Microsoft | “కొత్త మైక్రోసాఫ్ట్​ కంప్యూటర్​ అన్నీ గుర్తుపెట్టుకుంటుంది”

రెడ్​మండ్​, వాషింగ్టన్​: బిల్డ్​‌‌ 2024 ఈవెంట్​కు ముందుగానే, మైక్రోసాఫ్ట్​ కీలక ప్రకటన చేసింది. తాము ఓ కొత్త ప్రపంచపు కంప్యూటర్లను విడుదల చేస్తున్నట్లు ప్రకటించింది. ఈ సరికొత్త కంప్యూటర్లు కృత్రిమ మేధలోని అతి క్లిష్టమైన పనులను కూడా సులభంగా చేయగలవని మైక్రోసాఫ్ట్(Microsoft) ​ సిఈఓ సత్య నాదెళ్ల (Satya Nadella) తెలిపారు.

– కోపైలట్​+ పీసీల ఆవిష్కరణ సందర్భంగా సత్య నాదెళ్ల
– యాపిల్​ మ్యాక్​బుక్​ ప్రొ నూ దాటేస్తాం
– రీకాల్​ అనే ఫీచర్​ కంప్యూటర్​పై మనం చేసే, చూసేవన్నీ ట్రాక్​ చేస్తుంది

ఆయన ఆవిష్కరించిన ఈ కంప్యూటర్​ను కోపైలట్​+ పీసీలు(Copilot+ PC)గా పిలవొచ్చని చెప్పిన నాదెళ్ల, ఇంతవరకు కనీవినీ ఎరుగని అత్యంత వేగవంతమైన, అపరిమిత మేధస్సు కలిగిన మొట్టమొదటి విండోస్​ కంప్యూటర్​గా దీన్ని అభివర్ణించారు. దీని గురించి వాల్​ స్ట్రీట్​ జర్నల్​(WSJ)కు ఇచ్చిన ఇంటర్వ్యూలో మాట్లాడుతూ, కోపైలట్​+ పిసీలో పొందుపరిచిన విశేషాలను పంచుకున్నారు. డెల్​ టెక్నాలజీస్​, క్వాల్​కామ్​, ఇంటెల్​, ఏఎండీల సహకారంతో ఈ పీసీలను తయారుచేస్తున్నట్లు చెప్పారు. క్వాల్​కాం ఎక్స్​ సిరీస్​ ప్రాసెసర్​తో రాబోతున్న ఈ పీసీ, ఏఐ పనుల భారాన్ని తనే చూసుకుంటుందని, దానికి  ఎక్స్​ ఎలైట్​(Snapdragon X Elite) ప్రాసెసర్​లో ఉన్న అత్యధిక పనితీరును కలిగిన 8 కోర్లు, 4 అధిక సామర్థ్యం కలిగిన  కోర్లు సహకరిస్తాయని ఆయన అన్నారు. 40 టాప్స్​ (ట్రిలియన్​ ఆపరేషన్స్​ పర్​ సెకండ్​) వేగంతో ఈ పీసీ పనిచేస్తుందని, ఇదంతా రోజుకు కేవలం ఒకే ఒక్క చార్జింగ్​తోనే సాధ్యమని వివరించారు.

ఈ పీసీలు అత్యంత అధునాతన ఏఐ ఉపకరణాల(AI Tools)తో ఉన్నాయి. కోక్రియేటర్(Cocreator)​ సహాయంతో రియల్​టైమ్​లో ఏఐ ఆధారిత చిత్రాలను సృష్టించడం, వాటికి మెరుగులు దిద్దడం లాంటి వాటితో పాటు, భాషాపరమైన అన్ని సమస్యలను పరిష్కరించనుంది. దాదాపు 40 భాషల మధ్య అనుసంధానకర్తగా వ్యవహరిస్తూ, లైవ్​ వ్యాఖ్యలను జోడించడం, ఆ భాషల విడియోలనుండి ఇంగ్లీష్​కు తర్జుమా చేయడం వంటి అత్యంత ఉపయోగకరమైన పనులను సమర్థవంతంగా నిర్వహిస్తుందని చెప్పారు.

ప్రపంచ ప్రఖ్యాతి గాంచిన ల్యాప్​టాప్​ యాపిల్​(Apple) మ్యాక్​బుక్​ ప్రొ(Macbook Pro)ను అధిగమించడమే తమ లక్ష్యంగా మైక్రోసాఫ్ట్​ ప్రకటించింది. అయితే ఈ మధ్యనే యాపిల్​ విడుదల చేసి సంచలనం సృష్టించిన ఐప్యాడ్​ ప్రొ(iPad Pro 2024) ఏకంగా 48 టాప్స్​ వేగంతో పనిచేయగలగడం గమనార్హం.

