Roti vs Rice | అన్నమా – చపాతీలా? ఏది బెస్ట్​.?

మన ఆహారంలో అన్నం, రొట్టె రెండూ ముఖ్యమైనవే. ఏది మేలనే వివాదం చాలాకాలంగా కొనసాగుతోంది. అసలు పోషక విలువలు, ప్రయోజనాలు, తేడాలు, ఏది ఎంత తినాలి, ఎప్పుడు తినాలి.? పగలేంటి.. రాత్రేంటి? అనేదే ఈ కథనం

Roti vs Rice for Weight, Digestion and Nutrition – What Should You Choose?

(విధాత ఆరోగ్యం డెస్క్​, హైదరాబాద్​)

Roti vs Rice | మన తెలుగువారికి అన్నం లేకపోతే భోజనం చేసినట్టుండదు. వేడివేడి అన్నంలో ముద్దపప్పు, ఆవకాయ, చెంచాడు నెయ్యి వేసుకుని ఓ ముద్ద నోట్లో పెట్టుకుంటే… అబ్బో..ఆ రుచి చెప్పనలవికాదు. ఇక నాన్​ వెజ్​ అయితే, చికెన్​ కర్రీ, చేపల పులుసు, వేడి అన్నం.. ఈ కాంబినేషన్​ కూడా అదిరిపోతుంది. ఆఖరికి గడ్డ పెరుగుతో ఫినిషింగ్​ టచ్​ ఇస్తే, ఆపూటకి సంతృప్తికరమైన భోజనం సంపూర్ణం.

అయితే, ఈమధ్య అన్నం ప్రమాదమనీ, రొట్టెలు ప్రమోదమని, అన్నం తింటే లావైపోతారనీ బాగా పాపులరయి, ఇష్టం ఉన్నా లేకపోయినా, గోధుమ రొట్టెలు(అవి కూడా నిప్పుల మీద కాల్చినవి – పుల్కాలు), జొన్నరొట్టెలని తింటున్నారు. నిజానికి అవి కూడా చాలా మంచివే అయినా, వరి అన్నం శత్రువైతే కాదు.

మన భారతదేశ ఆహారంలో అన్నం మరియు రొట్టెలు ప్రముఖ స్థానంలో ఉంటాయి. ఏ కుటుంబ భోజనంలో అయినా, ఈ రెండింటిలో ఏదో ఒకటి తప్పక కనిపిస్తుంది. అయితే బరువు తగ్గాలని నిర్ణయించుకున్నప్పుడు ఎక్కువగా వినిపించే మొదటి సూచన అన్నం తగ్గించమని. ఇదే సమయంలో కొందరు రొట్టెలు మాత్రమే ఆరోగ్యానికి మంచిదంటూ అభిప్రాయం వ్యక్తం చేస్తారు. మరికొందరు అన్నం తేలికగా జీర్ణమవుతుందని, అన్నం ఆహారంలో ఉండాల్సిందేనని అంటారు. అంతేకాదు, చాలామంది అన్నం వల్ల బరువు పెరుగుతుందని భావిస్తారు. కానీ బియ్యం, గోధుమలు, జొన్నలు.. అన్నీ శరీరానికి శక్తినిచ్చే ధాన్యాలే. అందువల్ల ఏది ఎలా తీసుకోవాలో, ఎంత మోతాదులో తినాలో తెలుసుకోవడం ముఖ్యం.

అన్నం–చపాతీ: పదార్థం ఒకటే, ప్రభావం మాత్రం వేరే

రొట్టెలు గోధుమతో తయారవుతాయి. గోధుమలో పీచుపదార్థం ఎక్కువగా ఉండటం వల్ల తిన్న తర్వాత ఎక్కువసేపు ఆకలనిపించదు. ఇది బరువు నియంత్రణలో కొంతమేర సహాయపడుతుంది. ఈ కారణంగా కొందరు రొట్టెను మంచిదని భావిస్తారు. శరీరానికి అవసరమైన కొన్ని ఖనిజాలు, potassium, magnesium, protein, calcium కూడా చపాతీలో ఉంటాయి. అయితే చపాతీ జీర్ణమవడం కొంత ఆలస్యమవుతుంది. కడుపు భారంగా అనిపించే అవకాశముంది. ఆపైన అసిడిటీ వంటి సమస్యలు ఉన్నవారికి ఇది అనుకూలం కాకపోవచ్చు.
మరోవైపు అన్నం అరగడం సులభం. అందులో ఉండే స్టార్చ్​ వల్ల ముఖ్యంగా పిల్లలు, వృద్ధులు, కడుపు సంబంధిత సమస్యలు ఉన్నవారికి అన్నం తినడం సౌకర్యంగా ఉంటుంది. అన్నంలో ఫోలేట్ (Folate)అనే పోషకం ఎక్కువగా ఉంటుంది. ఇది శరీర కణాల నిర్మాణానికి అవసరమైన మూలపదార్థం. కాబట్టి అన్నం కూడా అవసరమే.

