విధాత, హైదరాబాద్ : ఫార్ములా ఈ కారు రేసులో ఏసీబీ విచారణకు గవర్నర్ అనుమతించడం బీఆర్ఎస్ వర్కింగ్ ప్రెసిడెంట్ కేటీఆర్ పై కాంగ్రెస్ ప్రభుత్వం రాజకీయ కక్ష సాధింపు చర్యలకు పరాకాష్ట అని మాజీ మంత్రి టి.హరీష్ రావు ఆరోపించారు. కేటీఆర్ విచారణకు గవర్నర్ అనుమతించంపై హరీష్ రావు ఎక్స్ వేదికగా స్పందించారు. రాజ్యాంగబద్ధమైన పదవిలో ఉండి ప్రశ్నించే గొంతులను సీఎం రేవంత్‌రెడ్డి నొక్కే ప్రయత్నం చేస్తుండటం దుర్మార్గం అని విమర్శిచారు. పూర్తి పారదర్శకతతో నిర్వహించిన ఫార్ములా ఈ రేస్ లో రెండేళ్లుగా కాంగ్రెస్ సర్కార్‌ కోడిగుడ్డుపై ఈకలు పీకుతుందన్నారు.
హైదరాబాద్ బ్రాండ్ ఇమేజీని పెంచిన కేటీఆర్ పై అక్రమ కేసులు బనాయించి ఇబ్బంది పెట్టడమే లక్ష్యంగా రేవంత్ రెడ్డి వ్యవహరిస్తున్నారని హరీష్ రావు మండిపడ్డారు.
స్థానిక సంస్థలలో రాజకీయ లబ్ధీ కోసమే కేటీఆర్ విచారణ
ప్రభుత్వ వైఫల్యాలను ఎప్పటికప్పుడు ఎండగడుతున్న కేటీఆర్ పై అక్రమ కేసులు బనాయించి రాక్షసానందం పొందటం అప్రజాస్వామికం అన్నారు. స్థానిక సంస్థల ఎన్నికల వేళ రాజకీయ లబ్ది పొందేందుకు చేస్తున్న చిల్లర డ్రామాలను ప్రజలు గమనిస్తున్నారు అని, అక్రమ కేసులతో కేటీఆర్, బీఆర్ఎస్ నాయకుల మనోస్థైర్యాన్ని దెబ్బతీయలేరు అని హరీష్ రావు స్పష్టం చేశారు. కేటీఆర్ కు బీఆర్ఎస్ పార్టీ పూర్తి అండగా ఉంటుందని, సీఎం రేవంత్ రెడ్డి దుర్మార్గ వైఖరిని న్యాయపరంగా ఎదుర్కొంటాం అని తెలిపారు.