Yahya Sinwar | హమాస్​ అధినేత యాహ్యా సిన్వర్​ను తుదముట్టించాం : ఇజ్రాయెల్​

ఇజ్రాయెల్​ – హమాస్​ పోరాటంలో హమాస్​కు గట్టి ఎదురుదెబ్బ తగిలింది. నిన్న జరిగిన బాంబు దాడిలో హమాస్​ అధినేత యాహ్యా సిన్వర్(Yahya Sinwar)​ హతమైనట్లు ఇజ్రాయెల్​ డిఫెన్స్​ ఫోర్స్​(IDF) ధృవీకరించింది.

హమాస్​(Hamas) సంస్థ తన అధినాయకుడిని కోల్పోయింది. ఇజ్రాయెల్​ (Israel)భూతల పోరాటంలో భాగంగా ఒక భవంతిపై దాడి చేసినప్పుడు ముగ్గురు తీవ్రవాదులు మరణించారని తొలుత ప్రకటించిన ఐడిఎఫ్​కు తర్వాత అందులో ఒకరు సిన్వర్​ కావొచ్చేమోనన్న అనుమానం రావడంతో డిఎన్​ఏ(DNA) పరీక్షలు నిర్వహించారు. దాంతో చనిపోయింది యాహ్యా సిన్వరేనని ఇజ్రాయెల్​ ధృవీకరించింది.

దాదాపు 1200 మంది ఇజ్రాయెల్​ పౌరులను బలి తీసుకున్న అక్టోబర్ 2023 ​ ఊచకోత(7/10 Massacre)కు ప్రధాన సూత్రధారి, 250 మంది ఇజ్రాయెల్​ పౌరులను ఇంకా బందీలుగా ఉంచుకున్న హమాస్​ చీఫ్​ యాహ్యా సిన్వర్(61)​ను తాము హతమార్చగలిగామని ఇజ్రాయెల్​ డిఫెన్స్​ ఫోర్స్​ ప్రకటించింది. ఐడిఎఫ్​ ప్రధానాధికారి లెఫ్టినెంట్ కల్నల్​ హెర్జీ హలేవీ(Lt. Col. Herzi Halevi) మాట్లాడుతూ, గాజా స్ట్రిప్​(Gaza Strip)లో నిన్న జరిగిన ఘర్షణల్లో ఏడాది నుంచీ తమ దళాలు వెతుకుతున్న హమాస్​ ఉగ్రవాద సంస్థ నాయకుడు యాహ్యా సిన్వర్​ను తన దళాలు మట్టుపెట్టాయని, తాను సిన్వర్​ను హతమార్చిన తమ యుద్ధవీరులను ఇంతకుముందే కలిసి అభినందించానని తెలిపారు.

అంతకుముందు తాము గాజా స్ట్రిప్​లో ఓ ఆపరేషన్​ సందర్భంగా ముగ్గురు తీవ్రవాదులను హతమార్చామని ప్రకటించిన ఐడిఎఫ్​, అందులో ఒకరిని యాహ్యాగా అనుమానించి దర్యాప్తు చేస్తున్నట్లు ప్రకటించింది.

కొద్ది గంటల తర్వాత యాహ్యా సిన్వర్​ మరణాన్ని ఐడిఎఫ్​ ధృవీకరించింది. తమ దళాలు ఎంతో చాకచక్యంతో, నిబద్ధతతో పనిచేస్తారని, వారికి అక్కడ యాహ్యా ఉన్నట్లు తెలియకపోయినా, ముగ్గురు తీవ్రవాదులను మట్టుపెట్టడంలో ఎంతో నైపుణ్యాన్ని ప్రదర్శించారని కొనియాడిన హలేవి, ఇక యాహ్యా సిన్వర్​ లేని ప్రపంచం బాగుంటుందని తెలిపారు.

ఈ ఏడాది జులైలో ఇరాన్​(Iran) కొత్త అధ్యక్షుడి ప్రమాణస్వీకారంలో పాల్గొన్న అప్పటి హమాస్​ అధినేత ఇస్మాయిల్​ హనియా(Ismail Haniyeh)ను హతమార్చిన తర్వాత ఆయన స్థానంలో సిన్వర్​ హమాస్​ అధినేతగా బాధ్యతలు స్వీకరించాడు.