విధాత: ప్రేమ ఇష్క్ కాదల్, వైశాఖం వంటి సినిమాలతో గుర్తింపు తెచ్చుకున్న హరీష్ ధనుంజయ్ హీరోగా నటించిన తాజా చిత్రం “మరువ తరమా”(Maruva Tarama) గురువారం ప్రీమియర్స్‌తో ప్రేక్షకుల ముందుకు వచ్చింది. అవంతిక(Avantika), అతుల్య చంద్ర(Atulya Chandra) హీరోయిన్లుగా నటించిన ఈ చిత్రానికి చైతన్య వర్మ నడింపల్లి(Chaitanya Varma Nadinapalli) దర్శకత్వం వహించగా, గిడుతూరి రమణ మూర్తి, NV విజయ్ కుమార్ రాజు నిర్మించారు. ట్రైలర్, సాంగ్స్‌తోనే యువతలో మంచి బజ్ క్రియేట్ చేసిన ఈ సినిమా ఎలా ఉందో చూద్దాం.
కథ: రిషి (హరీష్ ధనుంజయ్), సింధు (అవంతిక), అన్వీ (అతుల్య) ఒకే ఆఫీసులో పనిచేస్తుంటారు. రిషి సింధును చూసిన మొదటి క్షణంలోనే ప్రేమలో పడిపోతాడు. మరోవైపు అన్వీ కూడా రిషిని ఇష్టపడుతుంది కానీ అతనికి సింధుపై ప్రేమ ఉందని తెలుసుకుని తన ప్రేమను తెల‌ప‌కుండా దాస్తుంది. ఈ నేప‌థ్యంలో త‌ర్వాత రిషి–సింధు మధ్య దూరం ఎందుకు ఏర్ప‌డింది? సింధు తిరిగి రిషి జీవితంలోకి ఎందుకు వచ్చింది? అన్వీ చివరకు తన ప్రేమను చెప్పిందా? రిషి తల్లి (రోహిణి) చెప్పిన మాటలు అతని నిర్ణయాన్ని ఎలా మార్చాయి? అనే ఆస‌క్తిక‌ర క‌థ‌క‌నంతో సినిమా సాగుతుంది.
విశ్లేషణ: ట్రయాంగిల్ లవ్ స్టోరీలకు యువతలో ఎప్పుడూ మంచి క్రేజ్ ఉంటుంది. ఈ పంథాలోనే దర్శకుడు చైతన్య వర్మ ప్రేక్షకుడిని ఎంగేజ్ చేయడంలో సక్సెస్ అయ్యాడు. ఫస్ట్ హాఫ్ అంతా కథ పెద్దగా ముందుకు వెళ్లకపోయినా, సిట్యేవేష‌న్ ప‌రంగా వ‌చ్చే కామెడీ, పంచులు, పాట‌లు, విజువ‌ల్స్, యూత్ కనెక్ట్ అయ్యే సన్నివేశాలతో స‌ర‌దాగా సాగిపోతుంది.ఇక సెకండాఫ్‌కు వ‌చ్చే స‌రికి ప్ర‌ధాన కథ తెర‌పైకి వ‌చ్చి ప‌రుగులు పెడుతుంది. ఎ్క‌క‌డా బోర్ అనిపించకుండా లైట్ హార్ట్‌తో నడుస్తుంది. మదర్ సెంటిమెంట్‌తో కథ ఎమోషనల్‌గా పీక్‌కి చేరుతుంది. మన నిజ జీవితంలో చూసే ఘ‌ట‌న‌లు గుర్తు చేస్తుంటాయి ప్రేక్షకుడు కథలోని పాత్రలను మన చుట్టూ ఉన్న వారిలా ఫీల్ అయ్యేలా చేస్తుంది.
హరీష్ ధనుంజయ్ స్క్రీన్ ప్రెజెన్స్ బాగుంది, కొన్ని సీన్లలో నేచురల్ స్టార్ నానిని గుర్తు చేస్తాడు. అవంతిక, అతుల్య ఎమోషనల్ సన్నివేశాల్లో బాగా చేశారు. వారి పాత్రల‌కు మంచి పర్ఫార్మెన్స్ ఇచ్చారు. ఇక సీనియ‌ర్ న‌టి రోహిణి కాసేపు ఉన్న మంచి ఇంఫాక్ట్ ఇస్తుంది. డైలాగ్స్ బాగా పండాయి. భద్రం, దినేష్ పాత్రలు కామెడీతో నవ్వించారు. అన్నిటి క‌న్నా ఈ చిత్రానికి అసలు బలం సంగీతం. విజయ్ బుల్గానిన్, హరీష్ క‌లిసి ఇచ్చిన సాంగ్స్, BGM చాలా బాగున్నాయి. ఎమోషన్స్‌ను ఎలివేట్ చేశాయి. మొత్తంగా చూస్తే ఫస్ట్ హాఫ్‌లో కాస్త లాగ్ చేసిన‌ట్లు అనిపించినా సెకండాఫ్ ప‌క‌డ్భందీగా ఉండి సినిమాను నిల‌బెట్టింది.
రేటింగ్ 3/5