Rohit praises Nitish | అన్ని ఫార్మాట్లలో గొప్ప ఆటగాడవుతాడు – నితీశ్‌ రెడ్డిపై రోహిత్‌ శర్మ విశ్వాసం

పెర్త్​లో జరిగిన తొలి వన్డేలో నితీశ్‌ రెడ్డి వన్డే క్యాప్‌ అందుకున్న వేళ రోహిత్‌ శర్మ చేసిన వ్యాఖ్యలు వైరల్‌. “నువ్వు అన్ని ఫార్మాట్లలో గొప్ప ఆటగాడవుతావు” అంటూ యువ ఆటగాడిపై విశ్వాసం వ్యక్తం చేసిన టీమిండియా కెప్టెన్‌.

Rohit Sharma’s Big Praise for Nitish Kumar Reddy | Predicts Him To Be an All-Format Great

(విధాత స్పోర్ట్స్ డెస్క్‌)

Rohit praises Nitish | భారత క్రికెట్‌లో మరో కొత్త నక్షత్రం ఉదయిస్తోంది. ఆ పేరు నితీశ్‌ కుమార్‌ రెడ్డి. కేవలం 21 ఏళ్ల వయస్సులోనే ఈ తెలుగు కుర్రాడు  టెస్ట్‌(క్యాప్​ నెం.315), టి20(క్యాప్​ నెం.116) రెండు ఫార్మాట్లలోనూ భారత జెర్సీని ధరించాడు. నిన్న పెర్త్​ ఆప్టస్‌ స్టేడియంలో తొలి వన్డే క్యాప్‌ (క్యాప్​ నెం. 260) అందుకున్న నితీశ్‌ ముఖంలో ఆత్మవిశ్వాసం, కన్నీటి మెరుపు, సంతోషం అన్నీ కలగలిసి వెలిగిపోయింది. అయితే ఆ క్షణాన్ని మరింత ప్రత్యేకంగా మార్చింది భారత కెప్టెన్‌ రోహిత్‌ శర్మ చెప్పిన మాటలే.

• పెర్త్​లో వన్డే అరంగేట్రం చేసిన యువ అల్‌రౌండర్‌ నితీశ్‌కు రోహిత్‌ ప్రత్యేక ప్రశంసలు
• “నీ వైఖరే నీ భవిష్యత్తును నిర్ణయిస్తుంది” – టీమిండియా కెప్టెన్‌ రోహిత్‌ భావోద్వేగ సందేశం

వన్డే క్యాప్‌ అందజేస్తున్న సమయంలో రోహిత్‌ తన మనసులోని మాటలను బహిరంగంగా చెప్పాడు. “నితీశ్‌, నీ యాటిట్యూడ్‌ నాకు నచ్చింది. ఆటను ఎలా ఆడాలో, టీమ్‌ కోసం ఎలా నిలబడాలో నీకు తెలుసు. నేను 110 శాతం నమ్ముతున్నాను — నువ్వు అన్ని ఫార్మాట్లలో గొప్ప ఆటగాడవుతావు. టీమిండియాలో నీకు సుదీర్ఘ భవిష్యత్తు ఉంది. మేమంతా నీ వెంటే ఉంటాం,” అంటూ రోహిత్‌ ప్రేమగా, నమ్మకంగా చెప్పారు.

ఆయన చెప్పిన ఈ మాటలు కేవలం ఒక యువ ఆటగాడికి ప్రోత్సాహం మాత్రమే కాదు — ఒక కెప్టెన్‌ తన భవిష్యత్తు వారసుడిపై ఉంచిన విశ్వాసానికి ప్రతీక. రోహిత్‌ మాట్లాడిన తర్వాత టీమ్‌లోని ప్రతి ఆటగాడు కూడా చప్పట్లు కొడుతూ నితీశ్‌కి మద్దతు తెలిపారు. ఆ క్షణం వీడియోగా బీసీసీఐ షేర్‌ చేయగానే, అది సోషల్‌ మీడియాలో క్షణాల్లో వైరల్‌ అయింది.

From 𝐏𝐞𝐫𝐭𝐡 𝐭𝐨 𝐏𝐞𝐫𝐭𝐡 📍

A dream gets renewed and fulfilled. ✨

It was here in 2024 that Nitish Kumar Reddy earned his Test cap. It was @imVkohli then who presented it and this time it is @ImRo45, who handed the ODI cap. 🧢#AUSvIND | #TeamIndia | @NKReddy07

