరగానే అవుట్​ కాగా, కోహ్లీ ఒక్కడే ఒంటరి పోరాటం చేసాడు. 71 పరుగులకే 4 కీలక వికెట్లు కోల్పోయి, దిక్కుతోచని స్థితిలో పడ్డ భారత్​ను నితీశ్​కుమార్​ రెడ్డి తన తొలి అర్థసెంచరీతో ఆదుకున్నాడు. నితీశ్​ (53)అవుటైన కాసేపటికే జడేజా(12) కూడా పెవిలియన్​ దారిపట్టడంతో, మళ్లీ కోహ్లీ ఒంటరివాడయ్యాడు. ఇక్కడే ఒక విచిత్రం జరిగింది. 8వ వికెట్​గా క్రీజ్​లోకి వచ్చిన హర్షిత్​ రాణా ఊహించనివిధంగా రాణించాడు. కివీస్​ బౌలర్లను ఊచకోత కోస్తూ, గెలుపుపై మళ్లీ ఆశలు రేకెత్తించాడు. ఫోర్లు, సిక్స్​లతో బౌలర్లను దడదడలాడించిన రాణా అదే ఊపులో తన తొలి హాఫ్​ సెంచరీ కూడా చేసి, కివీస్​ ఆటగాళ్ల మొహాల్లో ఓటమి చూపించాడు. ఈలోపు తన 54వ వన్డే శతకం పూర్తి చేసుకున్న కోహ్లీ కూడా భారీ షాట్లకు దిగడంతో కావాల్సిన రన్​రేట్ మెల్లగా అదుపులోకి వస్తున్నట్లనిపించింది. కానీ, దురదృష్టవశాత్తు భారీ షాట్​ కొట్టబోయి, రాణా(52) అవుటవడంతో భారత్​ ఇక ఆశలు వదిలేసుకుంది. ఒక పక్క కోహ్లీ ఉన్నా, మరోపక్క వికెట్లు లేకపోవడంతో, ఓటమి తప్పలేదు. చివరికి 46 ఓవర్లలో 296 పరుగులకు ఇండియా అలౌట్​ అయింది. కోహ్లీ 124 పరుగులు చేసాడు.

న్యూజీలాండ్​ బౌలర్లలో జాక్ ఫౌక్స్​, క్రిస్టియన్​ క్లార్క్​ చెరో 3 వికెట్లు తీసుకోగా, జేడెన్​ లెనాక్స్​ 2 వికెట్లు తన ఖాతాలో వేసుకున్నాడు.

అంతకుముందు టాస్ గెలిచిన భారత కెప్టెన్ శుభ్​మన్ గిల్ న్యూజీలాండ్​ను బ్యాటింగ్​కు ఆహ్వానించాడు. తన నిర్ణయం నిరూపిస్తూ, కివీస్​ 5 పరుగులకే ఇద్దరు ఓపెనర్లను కోల్పోయింది. మొదటి ఓవర్లోనే నికోల్స్​ వికెట్లను సున్నాకే గిరాటేయగా, రెండో ఓవర్లో మరో ఓపెనర్​ డియాన్​ కాన్వే హర్షిత్​రాణా బౌలింగ్​లో స్లిప్​లో రోహిత్​కు క్యాచ్​ ఇచ్చి వెనుదిరిగాడు. ఈ ఇద్దరి స్థానాలను ఆక్రమించిన డెరెల్​ మిచెల్​, విల్​ యంగ్​ కాసేపు నెమ్మదిగా ఆడి కుదురుకున్నారు. జట్టు స్కోరు 58 పరుగుల వద్ద యంగ్​ను హర్షిత్​ పెవిలియన్​కు పంపగా, వచ్చిన గ్లెన్​ ఫిలిప్స్​ మిచెల్​తో జతకలిసాడు.

