Divorce | నాలుగేళ్ల వైవాహిక బంధానికి ముగింపు.. విడాకులపై క్లారిటీ ఇచ్చిన బాలీవుడ్ ముద్దుగుమ్మ‌

Divorce | బాలీవుడ్ నటి మౌనీ రాయ్ తన భర్త సూర‌జ్ నంబియార్ నుంచి విడిపోతున్నట్లు అధికారికంగా ప్రకటించడంతో సినీ వర్గాల్లో చర్చ మొదలైంది. గత కొద్ది రోజులుగా వీరి విడాకులపై సోషల్ మీడియాలో పుకార్లు వినిపిస్తుండగా, తాజాగా ఈ జంట సంయుక్త ప్రకటన విడుదల చేసి తమ నిర్ణయాన్ని వెల్లడించింది.

Divorce | బాలీవుడ్ నటి మౌనీ రాయ్ తన భర్త సూర‌జ్ నంబియార్ నుంచి విడిపోతున్నట్లు అధికారికంగా ప్రకటించడంతో సినీ వర్గాల్లో చర్చ మొదలైంది. గత కొద్ది రోజులుగా వీరి విడాకులపై సోషల్ మీడియాలో పుకార్లు వినిపిస్తుండగా, తాజాగా ఈ జంట సంయుక్త ప్రకటన విడుదల చేసి తమ నిర్ణయాన్ని వెల్లడించింది.

గ్లామర్ ప్రపంచంలో సెలబ్రిటీల వ్యక్తిగత జీవితం తరచుగా వార్తల్లో నిలుస్తూనే ఉంటుంది. ముఖ్యంగా గత కొన్ని సంవత్సరాలుగా సినీ పరిశ్రమలో విడాకుల ఘటనలు పెరుగుతున్నాయనే చర్చ నడుస్తోంది. ఇదే సమయంలో మౌనీ రాయ్ – సూరజ్ నంబియార్ జంట విడిపోతున్నట్లు ప్రకటించడం అభిమానులను ఆశ్చర్యానికి గురిచేసింది.

ప‌ర‌స్ప‌ర గౌర‌వంతో విడిపోతున్నాం..

నాలుగేళ్లుగా వైవాహిక జీవితాన్ని కొనసాగిస్తున్న ఈ జంట సోషల్ మీడియాలో ఒకరినొకరు అన్‌ఫాలో చేసుకోవడంతో మొదట విడాకుల వార్తలు బయటకు వచ్చాయి. ఆ తర్వాత మౌనీ సంపాదనను సూరజ్ వాడుకున్నాడని, ఆమెను మోసం చేశాడని కొన్ని కథనాలు ప్రచారంలోకి వచ్చాయి. అయితే ఈ వార్తలను ఇద్దరూ తీవ్రంగా ఖండించారు.

తమ సంబంధంపై వస్తున్న వార్తల్లో ఎలాంటి నిజం లేదని, కేవలం సంచలనం కోసం కల్పిత కథనాలు ప్రచారం చేస్తున్నారని వారు అసహనం వ్యక్తం చేశారు. అనంతరం విడుదల చేసిన సంయుక్త ప్రకటనలో తాము పరస్పర గౌరవంతో విడిపోవాలని నిర్ణయించుకున్నట్లు తెలిపారు.

గోప్య‌తని గౌర‌వించాలి..

మా వ్యక్తిగత ప్రాధాన్యతలు మారుతున్న ఈ సమయంలో పరస్పర అవగాహనతో ఈ నిర్ణయం తీసుకున్నాం. భవిష్యత్తులో మంచి స్నేహితులుగా కొనసాగుతాం” అని వారు పేర్కొన్నారు. అలాగే ఈ క్లిష్ట సమయంలో తమ గోప్యతను గౌరవించాలని మీడియా, అభిమానులను కోరారు.

తమ వ్యక్తిగత జీవితాన్ని ఆధారంగా చేసుకుని అసత్య ప్రచారాలు చేయడం సరైంది కాదని ఈ జంట స్పష్టం చేసింది. విడాకుల ప్రక్రియను ప్రశాంతంగా, సామరస్యపూర్వకంగా ముగించుకోవడానికి కొంత సమయం అవసరమని పేర్కొన్నారు.

సెలబ్రిటీల వ్యక్తిగత జీవితాలు తరచుగా ప్రజల దృష్టిలో ఉంటాయి. అయితే అలాంటి సందర్భాల్లో వారి నిర్ణయాలను గౌరవించడం కూడా సమాజ బాధ్యతేనని పలువురు అభిప్రాయపడుతున్నారు. మౌనీ రాయ్ – సూరజ్ నంబియార్ విడాకుల ప్రకటనతో గత కొన్ని రోజులుగా వస్తున్న పుకార్లకు పూర్తి స్థాయిలో తెరపడినట్లైంది. ఇకపై ఇద్దరూ తమ తమ కెరీర్‌లపై దృష్టి పెట్టి వ్యక్తిగత జీవితంలో ప్రశాంతతను కోరుకుంటున్నట్లు సన్నిహిత వర్గాలు చెబుతున్నాయి.