— BCCI (@BCCI) October 20, 2025

నితీశ్‌ రెడ్డి – మరో విజయవంతమైన తెలుగు అల్‌రౌండర్‌

విశాఖపట్నం, ఆంధ్రప్రదేశ్‌లో జన్మించిన నితీశ్‌ రెడ్డి దేశీయ క్రికెట్‌లో అద్భుతమైన ప్రదర్శనలతో గుర్తింపు తెచ్చుకున్నాడు. బ్యాటింగ్‌లో సిక్సర్ల వర్షం కురిపించే సామర్థ్యం ఉండగా, బౌలింగ్‌లో కూడా వేగంతో పాటు క్రమశిక్షణ కనిపిస్తుంది. గత ఏడాది బోర్డర్‌–గావస్కర్‌ సిరీస్‌లో ఆస్ట్రేలియాలో టెస్ట్‌ అరంగేట్రం చేసి అందరి దృష్టిని ఆకర్షించాడు. ఆ మ్యాచ్‌లో భారత్‌ గెలిచిన తర్వాత నితీశ్‌ భవిష్యత్తుపై విరాట్‌ కోహ్లీ మాటలు కూడా చాలా పాజిటివ్‌గా నిలిచాయి. నితీశ్​ మూడు ఫార్మాట్లలో ఆడిన ఒకే ఒక తెలుగు ఆటగాడిగా నిలిచాడు.

11 నెలల తర్వాత అదే ఆస్ట్రేలియా నేలపై మళ్లీ వన్డే ఫార్మాట్‌లో రంగప్రవేశం చేయడం అతని కెరీర్‌లో మరో మైలురాయి అయింది. 2024 నవంబరులో టెస్ట్‌ క్యాప్‌ను కోహ్లీ చేతుల మీదుగా పొందిన నితీశ్‌, ఇప్పుడు వన్డే క్యాప్‌ను రోహిత్‌ చేతుల మీదుగా స్వీకరించడం అతని ప్రస్థానంలో భావోద్వేగ క్షణంగా నిలిచింది.

పెర్త్ వేదికపై సాహసోపేతమైన అరంగేట్రం

ఆస్ట్రేలియాతో జరిగిన తొలి వన్డేలో వర్షం ఆటంకం కలిగించినా, నితీశ్‌ తన ప్రతిభను చాటాడు. కేవలం 11 బంతుల్లో రెండు భారీ సిక్సులు కొడుతూ తన పవర్‌ హిట్టింగ్‌ శక్తిని చూపించాడు. చివర్లో అవుట్‌ కాకుండా 19 పరుగులు చేసి నిలిచాడు. భారత్‌ 136/9 స్కోరుతో ముగించగా, డీఎల్‌ఎస్‌ పద్ధతిలో ఆస్ట్రేలియా 7 వికెట్ల తేడాతో గెలిచింది. అయినప్పటికీ నితీశ్‌ ఆటతీరు అందరి దృష్టిని ఆకర్షించింది.

రోహిత్‌ శర్మ ప్రసంగంలోని ఒక ముఖ్యమైన అంశం — “నువ్వు అన్ని ఫార్మాట్లలో గొప్ప ఆటగాడవుతావు” అన్న మాట. ఈ వ్యాఖ్య నితీశ్‌పై ఉన్న విశ్వాసం మాత్రమే కాకుండా, భారత జట్టు భవిష్యత్తుపై ఉన్న ఆశలను కూడా ప్రతిబింబిస్తోంది.

భారత్‌కు మరో బెన్‌ స్టోక్స్‌లా..

నితీశ్‌ యొక్క శరీర భాష, ఆత్మవిశ్వాసం, అల్‌రౌండ్‌ సామర్థ్యం చూస్తుంటే, ఆయన భారత క్రికెట్‌కి తదుపరి బెన్‌ స్టోక్స్‌లా ఎదగగలడనీ, ఆంధ్ర క్రికెట్‌ నుంచి ఇంత ప్రతిభావంతుడైన ఆటగాడు రావడం గర్వకారణం అని మాజీ ఆటగాళ్లు అంటున్నారు. రోహిత్‌, కోహ్లీ వంటి సీనియర్ల ఆశీస్సులు, మార్గదర్శకత్వం ఉంటే ఆయన ప్రస్థానం మరింత వెలుగొందుతుందని విశ్లేషకులు అభిప్రాయపడ్డారు.

ప్రస్తుతం టీమిండియా డ్రెస్సింగ్​ రూమ్‌లో అందరూ నితీశ్‌ అభిమానులుగా మారిపోయారు. తన తేలికైన నవ్వు, వినమ్రత, నిశ్శబ్ద విశ్వాసంతో ఆటగాళ్లను ఆకట్టుకుంటున్నాడు. రోహిత్‌ చెప్పినట్లు, “నీకు ఏదైనా అవసరం అయితే, నీ చుట్టూ మేమందరం ఉన్నాం” — ఈ మాటలు నితీశ్‌ భవిష్యత్తుకు అజేయమైన ప్రేరణగా నిలుస్తాయి.