Rains | రాష్ట్రంలో రెండు రోజులపాటు వర్షాలు.. హైదరాబాద్‌ వాతావరణ కేంద్రం వెల్లడి

Rains | రాష్ట్రంలో రెండు రోజులపాటు వర్షాలు కురుస్తాయని హైదరాబాద్‌ వాతావరణ కేంద్రం వెల్లడించింది. ఓ మోస్తరు నుంచి భారీ వర్షాలు కురుస్తాయని తెలిపింది.

Rains : రాష్ట్రంలో రెండు రోజులపాటు వర్షాలు కురుస్తాయని హైదరాబాద్‌ వాతావరణ కేంద్రం వెల్లడించింది. ఓ మోస్తరు నుంచి భారీ వర్షాలు కురుస్తాయని తెలిపింది. బలమైన నైరుతి రుతుపవనాలకు తోడు.. సముద్ర మట్టానికి 3.1 కిలోమీటర్ల నుంచి 7.6 కిలోమీటర్ల నడుమ ఆవర్తనం కొనసాగుతున్నదని వాతావరణ విభాగం అధికారులు పేర్కొన్నారు.

ఆంధ్రప్రదేశ్‌ తీరంలో పశ్చిమ-మధ్య బంగాళాఖాతాన్ని ఆనుకుని కేంద్రీకృతమైన ఆవర్తనం బలహీనపడిందని, దాని ప్రభావంతో తెలంగాణలోని 10 జిల్లాల్లో భారీ వర్షాలు కురుస్తాయని వాతావరణ అధికారులు తెలిపారు. మంచిర్యాల, నిర్మల్‌, నిజామాబాద్‌, ఆదిలాబాద్‌, కుమ్రంభీం-ఆసిఫాబాద్‌, జయశంకర్‌ భూపాలపల్లి, వరంగల్‌, హనుమకొండ, ములుగు, భద్రాద్రి-కొత్తగూడెం జిల్లాలకు ఎల్లో అలర్ట్‌ జారీచేశారు.

పది జిల్లాల్లో గంటకు 30-40 కిలోమీటర్ల వేగంతో గాలులతోపాటు ఉరుములు, మెరుపులతో కూడిన వర్షాలు కురుస్తాయని, పిడుగులు పడే అవకాశం ఉన్నదని చెప్పారు. హైదరాబాద్‌లోనూ భారీ వర్షం కురిసే అవకాశముందని, నగర ప్రజలు అప్రమత్తంగా ఉండాలని వాతావరణ కేంద్రం అధికారులు సూచించారు. భద్రాద్రి-కొత్తగూడెం జిల్లా బుర్గంపాడులో బుధవారం అత్యధికంగా 6.40 సెం.మీ వర్షపాతం నమోదైంది.