విధాత : అసెంబ్లీ ఎన్నికల్లో బరిలో కొల్లాపూర్‌లో పోటీ చేసి గుర్తింపు సాధించిన యూ ట్యూబర్ బర్రెలక్క పార్లమెంటు ఎన్నికల బరిలోనూ పోటీకి దిగింది. అయితే ఈసారి ఆమె నాగర్ కర్నూల్ రిజర్వ్‌డ్ నియోజకవర్గంలో పోటీ చేయనుంది. మంగళవారం నాగర్ కర్నూల్ పార్లమెంట్ నియోజకవర్గానికి ఇండిపెండెంట్ అభ్యర్థిగా బర్రెలక్క నామినేషన్ దాఖలు చేశారు. కుటుంబ సభ్యులు, సన్నిహితులతో కలిసి బర్రెలక్క నాగర్ కర్నూల్ సమీకృత జిల్లా కార్యాలయంలో నామినేషన్ దాఖలు చేశారు. తెలంగాణ అసెంబ్లీ ఎన్నికల సమయంలో బర్రెలక్క పోటీ దేశ వ్యాప్తంగా చర్చనీయాంశమైంది. కొల్లాపూర్ నియోజకవర్గం నుంచి స్వతంత్ర అభ్యర్థిగా పోటీ చేసి.. 5754 ఓట్లు సాధించి ఆమె నాలుగో స్థానంలో నిలిచింది. తాజాగా లోకసభ ఎన్నికల్లో స్వతంత్ర అభ్యర్థినిగా పోటీకి సిద్ధమైంది. ఇటీవలే తన సమీప బంధువు వెంకటేశ్‌ను పెళ్లి చేసుకున్న బర్రెలక్క ఎంపీ ఎన్నికల్లో పోటీకి దిగడం ద్వారా మరోసారి ఆమె వార్తల్లో నిలిచింది.