ఇక అక్కన్నుంచి భారత్​కు ఏదీ కలిసిరాలేదు. గత రెండు మ్యాచ్​లలో వరుసగా 84, 131 పరుగులు చేసి మంచి ఊపు మీదున్న మిచెల్​ ఈ మ్యాచ్​లోనూ అస్సలు తగ్గలేదు. భారత్​తో ఆడిన గత 7 మ్యాచ్​లలో నాలుగు సెంచరీలు, 2 హాఫ్​ సెంచరీలు చేసిన మిచెల్​ ఈ మ్యాచ్​లోనూ అదరగొట్టాడు. హోల్కర్ స్టేడియంలోని పూర్తిగా బ్యాటింగ్‌కు అనుకూలమైన పిచ్‌పై కివీస్ బ్యాటర్లు ఆధిపత్యం చెలాయించారు. డారిల్ మిచెల్ (137), గ్లెన్ ఫిలిప్స్ (106) అద్భుత శతకాలతో చెలరేగడంతో 337/8తో భారీ స్కోరు నమోదు చేసింది.

న్యూజీలాండ్ భారీ స్కోరు; మిచెల్–ఫిలిప్స్ శతకాల హోరు

ముఖ్యంగా డారెల్​ మిచెల్​కు భారత్​ స్వర్గధామంగా మారింది. తను చేసిన రెండు శతకాలు భారత్​పైనే కావడం విశేషం. మరో వైపు గ్లెన్ ఫిలిప్స్ కూడా నెమ్మదిగా మొదలుపెట్టి తరువాత వేగంగా పెంచాడు. ఈ క్రమంతో తన రెండో వన్డే శతకాన్ని సాధించిన ఫిలిప్స్​, . తొలి బౌండరీ కోసం 37 బంతులు తీసుకున్నప్పటికీ, క్రీజులో స్థిరపడిన క్షణం నుంచి దూకుడుగా ఆడి భారత బౌలర్లపై ఒత్తిడి పెంచాడు. మిచెల్–ఫిలిప్స్ జోడీ 219 పరుగుల భారీ భాగస్వామ్యంతో న్యూజీలాండ్‌ను కష్టస్థితి నుంచి  పటిష్టస్థితికి చేర్చారు. నాలుగో వికెట్​కు ఇదే కివీస్​కు  అత్యుత్తమ వన్డే భాగస్వామ్యం.

చివరి దశలో భారత్ వికెట్లు సాధించినా, అప్పటికే జరగాల్సిన నష్టం జరిగిపోయింది. అర్షదీప్ సింగ్ 3 వికెట్లు, హర్షిత్ రాణా 3 వికెట్లు తీసుకున్నప్పటికీ ఉపయోగం లేకుండాపోయిది. స్పిన్నర్లకు పెద్దగా సహకారం దక్కకపోవడంతో కివీస్​ దూకుడును ఆపడంలో విఫలమయ్యారు. చివరికి నిర్ణీత 50 ఓవర్లలో న్యూజీలాండ్​ 8 వికెట్ల నష్టానికి 337 పరుగులు చేసింది. ఇది ఇండోర్ స్టేడియంలోనే అత్యధిక స్కోరు.

సంక్షిప్త స్కోర్లు:

న్యూజీలాండ్​: 8 వికెట్లకు 337 పరుగులు – డారెల్​ మిచెల్​ 137 పరుగులు(131  బంతులు, 3 సిక్స్​లు, 15 ఫోర్లు), గ్లెన్​ ఫిలిప్స్​ 106 పరుగులు(88 బంతులు, 3 సిక్స్​లు, 9 ఫోర్లు) – ఇండియా బౌలింగ్​ : అర్షదీప్​సింగ్​ 3 వికెట్లు, హర్షిత్​ రాణా 3 వికెట్లు

భారత్​: 46 ఓవర్లలో 296 పరుగులు – విరాట్​ కోహ్లీ 124 పరుగులు(108 బంతులు, 3 సిక్స్​లు, 10 ఫోర్లు), నితీశ్​కుమార్​ రెడ్డి 53 పరుగులు(57 బంతులు, 2 సిక్స్​లు, 2 ఫోర్లు), హర్షిత్​ రాణా 52 పరుగులు(43 బంతులు, 4 సిక్స్​లు, 4 ఫోర్లు) – న్యూజీలాండ్​ బౌలింగ్​: జాక్ ఫౌక్స్​ 3 వికెట్లు, క్రిస్టియన్​ క్లార్క్ 3 వికెట్లు.

ప్లేయర్​ ఆఫ్​ ది మ్యాచ్​: డారెల్​ మిచెల్​ – 137 పరుగులు

ప్లేయర్​ ఆఫ్​ ది సిరీస్: డారెల్​ మిచెల్​ – 352 పరుగులు