Ride in Presidential Limousines | అధ్యక్ష వాహనాలలో ప్రయాణం ‌‌– అరుదైన గౌరవాన్ని పొందిన భారత ప్రధాని మోదీ

మోడీ SCO సమ్మిట్‌లో చైనా, రష్యా అధ్యక్షుల వాహనాలు హోంగ్‌చీ L5, ఔరస్ సెనాట్‌లో ప్రయాణించారు. ఆ రెండు దేశాల గౌరవ ప్రతిష్టలకు ప్రతీకలైన ఈ రెండు కార్లలో ప్రధాని మోదీ ప్రయాణించడం భారత్​కు చైనా, రష్యాలు ఇచ్చిన గౌరవానికి ప్రతిబింబం.

చైనా, రష్యా లాంటి శక్తివంతమైన దేశాలు తమ అధినేతలకు ప్రత్యేకంగా నిర్మించే లగ్జరీ లిమోజిన్లు కేవలం రవాణా వాహనాలు మాత్రమే కావు. అవి ఆ దేశం యొక్క సార్వభౌమాధికారం, గౌరవం, సాంకేతిక సామర్థ్యాన్ని ప్రతిబింబించే ప్రతీకలు. వీటిలో కూర్చునే వ్యక్తి కేవలం దేశాధినేత మాత్రమే కాదు, ఆ దేశ ప్రతిష్టను మోసుకెళ్తున్న ప్రతినిధి. అందుకే ప్రతి దేశం తమ జాతీయ ప్రతిష్టను ప్రదర్శించేందుకు ఈ వాహనాలను ప్రత్యేకంగా డిజైన్‌ చేసి తయారు చేస్తుంది.

ఇటీవల చైనాలో జరిగిన షాంఘై కోఆపరేషన్ ఆర్గనైజేషన్ (SCO) సమ్మిట్ సందర్భంగా భారత ప్రధాని నరేంద్ర మోడీ ప్రయాణించిన రెండు ప్రత్యేక కార్లు అంతర్జాతీయ దృష్టిని ఆకర్షించాయి. ఒకవైపు చైనాకు గర్వకారణమైన హోంగ్‌చీ L5 లిమోజిన్‌లో మోడీ ప్రయాణించడం, మరోవైపు రష్యా అధ్యక్షుడు వ్లాదిమిర్ పుతిన్‌తో కలిసి ఔరస్ సెనాత్​లో కూర్చోవడం కేవలం ప్రోటోకాల్ మాత్రమే కాదు. ఇవి అంతర్జాతీయ హుందాతనాన్ని ప్రతిబింబించే ప్రత్యేక సంకేతాలు.

హోంగ్‌చీ L5 చైనా “Made in China” గర్వాన్ని ప్రదర్శిస్తే, ఔరస్ సెనాట్ రష్యా భద్రతా సామర్థ్యాన్ని, సాంకేతిక నైపుణ్యాన్ని ప్రతిబింబిస్తుంది. ఈ రెండు కార్లు ఒకే వేదికపై భారత ప్రధాని ప్రయాణానికి వాహనాలవ్వడం ద్వారా, భారత్‌–చైనా–రష్యాల మధ్య ఏర్పడుతున్న స్నేహపూర్వక వాతావరణానికి నడుస్తున్న ప్రతినిధుల్లా నిలిచాయి.

🇨🇳 హోంగ్‌చీ L5 – చైనా గర్వం ‘రెడ్ ఫ్లాగ్’

1958లో ఫస్ట్ ఆటోమొబైల్ వర్క్స్ (FAW) ద్వారా ప్రారంభమైన హోంగ్‌చీ అంటే మాండరిన్‌లో “రెడ్ ఫ్లాగ్”. అప్పటి నుంచీ ఇది చైనీస్ కమ్యూనిస్టు నాయకుల ప్రతిష్టాత్మక వాహనంగా గుర్తింపు పొందింది. మావో జెడాంగ్‌ కాలంలో ఇవి పూర్తిగా చేతితో తయారు చేయబడ్డాయి.

ఆకర్షణీయమైన శరీరాకృతి

హోంగ్‌చీ L5 పొడవు 5.5 మీటర్లకుపైగా, బరువు 3 టన్నులు. ఇది కేవలం కారు కాదు, రహదారులపై రథంలా దూసుకుపోతుంది.

