Maoist Narella Jyothi : పంచాయతీ ఎన్నికల బరిలోకి మాజీ మావోయిస్టు జ్యోతి!

తెలంగాణలో జరుగుతున్న పంచాయతీ ఎన్నికల్లో, రాజన్న సిరిసిల్ల జిల్లాకు చెందిన మాజీ మావోయిస్టు నేత నేరెళ్ల జ్యోతి సర్పంచ్ స్థానానికి బరిలోకి దిగుతున్నారు.

విధాత : తెలంగాణలో జరుగుతున్న పంచాయతీ ఎన్నికల్లో సర్పంచ్ స్థానానికి మాజీ మావోయిస్టు నేత జ్యోతి బరిలోకి దిగుతున్నారు. రాజన్న సిరిసిల్ల జిల్లా శివంగలపల్లికి చెందిన నేరెళ్ల జ్యోతి కోనరావుపేట జిల్లా పరిషత్తు ఉన్నత పాఠ శాలలో 2001లో పదో తరగతి చదివారు. 2005లో దళ మావోయిస్టు పార్టీ సభ్యురాలిగా చేరారు. మావోయిస్టు పార్టీలో 19 సంవత్సరాలుగా అజ్ఞాతంలో పనిచేసి ప్రజా సమస్యల పోరాటం సాగించారు. పార్టీ జిల్లా కమిటీ సభ్యురాలి స్థాయికి చేరారు. రాష్ట్ర ప్రెస్ ఇన్ చార్జిగా కూడా బాధ్యతలు నిర్వహించారు. 2023లో అనారోగ్య కారణాలతో కరీంనగర్ ఎస్పీ సుబ్బారాయుడు ముందు లొంగిపోయారు. అనంతరం గ్రామంలో ప్రజా సమస్యలపై స్పందిస్తూ వచ్చారు.

తాజాగా జరుగుతున్న పంచాయతీ ఎన్నికల్లో మాజీ మావోయిస్టు నేరెళ్ల జ్యోతి శివంగలపల్లి సర్పంచి అభ్యర్థిగా పోటీ చేసేందుకు నామినేషన్ దాఖలు చేశారు. రిజర్వేషన్లలో శివంగలపల్లి సర్పంచ్ స్థానాన్ని బీసీ మహిళకు కేటాయించారు. దీంతో తను ప్రజాసేవ చేసే అవకాశం కోసం సర్పంచ్ ఎన్నికలలో పోటీలో నిల బడినట్లు జ్యోతి తెలిపారు.

పార్లమెంటరీ రాజకీయాల్లోకి మావోలు అడుగులు

దేశంలో మావోయిస్టుల ఉద్యమం అంతిమ దశకు చేరుకున్న తరుణంలో జనజీవన స్రవంతిలో కలుస్తున్న మావోయిస్టులు క్రమంగా రాజకీయాల వైపు అడుగులేస్తున్నారు. గతంలొ మాజీ నక్సలైట్ సీతక్క టీడీపీ పార్టీ ద్వారా రాజకీయాల్లోకి ఎంట్రీ ఇచ్చి..కాంగ్రెస్ లో చేరిపోయి ప్రస్తుతం తెలంగాణ మంత్రిగా కొనసాగుతున్నారు. గతంలో మావోయిస్టు పార్టీ కీలక నేతగా వ్యవహరించిన సాంబశివుడు బీఆర్ఎస్ పార్టీలో చేరి..రాజకీయాల్లో ఎదుగుతున్న క్రమంలో తన ప్రత్యర్థి నయీమ్ ముఠా చేతిలో హత్యకు గురయ్యాడు. జిల్లాల్లో పలువురు మావోయిస్టులు ప్రత్యక్ష రాజకీయాల్లో ఆసక్తి చూపుతున్నప్పటికి ఎన్నికల వ్యవస్థ వారిని ఆలోచింపచేస్తుంది. ఎన్నికలలో గెలవాలంటే డబ్బు, కులం, పార్టీ బలం వంటి అంశాలతో పాటు ఎన్నికల సమయంలో రాజకీయ పరిస్థితులు కూడా కలిసిరావాల్సి ఉంది.

అయితే మావోయిస్టులకు ఉన్న ఉద్యమ చరిత్ర నేపథ్యంలో ప్రయత్నిస్తే వారు ఎన్నికల వ్యవస్థలో విజయాన్ని అందుకోవచ్చని సీతక్క వంటి వారు నిరూపించారు. తాజాగా ఆపరేషన్ కగార్ దెబ్బకు లొంగుబాట పట్టిన మావోయిస్టులు రాజకీయాల్లో రాణించేందుకు అవకాశాలు లేకపోలేదు. త్వరలో అసెంబ్లీ, పార్లమెంటు స్థానాల పెంపు నేపథ్యంలో వారిలో కొందరైన చట్టసభలలో అడుగు పెడితే సమాజానికి మేలు జరుగవచ్చన్న అభిప్రాయలు వినిపిస్తున్నాయి.