WPL 2026 Auction : డబ్ల్యుపీఎల్ లో భారత మహిళల క్రికెటర్లకు కోట్ల సొమ్ము!

మహిళల ప్రీమియర్ లీగ్ (WPL 2026) నాలుగో సీజన్ మెగా వేలంలో భారత మహిళల క్రికెటర్లకు భారీ ధర పలికింది.

న్యూఢిల్లీ : మహిళల ప్రీమియర్ లీగ్ (WPL 2026) నాలుగో సీజన్ జనవరి 9నుంచి ఫిబ్రవరి 5వరకు కొనసాగున్న నేపథ్యంలో గురువారం ఢిల్లోలో మెగా వేలం కొనసాగుతుంది. డబ్ల్యూపీఎల్ మెగా వేలంలో ఇటీవల మహిళల వన్డే క్రికెట్ వరల్డ్ కప్ గెలిచిన భారత మహిళా క్రికెటర్లను ఫ్రాంచైజీలు కోట్ల రూపాయల ధరకు కొనుగోలు చేస్తుండటం ఆసక్తికరంగా మారింది. ప్రపంచ కప్ ఫైనల్ మ్యాచ్ లో బ్యాట్ తో బంతితో అదరగొట్టిన దీప్తి శర్మను యూపీవారియర్స్‌ రూ.3.20 కోట్లకు తన జట్టులోకి తీసుకుంది. తెలుగు అమ్మాయి శ్రీచరణిని ఢిల్లీ క్యాపిటల్స్ రూ.1.20కోట్లకు దక్కించుకుంది. క్రాంతి గౌడ్ తిరిగి యూపీకి ఆడనున్నారు. ఆర్‌టీఎమ్ కార్డు ఉపయోగించి రూ.50 లక్షలకు యూపీ జట్టులోకి తీసుకున్నారు. ఈ వేలంలో మొత్తం 277 మంది ప్లేయర్లు అందుబాటులో ఉన్నారు. వీరిలో 194 మంది భారత క్రికెటర్లు కాగా.. 83 మంది విదేశీ ప్లేయర్లు. అన్ని జట్లలో కలిపి 73 స్లాట్లు ఖాళీగా ఉన్నాయి. ఇందులో విదేశీ ప్లేయర్ల స్లాట్‌లు 23. డబ్ల్యూపీల్ తొలి మెగా ఆక్షన్‌ను మల్లికా సాగర్‌ నిర్వహించారు.

దీప్తిశర్మ కోసం పోటీ పడిన ఢిల్లీ క్యాపిటల్స్…యూపి వారియర్స్

దీప్తిశర్మ కోసం డిల్లీ క్యాపిటల్స్‌ పోటీ పడగా.. ‘ఆర్‌టీఎం’ కార్డ్‌ ఉపయోగించి యూపీ ఏకంగా రూ.3.20కోట్లతో ఆమెను జట్టులోకి తీసుకుంది. గత ఏడాది జరిగిన డబ్ల్యూపీఎల్ లో యూపీ జట్టుకు దీప్తి శర్మ కెప్టెన్‌గా వ్యవహరించింది. అయితే, మెగా వేలానికి ముందు ఈ జట్టు దీప్తిని రిటైన్‌ చేసుకోలేదు. దీంతో గురువారం జరిగిన వేలంలో తొలి సెట్‌లో దీప్తి శర్మను కనీస ధర రూ.50లక్షలకు తీసుకునేందుకు డిల్లీ క్యాపిటల్స్‌ ఆసక్తి చూపించింది. ఆ సమయంలో గతంలో ఒక జట్టుకు ఆడిన క్రీడాకారులను మళ్లీ వేలంలో దక్కించుకునేందుకు ఫ్రాంఛైజీలకు ఉండే సదుపాయం ‘రైట్‌ టు మ్యాచ్‌ (ఆర్‌టీఎం)’ అవకాశాన్ని యూపీ వారియర్స్‌ వినియోగించుకుంది. దీంతో ఢిల్లీ క్యాపిటల్స్ తన బిడ్‌ను రూ.3.20 కోట్లకు పెంచేసింది. అదే ధరకు యూపీ వారియర్స్ అంగీకరించి దీప్తి శర్మను దక్కించుకుంది. గతంలో స్మృతి మందనాను బెంగళూరు జట్టు రూ.3.4కోట్లకు కొనుగోలు చేసింది. ఆమె తర్వాతా దీప్తి శర్మదే అధిక ధర కావడం విశేషం.

ఇప్పటివరకు కొనుగోలు పూర్తయిన క్రికెటర్ల ధరలు

డబ్ల్యూపీఎల్‌ 2026 వేలంలో ఇప్పటివరకు న్యూజిలాండ్ ప్లేయర్ సోఫీ డివైన్‌ ను రూ.2 కోట్లకు గుజరాత్‌ జెయింట్స్‌, అదే దేశానికి చెంిన ఆల్‌రౌండర్ అమేలియా కెర్‌ను రూ.3 కోట్లతో ముంబయి ఇండియన్స్‌లోకి తిరిగి తీసుకున్నారు. భారత పేసర్ రేణుకాసింగ్ ను రూ.60 లక్షలకు గుజరాత్ జెయింట్స్‌ టీమ్‌లోకి తీసుకున్నారు. ఇంగ్లాండ్ ప్లేయర్ సోఫీ ఎకిల్‌స్టోన్‌ ను ఆర్టీఎం ద్వారా యూపీవారియర్స్ రూ.85లక్షలకు దక్కించుకుంది. అస్ట్రేలియా ప్లేయర్ మెగ్‌ లానింగ్‌ ను యూపీ వారియర్స్ రూ.1.90 కోట్లు సొంతం చేసుకుంది. అమెలియా కెర్‌ ను ముంబై ఇండియన్స్ రూ.3 కోట్లకు, ఫోబ్ లిచ్ ఫీల్డును 1.20 కోట్లకు యూపీ వారియర్స్ జట్టులోకి తీసుకున్నారు. సఫారీ క్రికెటర్ లారా వొల్వార్డ్‌ ను ఢిల్లీ క్యాపిటల్ రూ.1.10కోట్లకు, స్పిన్నర్ ఆశా శోభనను రూ.1.1 కోట్లతో యూపీ వారియర్స్ జట్టులోకి తీసుకున్నారు. ప్రస్తుతం వేలం కొనసాగుతుంది.