Family Suicide In Car: రోడ్డు పక్కన ఆగి ఉన్న కారులోనే ఓ కుటుంబం ఆత్మహత్యకు పాల్పడిన ఘటన కలకలం రేపింది. హర్యానాలోని పంచకులలోపార్కింగ్ చేసిన కారులో ఒకే కుటుంబానికి చెందిన ఏడుగురు ఆత్మహత్యకు పాల్పడటం సంచలనం రేపింది. డెహ్రాదూన్‌కు చెందిన ప్రవీణ్ మిట్టల్ తన కుటుంబంతో కలిసి బాగేశ్వర్ బాబాగా ప్రచారంలో ఉన్న ధీరేంద్ర కృష్ణ శాస్త్రి నిర్వహించిన ఆధ్యాత్మిక కార్యక్రమానికి హాజరై..తిరిగి వెళ్లే సమయంలో కారులోనే విషం తాగి ఆత్మహత్యకు పాల్పడ్డారు.
స్థానికుల కథనం మేరకు సోమవారం రాత్రి ఓ కారు వెనుకన మరో కారు పార్క్ చేసి ఉండడం గమనించిన స్థానికుడు ఆ కారు వద్ధకు వెళ్లాడు. కారు పక్కన దారిలో ఓ వ్యక్తి కూర్చోని ఉండటాన్ని గమనించిన స్థానికుడు అతడిని కారు ఇక్కడ ఎందుకు పార్క్ చేశావని ప్రశ్నించాడు. న పేరు ప్రవీణ్ మిట్టల్ అని.. బాగేశ్వర్ ధామ్‌ నుంచి తిరిగి వెళ్తున్నామని..రాత్రి ఉండడానికి హోటల్‌లో రూమ్‌ దొరక్కపోవడంతో అక్కడ ఆగినట్లు తెలిపాడు. అయితే కారును అక్కడి నుంచి మరో చోట పార్కు చేసుకోవాలని సూచించి అక్కడి నుంచి ..అతడు వెళ్తున్న క్రమంలో కారులో ఉన్న వారు అచేతనంగా పడి ఉండడాన్ని గమనించాడు. దీంతో స్థానికుడి ప్రవీణ్ మిట్టల్ ను నిలదీయగా తమ కుటుంబ సభ్యులందరూ ఆత్మహత్య చేసుకున్నారని.. తానూ ఐదు నిమిషాల్లో చనిపోతానని చెప్పడంతో ఖంగుతిన్న స్థానికులు వెంటనే పోలీసులకు సమాచారం ఇచ్చారు. ఆ వెంటనే వారిని ఆస్పత్రికి తరలించారు. అప్పటికే ఆరుగురు మృతి చెందగా..చికిత్స పొందుతూ ప్రవీణ్ మిట్టల్ కూడా ప్రాణాలు వదిలాడు.
సామూహిక ఆత్మహత్యల సమాచారం అందుకున్న పోలీసులు ఘటనా స్థలానికి చేరుకొని.. మృతదేహాలను పోస్టుమార్టానికి తరలించారు. పంచకుల డీసీపీ హిమాద్రి కౌశిక్ మాట్లాడుతూ.. మృతులను డెహ్రాదూన్‌కు చెందిన ప్రవీణ్ మిట్టల్, అతడి తల్లిదండ్రులు, భార్య, ఇద్దరు కుమార్తెలు, కుమారుడిగా గుర్తించినట్లు తెలిపారు. కుటుంబం మొత్తం విషం తీసుకొని ఆత్మహత్య చేసుకొని ఉంటారన్నారు. కారు నుంచి సూసైడ్ నోట్‌ను స్వాధీనం చేసుకున్నామని.. కుటుంబానికి సుమారు 20 కోట్ల మేరకు అప్పులు, తీవ్ర ఆర్థిక ఇబ్బందులు ఉండటంతోనే ఆత్మహత్యకు పాల్పడుతున్నట్లు అందులో ఉందని వెల్లడించారు. మిట్టల్.. హిమాచల్ ప్రదేశ్ లో ఒక తుక్కు ఫ్యాక్టరీ నిర్వహించేవారు. అయితే.. అది నష్టాల్లో పడిపోయి.. అప్పులు పెరిగిపోయాయని, దానితో బ్యాంకు అధికారులు దానిని సీజ్ చేశారని తెలుస్తున్నది.