ఈ క్రింద బియ్యం, గోధుమల్లో ఉండే విటమిన్​లు, ఖనిజాల పరిమాణం వివరాలు ఇస్తున్నాము. మీరే ఒకసారి చూడండి.

రెండింటిలో ఉష్ణశక్తి విలువ దాదాపు సమానం. రెండు రకాల భోజనాలు కూడా శరీరానికి శక్తినిస్తాయి. కానీ శక్తి విడుదల విధానం, జీర్ణ ప్రక్రియ వేగం మాత్రం వేర్వేరు. రొట్టె ఎక్కువసేపు ఆకలి కానివ్వదు. అన్నం వెంటనే జీర్ణమవుతుంది. అందుకని ఒకటి మంచిది, ఇంకొకటి చెడ్డది అనడం సరైందికాదు.

ముఖ్యమైన విషయం, పరిమాణం — ఎంత తింటే మనకు చాలన్నదే తెలుసుకోవాలి.

 సరైన పరిమాణం — నిజమైన పరిష్కారం

ఎవరైనా పళ్లెం నిండా అన్నం తింటే బరువు పెరగడం సహజం. అదే విధంగా మూడు రొట్టెల కన్నా ఎక్కువ  తిన్నా శరీరానికి భారమే. కాబట్టి ధాన్యం కాదు, ఎంత అనేదే సమస్య. రోజువారీ భోజనంలో ఒక చిన్న ముద్ద అన్నం, పక్కన రెండు పలుచని రొట్టెలకు తోడు పప్పు, కూర, పెరుగు, సలాడ్ — ఇలా తీసుకుంటే శరీరానికి కావలసిన శక్తి, పీచుపదార్థం, ఖనిజాలు సమతుల్యంగా లభిస్తాయి. మనకు సాధారణంగా అన్నం, రొట్టెలు రెండూ చేసుకోవాలంటే కష్టమే. ఏదైనా ఒకటి చేసుకున్నా పరవాలేదు.

మధుమేహం ఉన్నవారు అన్నం పరిమాణం తగ్గించి రొట్టె వంతు పెంచుకోవచ్చు. అసిడిటీ ఉన్నవారు రొట్టెలు తగ్గించి అన్నం తినొచ్చు. ప్రతి శరీరం ప్రతిస్పందన వేరుగా ఉంటుంది. అందుకే ఒకే విధమైన ఆహారం అందరికీ సరిపోదు. జీవనశైలి, నడక, శ్రమ, దినచర్య సక్రమంగా ఉంటే రెండు ధాన్యాలూ ఆరోగ్యానికి తోడ్పడతాయి. మన పెద్దలు చేసినట్లే భోజనంలో అన్నం, రొట్టెలు రెండూ ఉండడం ఉత్తమం. ఏ ఆహారమూ శత్రువు కాదు. అధికమే శత్రువు. నియంత్రణే మందు. లంచ్​లో అన్నం తిని, రాత్రి రొట్టెలు తింటే బెటర్​.. అని చాలామంది అభిప్రాయం. అవి గోధుమరొట్టెలైనా, జొన్నరొట్టెలైనా పరవాలేదు. రెండు మాత్రమే తినండి.

అన్నమా, రొట్టెలా..? విజేత ఎవరూ అని ఆలోచించాల్సిన అవసరం లేదు. ఈ రెండింటిలో ఏదీ వదిలేయొద్దు. పరిస్థితి లేదు. రెండు కూడా శరీరానికి తమ తమ ప్రాముఖ్యతలతో ప్రయోజనం పంచుతాయి. నిజమైన విజయం ఆరోగ్యానిదే. దానికోసం సరిపడే ఆహారం, సరైన పరిమాణం ముఖ్యం.