Real Estate | గ్రేటర్‌లో రియల్ జోరు.. ఏడు నెలల్లో పెరిగిన రిజిస్ట్రేషన్లు

గ్రేటర్ హైదరాబాద్ పరిధిలో రియల్ ఎస్టేట్ వ్యాపారం జోరందుకుందని, భవనాలు, లేఅవుట్ల అనుమతులతో పాటు ప్లాట్లు, భవనాల రిజిస్ట్రేషన్లు పెరుగుతున్న తీరు అందుకు నిదర్శనమని ప్రభుత్వ వర్గాలు చెబుతున్నాయి.

హైదరాబాద్‌: గ్రేటర్ హైదరాబాద్ పరిధిలో రియల్ ఎస్టేట్ వ్యాపారం జోరందుకుందని, భవనాలు, లేఅవుట్ల అనుమతులతో పాటు ప్లాట్లు, భవనాల రిజిస్ట్రేషన్లు పెరుగుతున్న తీరు అందుకు నిదర్శనమని ప్రభుత్వ వర్గాలు చెబుతున్నాయి. కొత్త ప్రభుత్వం ఏర్పడిన తర్వాత హెచ్ఎండీఏ పరిధిలో ప్రాంతంలో జరిగిన రిజిస్ట్రేషన్ల సంఖ్య, డాక్యుమెంట్ల రిజిస్ట్రేషన్ ద్వారా వచ్చే ఆదాయం రెండూ పెరిగాయని, కొత్త భవనాల నిర్మాణాలకు అనుమతుల సంఖ్య కూడా పెరిగిందని పేర్కొంటున్నాయి. ఎన్నికల కోడ్‌తో దాదాపు మూడు నెలల పాటు ఆర్థిక లావాదేవీలు స్తంభించినప్పటికీ గత ఏడాదితో పోలిస్తే స్థిరాస్థి రంగం పుంజుకున్నదని చెబుతున్నాయి. ముఖ్యమంత్రి ఏ రేవంత్ రెడ్డి ప్రతిష్ఠాత్మకంగా చేపట్టిన మూసీ రివర్ ఫ్రంట్ డెవలప్‌మెంట్‌ ప్రాజెక్టు, మెట్రో రైలు విస్తరణ, సికింద్రాబాద్ నుంచి జాతీయ రహదారులకు అనుసంధానం చేసే రెండు ఎలివేటేడ్ కారిడార్ల నిర్మాణంతో రాబోయే రోజుల్లో సిటీ రూపురేఖలు మారిపోనున్నాయి. మరోవైపు రీజనల్ రింగ్ రోడ్డు వరకు హెచ్ఎండీఏ పరిధిని విస్తరించే ప్రణాళికలు, రీజనల్ రింగ్ రోడ్డు నిర్మాణ పనులపై ప్రభుత్వం దృష్టా సారించటంతో స్థిరాస్థి రంగానికి అనుకూల వాతావరణం ఏర్పడిందని అంటున్నారు. గతంతో పోలిస్తే జీహెచ్ఎంసీ, హెచ్ఎండీఏ పరిధిలో రిజిస్టేషన్ల ద్వారా వచ్చే ఆదాయం పెరిగింది. కొత్త ప్రభుత్వం అధికారం చేపట్టినప్పటి నుంచి, అంటే 2023 డిసెంబర్ నుంచి జూన్ నెలాఖరు వరకు ఏడు నెలల్లో ప్లాట్లు భవనాల రిజిస్ట్రేషన్ల ద్వారా రూ.4670.52 కోట్ల ఆధాయం వచ్చిందని అధికారవర్గాలు చెబుతున్నాయి. అంతకు ముందు ఏడు నెలల్లో అంటే మే 2023 నుంచి నవంబర్ 2023 వరకు వచ్చిన ఆదాయం రూ.4429.23 కోట్లు. అంటే రూ.241.29 కోట్ల ఆదాయం పెరగటం గమనార్హం. రోజురోజుకు విస్తరిస్తున్న గ్రేటర్ హైదరాబాద్లో స్థిరాస్థి రంగం వృద్ధికి ఇది సంకేతమని అంటున్నారు. గత సంవత్సరం (డిసెంబర్ 2022 నుండి జూన్ 2023 వరకు) ఇదే వ్యవధితో పోల్చినా రూ. 270.86 కోట్లు ఎక్కువని చెబుతున్నారు. గత ఏడు నెలల్లో జరిగిన మొత్తం రిజిస్ట్రేషన్ల సంఖ్య 2,18,160. ఇది గత ఏడాది ఇదే వ్యవధిలో 1,93,962 రిజిస్ట్రేషన్లు జరిగాయి. అంటే 12.5% పెరిగాయి.

ఈ ఏడాదిలో ఇప్పటి వరకు 54111 ఫ్లాట్ల రిజిస్ట్రేషన్ జరిగింది. గత ఏడాది ఇదే వ్యవధిలో 50535 ఫ్లాట్‌లు రిజిస్ట్రేషన్ అయ్యాయి. అప్పటితో పోలిస్తే 7% పెరుగుదల నమోదైంది. డిసెంబర్ 7 నుంచి జూన్ 30 వరకు జీహెచ్ఎంసీ, హెచ్ఎండీఏ పరిధిలో అనుమతి ఇచ్చిన భవనాల దరఖాస్తుల సంఖ్య 18077. గత ఏడాది మే నుంచి డిసెంబర్ 6వ తేదీ వరకు ఇచ్చి భవన అనుమతుల సంఖ్య 17911. గ్రేటర్ హైదరాబాద్ మున్సిపల్ కార్పొరేషన్ పరిధిలో ఏడు నెలల్లో ఆమోదించిన భవన నిర్మాణ అనుమతులు 7809. అంతకు ముందు ఏడు నెలలతో పోలిస్తే 13.17 శాతం పెరిగిందని అధికారవర్గాలు వివరిస్తున్నాయి.