ఈ పీసీలో ఉన్న అతి ముఖ్యమైన ఫీచర్​ – రీకాల్(Recall)​. ఇదొక ఫోటోగ్రాఫిక్​ మెమొరీ లాంటిది. అంటే ఏకసంథాగ్రాహి అనవచ్చునేమో. ఇకనుండీ మనం కంప్యూటర్​పై ఏం చేస్తున్నదీ, ఏం చూస్తున్నదీ.. అన్నీ ఇది గుర్తుపెట్టుకుంటుంది.

ఇది మనం సాధారణంగా కంప్యూటర్​పై రోజూ చేసే పనులను, చూసేవన్నింటినీ ట్రాక్​ చేస్తుంది. అంటే, ప్రతీ టాస్క్​ను ఒక స్క్రీన్​షాట్​లా తీసుకుని దాచుకుంటుంది. మనకు ఎప్పుడైనా గతంలో చేసిన ఏదైనా పనో, వాడిన ఫైలో అవసరమైనప్పుడు ఈ రీకాల్​ తక్షణమే దాన్ని వెతికిపెడుతుంది. ఈ రీకాల్​ ఫీచర్​కు వినియోగదారుడే అన్ని రకాల అనుమతులు ఇవ్వాల్సిఉంటుంది. విండోస్​ 11(Windows 11)లో దీన్ని ప్రవేశపెడుతున్నారు. ఇదే ఈవెంట్​లో సత్య నాదెళ్ల స్వరాధారిత కృత్రిమ మేధ సహాయకుడ్ని(AI Assistant) కూడా పరిచయం చేసారు. పీసీలో గేమ్​ ఆడుతున్న ఒక వినియోగదారుడికి ఈ ఏఐ కోచ్​ సలహాలివ్వడాన్ని ప్రత్యక్షంగా చూపించారు. ఇంతకుముందే ఉన్న ఏఐ సౌలభ్యాలన్నింటినీ కలగలుపుకుంటూ, కోపైలట్​+ పీసీ మరింత ప్రభావవంతంగా పనిచేస్తుందని తెలిపారు. ఈ కోపైలట్​+ పీసీ త్వరలోనే ఓపెన్​ ఏఐ ఆధారిత చాట్​జీపీటీ 4ఓ(ChatGPT 4o)ను కూడా కలుపుకుంటుందని మైక్రోసాఫ్ట్​ ఉన్నతాధికారి ఒకరు తెలియజేసారు.

ఈ పీసీతో పాటు మైక్రోసాఫ్ట్​ తన కొత్త సర్ఫేస్​ ట్యాబ్లెట్​(Surface Tablet)ను, సర్ఫేస్​ ల్యాప్​టాప్​(Surface Laptop)ను కూడా విడుదల చేసింది. ఈ కొత్త కోపైలట్​+ పీసీలను తనతో పాటు తమ ఓఈఎం భాగస్వాములైన అసుస్​, డెల్​, సామ్​సంగ్​, హెచ్​పీ, ఏసర్​, లెనోవో కూడా విడుదల చేస్తాయని, ఈరోజు నుండే ముందస్తు ఆర్డర్​లు చేయవచ్చునని, జూన్​ 18 నుండి సరఫరా ప్రారంభమవుతుందని మైక్రోసాఫ్ట్​ తెలిపింది.

అయితే, మరోపక్క ఈ రీకాల్​ ఫీచర్​పై భిన్నాభిప్రాయలు వ్యక్తమవుతున్నాయి. దీని గురించి ఒక ఎక్స్​ యూజర్​ ఎలన్​ మస్క్(Elan Musk)​కు షేర్​ చేయగా, ఆయన దీన్నొక బ్లాక్​ మిర్రర్​(Black Mirror) ఎపిసోడ్​గా అభివర్ణించారు (బ్లాక్​ మిర్రర్​ అనేది బ్రిటన్​లో ప్రఖ్యాతి పొందిన టీవీ సీరీస్​. ఇందులోని ఎపిసోడ్లు, సాంకతికత వికృత పోకడల వల్ల జరిగే నష్టాలను వ్యంగ్యంగా చూపిస్తాయి). నేనైతే ఈ ఫీచర్​ను అసలు ఆన్​ చేయను అని మస్క్​ వ్యాఖ్యానించారు. ఇప్పటికే ప్రశ్నార్థకంగా మారిన వ్యక్తిగత గోప్యత(Privacy) దీంతో మరింత బజార్న పడుతుందని సాంకేతిక నైతికత నిపుణులు ఆందోళన వ్యక్తం చేస్తున్నారు. అనుమతులు వినియోగదారుడే ఇవ్వాల్సిఉన్నా, బ్యాక్​గ్రౌండ్​లో జరిగే సమాచార మార్పిడి ఇప్పటికే ఫేస్​బుక్(Facebook)​ను కష్టాల్లోకి నెట్టేసిందని, గూగుల్(Google)​ కూడా ఇదే పని చేస్తుందని, ఇప్పుడు ఈ రీకాల్​తో ప్రపంచంలో ప్రైవసీ అనేదే లేకుండా పోతుందని వారు వాపోయారు.