కాంగ్రెస్ ప్రభుత్వం అధికారంలోకి రాగానే 90రోజుల్లో 30వేల ఉద్యోగాలు భర్తీ చేశామని, మరో 90రోజుల్లో మరో 30వేల ఉద్యోగాలు భర్తీకి నోటిఫికేషన్ల జారీ చేశామని సీఎం రేవంత్రెడ్డి ప్రకటించారు
నిరుద్యోగులలో ఆందోళనలు అనవసరం
సమస్యలపై మంత్రులను కలిసి వివరించండి
ప్రజల ఆలోచన మేరకే మా ప్రభుత్వం పనిచేస్తుంది
విధాత, హైదరాబాద్ : కాంగ్రెస్ ప్రభుత్వం అధికారంలోకి రాగానే 90రోజుల్లో 30వేల ఉద్యోగాలు భర్తీ చేశామని, మరో 90రోజుల్లో మరో 30వేల ఉద్యోగాలు భర్తీకి నోటిఫికేషన్ల జారీ చేశామని సీఎం రేవంత్రెడ్డి ప్రకటించారు. శుక్రవారం వట్టినాగులపల్లిలో రాష్ట్ర విపత్తు నిర్వహణ అగ్నిమాపక శాఖ ఉద్యోగుల పాసింగ్ అవుట్ పరేడ్లో ఆయన పాల్గొన్నారు. ఈ సందర్భంగా ఆయన మాట్లాడుతూ కాంగ్రెస్ అధికారంలోకి రాగానే నిరుద్యోగుల ఆకాంక్షలు నెరవేర్చేందుకు 30వేల ఉద్యోగ నియామక పత్రాలను పంపిణీ చేశామని, నిరుద్యోగుల్లో భవిష్యత్తుపై భరోసా కల్పించే క్రమంలో అధికారంలోకి వచ్చి ఏడాది తిరగకముందే 60వేలకు పైగా ఉద్యోగాలు అందించే చర్యలు చేపట్టామన్నారు. ఎప్పటికప్పుడు ప్రభుత్వ ఉద్యోగ ఖాళీలను భర్తీ చేస్తూ ముందుకెళతామన్నారు. డీఎస్సీ ద్వారా 11వేల టీచర్ పోస్టులు భర్తీ చేస్తున్నామని, వివిధ శాఖలోని ఖాళీలను గ్రూప్ 1,2,3ల ద్వారా భర్తీ చేస్తున్నామని తెలిపారు.
నిరుద్యోగులకు, విద్యార్థులకు ఆందోళనలు అవసరం లేదని, వారికి నా సూచన ఒక్కటేనని, మీకు సమస్యలు ఉంటే మంత్రులు, ఎమ్మెల్యేలకు విన్నవించండని, సమస్యలను పరిష్కరించేందుకు మీ రేవంతన్నగా మీకు ఎప్పుడూ అండగా ఉంటానని భరోసానిచ్చారు. ప్రజా ప్రభుత్వం ప్రజల ఆలోచనలకు అనుగుణంగా ముందుకెలుతుందని, అందులో భాగంగానే విద్య, వైద్యానికి బడ్జెట్ లో ప్రాధాన్యతనిచ్చామన్నారు. ప్రభుత్వ ఉద్యోగులకు మొదటి తారీఖు జీతం అందించి ఉద్యోగులకు ప్రభుత్వంపై విశ్వాసం కల్పించామన్నారు. ఫైర్ మెన్ శిక్షణ పూర్తి చేసుకున్న యువకులకు నా శుభాకాంక్షలన్నారు. శిక్షణ పూర్తి చేసుకున్న మిమ్మల్ని చూసి మీ తల్లిదండ్రులు గుండెల నిండా సంతోషిస్తున్నారన్నారు. ఏ ఆకాంక్షతో యువత తెలంగాణ పోరాటంలో పాల్గొన్నారో.. ఆ ఆకాంక్షను గత ప్రభుత్వం నెరవేర్చలేదని విమర్శించారు. సమాజాన్ని కాపాడాలన్న ఉద్దేశంతో ముందుకు వచ్చిన మీ అందరినీ అభినందిస్తున్నానన్నారు.