Prabhas-Chiru | టాలీవుడ్లో మరో భారీ బాక్సాఫీస్ సమరం జరిగే సూచనలు కనిపిస్తున్నాయి. మెగాస్టార్ చిరంజీవి , పాన్ ఇండియా స్టార్ ప్రభాస్ తమ తమ భారీ ప్రాజెక్టులతో ప్రేక్షకుల ముందుకు రావడానికి సిద్ధమవుతున్నారు. ఇప్పటికే 2026 ప్రథమార్ధంలొఓ కొన్ని పెద్ద సినిమాలు విడుదల కాగా, ఇప్పుడు ఏడాది ద్వితీయార్థంలో ఈ ఇద్దరు స్టార్ హీరోల సినిమాలు ప్రేక్షకుల్లో ఆసక్తిని పెంచుతున్నాయి. మెగాస్టార్ చిరంజీవి నటిస్తున్న సోషియో-ఫాంటసీ చిత్రం ‘విశ్వంభర’ ప్రస్తుతం టాలీవుడ్లో అత్యంత ప్రతిష్ఠాత్మకంగా తెరకెక్కుతున్న చిత్రాల్లో ఒకటి. ‘బింబిసార’ ఫేమ్ దర్శకుడు వశిష్ఠ ఈ సినిమాను తెరకెక్కిస్తున్నారు. భారీ విజువల్ ఎఫెక్ట్స్, హాలీవుడ్ స్థాయి గ్రాఫిక్స్తో ఈ చిత్రాన్ని అద్భుతమైన ఫాంటసీ కథగా రూపొందిస్తున్నారు.
మొదట ఈ సినిమాను 2025 సంక్రాంతి సందర్భంగా విడుదల చేయాలని మేకర్స్ భావించారు. అయితే విజువల్ ఎఫెక్ట్స్ పనులు ఎక్కువగా ఉండటంతో సినిమా విడుదల వాయిదా పడింది. తర్వాత 2026 సమ్మర్ లేదా జూలైలో విడుదల చేసే ఆలోచన కూడా వచ్చినప్పటికీ, పోస్ట్ ప్రొడక్షన్ పనుల కారణంగా ఇప్పుడు 2026 ఏడాది చివర్లో విడుదల చేసే అవకాశాలు ఉన్నట్లు సమాచారం. ఈ సినిమాలో చిరంజీవి సరసన త్రిష హీరోయిన్గా నటిస్తుండగా, ప్రముఖ సంగీత దర్శకుడు ఎం.ఎం. కీరవాణి సంగీతాన్ని అందిస్తున్నారు.
ఇక మరోవైపు పాన్ ఇండియా స్టార్ ప్రభాస్ హీరోగా దర్శకుడు హను రాఘవపూడి తెరకెక్కిస్తున్న చిత్రం ‘ఫౌజీ’ కూడా భారీ అంచనాల మధ్య రూపొందుతోంది. రెండో ప్రపంచ యుద్ధం నేపథ్యంలో సాగే భావోద్వేగభరితమైన పీరియడ్ వార్ డ్రామాగా ఈ సినిమా తెరకెక్కుతోంది. మైత్రీ మూవీ మేకర్స్ ఈ చిత్రాన్ని నిర్మిస్తున్నారు. మొదట ఈ సినిమాను 2026 ఆగస్టు లేదా దసరా సీజన్లో విడుదల చేయాలని మేకర్స్ భావించినప్పటికీ, ప్రస్తుతం షూటింగ్ మరియు గ్రాఫిక్స్ పనులు ఇంకా కొనసాగుతున్నాయి. అందువల్ల ఈ సినిమా కూడా 2026 చివరి నాటికి విడుదలయ్యే అవకాశాలు ఉన్నట్లు ట్రేడ్ వర్గాలు అంచనా వేస్తున్నాయి.
ఈ చిత్రంలో ప్రభాస్ సరసన ఇమాన్వి హీరోయిన్గా పరిచయం అవుతుండగా, విశాల్ చంద్రశేఖర్ సంగీతాన్ని అందిస్తున్నారు. ఇలా మెగాస్టార్ చిరంజీవి సోషియో-ఫాంటసీ కథతో వస్తుండగా, ప్రభాస్ పీరియడ్ వార్ యాక్షన్ డ్రామాతో ప్రేక్షకులను అలరించేందుకు సిద్ధమవుతున్నారు. రెండు విభిన్నమైన జోనర్లలో తెరకెక్కుతున్న ఈ భారీ సినిమాలు 2026 ఏడాది చివర్లో బాక్సాఫీస్ వద్ద భారీ పోటీకి దారితీసే అవకాశం ఉందని సినీ వర్గాలు భావిస్తున్నాయి. భారీ అంచనాల మధ్య వస్తున్న ఈ చిత్రాలు ప్రేక్షకులను ఎంతవరకు ఆకట్టుకుంటాయో చూడాలి.