Showroom Vehicle Registration New RTA Rule | షోరూముల్లో వాహన రిజిస్ట్రేషన్‌పై కొత్త నిబంధనలు… తెలంగాణ వాహన యజమానులకు ఆర్టీఏ షాక్!

షోరూమ్​లోనే వాహన రిజిస్ట్రేషన్ ప్రక్రియలో ఆర్టీఏ కొత్త నిబంధనతో వాహనదారుల్లో ఆందోళన పెరుగుతోంది.  బ్యాంక్ ఖాతా వివరాలు అడగటంపై అభ్యంతరాలు, ట్రాఫిక్ జరిమానాల ఆటో డెబిట్ భయాలు, వ్యక్తిగత సమాచార భద్రతపై సందేహాలు వ్యక్తమవుతున్నాయి.

Bank Details in Vehicle Registration Raise Privacy Fears Among Buyers in Telangana

విధాత తెలంగాణ డెస్క్​ | హైదరాబాద్​:

తెలంగాణలో వాహన రిజిస్ట్రేషన్ ప్రక్రియలో ఇటీవల చేర్చిన బ్యాంక్ ఖాతా వివరాల క్లాజ్‌ ఇప్పుడు పెద్ద వివాదానికి దారి తీస్తోంది. కొత్త డీలర్-స్థాయి రిజిస్ట్రేషన్ విధానంలో భాగంగా అకౌంట్ నెంబర్, IFSC వంటి సున్నితమైన సమాచారాన్ని కోరడం వల్ల వినియోగదారుల్లో గోప్యతపై భయాలు పెరుగుతున్నాయి. ట్రాఫిక్ జరిమానాలను నేరుగా ఖాతాల నుంచి వసూలు చేసే అవకాశముందన్న అనుమానాలు ఈ అంశాన్ని మరింత సంచలనంగా మారుస్తున్నాయి. అదీ కాక, పెరుగుతున్న సైబర్​ మోసాలతో  బ్యాంకు ఖాతా  సమాచారం దుర్వినియోగం కూడా కావచ్చని ఆందోళన వ్యక్తమవుతోంది.

షోరూమ్ రిజిస్ట్రేషన్‌లో డీలర్ స్థాయి విధానంతో మొదలైన కొత్త వివాదం

తెలంగాణ రాష్ట్రంలో ఇటీవల ప్రారంభమైన డీలర్ పాయింట్ వాహన రిజిస్ట్రేషన్ విధానంలో బ్యాంక్ ఖాతా వివరాలు కోరే నిబంధన తీవ్ర చర్చకు దారి తీస్తోంది. వాహనం కొనుగోలు చేసే సమయంలో అకౌంట్ నెంబర్, IFSC కోడ్ వంటి వివరాలను నమోదు చేయాల్సి రావడం వినియోగదారుల్లో అనుమానాలకు కారణమవుతోంది.

జనవరి 24 నుంచి అమలులోకి వచ్చిన ఈ విధానంలో భాగంగా షోరూమ్ నుంచే వాహనాలకు రిజిస్ట్రేషన్ పూర్తవుతోంది. అయితే దరఖాస్తు ఫారంలో చేర్చిన బ్యాంక్ వివరాల కాలమ్‌పై చాలామంది అభ్యంతరం వ్యక్తం చేస్తున్నారు. ప్రత్యేకంగా ఇటీవల సీఎం రేవంత్ రెడ్డి ట్రాఫిక్ జరిమానాలను నేరుగా బ్యాంక్ ఖాతాల నుంచి వసూలు చేసే అంశంపై చేసిన వ్యాఖ్యల నేపథ్యంలో ఈ క్లాజ్ మరింత భయాందోళనలకు దారితీసింది.

“ఐచ్చికమే” అంటున్న ఆర్టీఏ… కానీ తగ్గని అనుమానాలు

ఈ అంశంపై స్పందించిన ఆర్టీఏ అధికారులు – బ్యాంక్ వివరాల సమర్పణ తప్పనిసరి కాదని, పూర్తిగా ఐచ్చికమేనని చెబుతున్నారు. ఆటో డెబిట్‌కు దీనికి ఎలాంటి సంబంధం లేదని స్పష్టం చేస్తున్నారు. అయితే వారి వివరణలు వినియోగదారులను పూర్తిగా నమ్మించలేకపోతున్నాయి. “వాహన యజమానులు చిరునామా మారినప్పుడు తెలియజేయరు. బ్యాంక్ సమాచారం ద్వారా చిరునామా అప్‌డేట్ చేయవచ్చు” అన్న అధికారుల వాదనపై చాలామంది సందేహం వ్యక్తం చేస్తున్నారు. డీలర్లు కూడా ఈ అంశంతో ఇబ్బందులు ఎదుర్కొంటున్నారు. కొందరు కొనుగోలుదారులు బ్యాంక్ వివరాల అవసరం ఏమిటని ప్రశ్నిస్తూ, సమాచారం ఇవ్వడానికి నిరాకరిస్తున్నారు.

డేటా భద్రత, ఆటో డెబిట్ భయాలు… వాహన యజమానుల నిరసనలు

వ్యక్తిగత ఆర్థిక సమాచారం భద్రతపై వినియోగదారుల్లో తీవ్ర ఆందోళన నెలకొంది. ఒకసారి సమాచారం ప్రభుత్వ వ్యవస్థలోకి వెళితే, భవిష్యత్తులో జరిమానాలు, ఇతర చెల్లింపులు ఆటోమేటిక్‌గా డెబిట్ అయ్యే ప్రమాదం ఉందనే భావన బలంగా ఉంది.

ఇప్పటికే నగరంలో సుమారు 3,000 వాహనాలకు తాత్కాలిక రిజిస్ట్రేషన్ ఇచ్చారు. ఒక నెల గడువు పూర్తైన తర్వాత శాశ్వత రిజిస్ట్రేషన్ జరగాల్సి ఉంది. ఈలోగా బ్యాంక్ వివరాల అంశంపై స్పష్టమైన విధానాన్ని ప్రభుత్వం ప్రకటించాలని వినియోగదారులు కోరుతున్నారు. డేటా ప్రైవసీ చట్టాలు ఉన్నప్పటికీ, ప్రభుత్వ విభాగాల ద్వారా వ్యక్తిగత సమాచారం దుర్వినియోగం కావచ్చనే భయం ప్రజల్లో తగ్గడం లేదు.

వాహన రిజిస్ట్రేషన్‌లో బ్యాంక్ వివరాల సేకరణపై ప్రభుత్వం, ఆర్టీఏ స్పష్టమైన మార్గదర్శకాలు జారీ చేయకపోతే ఈ వివాదం మరింత పెరిగే అవకాశముంది. వినియోగదారుల విశ్వాసాన్ని పొందాలంటే పారదర్శక విధానం తప్పనిసరి అవుతుంది.