శక్తివంతమైన ఇంజిన్: 6.0 లీటర్ల V12 ఇంజిన్, 400+ హార్స్‌పవర్, 0–100 km/h వేగం: కేవలం 8.5 సెకన్లు

గరిష్ఠ వేగం: 210 km/h, ఈ బరువైన వాహనానికి ఇది నిజంగా అద్భుత వేగం.

అంతర్గత విలాసాలు: లోపలికి అడుగు పెట్టగానే ఇది సాధారణ కారు కాదని తెలుస్తుంది., వెచ్చని లెదర్ సీట్లు, వుడ్ ట్రిమ్స్, జేడ్ ఇన్లేస్ (చైనీస్ సంప్రదాయానికి గుర్తు), రియర్ సీట్లకు మసాజ్, హీటింగ్, వెంటిలేషన్ సౌకర్యాలు, ఎంటర్టైన్‌మెంట్ స్క్రీన్స్, భద్రతకు కంచుకోట

హోంగ్‌చీ L5ను నిజమైన కదిలే దుర్గంలా తయారు చేశారు.

బుల్లెట్ ప్రూఫ్ గ్లాస్, ఆర్మర్ ప్లేటింగ్, రన్-ఫ్లాట్ టైర్లు, 360° కెమెరా వ్యవస్థ, అడాప్టివ్ క్రూయిజ్ కంట్రోల్, పార్కింగ్ సెన్సార్లు

ఇది కేవలం వాహనం కాదు, ఒక గట్టి రక్షణ వలయం.

ధర & ప్రత్యేకత: ధర 5 మిలియన్ యువాన్‌ (₹7 కోట్లు). ఇది చైనాలో అత్యంత ఖరీదైన ప్రొడక్షన్ కారు. సాధారణ ప్రజలు కొనలేరు. కేవలం దేశాధినేతలు, అత్యున్నత ప్రతినిధులకే ఇది కేటాయించబడుతుంది.

🇷🇺 ఔరస్ సెనాట్ – రష్యా ‘క్రెమ్లిన్​ ఆన్ వీల్స్’

రష్యా అధ్యక్షుడు పుతిన్ తన నాలుగో ప్రమాణ స్వీకారం (2018)లో తొలిసారి ఉపయోగించిన ఈ కారు రష్యా స్వీయగౌరవానికి ప్రతీక. Kortezh Programmeలో భాగంగా నిర్మించిన ఈ లిమోజిన్‌ను చాలామంది “Russian Rolls-Royce”గా పిలుస్తారు.

ఇంజిన్ శక్తి: 4.4 లీటర్ల ట్విన్ టర్బో V8, 600 హార్స్‌పవర్, 0–100 km/h వేగం: కేవలం 6 సెకన్లు

గరిష్ఠ వేగం: 250 km/h, భవిష్యత్తులో V12 హైబ్రిడ్ వెర్షన్ కూడా సిద్ధమవుతోంది.

భద్రతా ఫీచర్లు: VR10 బాలిస్టిక్ స్టాండర్డ్ ఆర్మరింగ్ – ఆర్మర్ పియర్సింగ్ బుల్లెట్లను తట్టుకోగలదు, 6 సెం.మీ మందమైన గ్లాస్, గ్రెనేడ్ దాడులను, రసాయన దాడులను ఎదుర్కొనే సామర్థ్యం, ఫైర్ సప్రెషన్ సిస్టమ్, ఎమర్జెన్సీ ఎగ్జిట్స్, ఆక్సిజన్ సరఫరా వ్యవస్థ, కమాండ్ కమ్యూనికేషన్ సూట్

ఇది కేవలం ఒక లిమోజిన్ కాదు, ఒక పరుగెత్తే భద్రతా దుర్గం. ఈ రెండు కార్లలో మోడీ ప్రయాణం చేయడం అంటే చైనా, రష్యాలు భారత్‌ పట్ల చూపిన గౌరవ సూచకం. అంతర్జాతీయ వేదికపై ఒక దేశం తన అత్యున్నత అతిథిని ఎలా సత్కరిస్తుందో, ఎలా గౌరవిస్తుందో చెప్పే దౌత్య సందేశాలు ఇవి.