దక్షిణ భారత సినీ పరిశ్రమలో మరో విషాదం చోటుచేసుకుంది. ప్రముఖ తమిళ దర్శకుడు, నటుడు, కథా రచయిత కే. భాగ్యరాజ్ (K. Bhagyaraj) ఆదివారం ఉదయం కన్నుమూశారు. ఆయన మృతి వార్తతో సినీ ప్రముఖులు, అభిమానులు తీవ్ర దిగ్భ్రాంతికి గురయ్యారు. ఇటీవల ఆరోగ్య సమస్యలతో బాధపడుతున్న ఆయన తుదిశ్వాస విడిచినట్లు సమాచారం.
కృష్ణస్వామి భాగ్యరాజ్ తమిళ సినీ పరిశ్రమలో రచయితగా, దర్శకుడిగా, హీరోగా తనకంటూ ప్రత్యేక గుర్తింపు సంపాదించారు. సాధారణ కుటుంబ కథలు, హాస్యం, భావోద్వేగాలకు ప్రాధాన్యం ఇచ్చే చిత్రాలతో ప్రేక్షకుల మనసులు గెలుచుకున్నారు. దర్శకుడు భారతీరాజా వద్ద సహాయ దర్శకుడిగా సినీ ప్రయాణం ప్రారంభించిన ఆయన, అనంతరం స్వతంత్ర దర్శకుడిగా ఎన్నో విజయవంతమైన చిత్రాలను అందించారు.
‘అందా 7 నాట్కల్’, ‘ముందానై ముడిచ్చు’, ‘ఇంద్రు పోయ్ నాళై వా’, ‘చిన్న వీడు’, ‘ధావణి కనవుగల్’ వంటి చిత్రాలు ఆయనకు విశేష ఖ్యాతి తీసుకొచ్చాయి. నటుడిగా 75కు పైగా సినిమాల్లో నటించిన ఆయన, దర్శకుడిగా 25కు పైగా చిత్రాలను తెరకెక్కించారు. ఇటీవల విడుదలైన ’35 చిన్న కథ కాదు’, ‘కుబేర’ చిత్రాల్లో కూడా కీలక పాత్రల్లో కనిపించి ప్రేక్షకులను అలరించారు.
భాగ్యరాజ్ మృతి పట్ల సినీ, రాజకీయ ప్రముఖులు సంతాపం వ్యక్తం చేస్తున్నారు. ఆయన భౌతికకాయానికి అభిమానుల సందర్శన కోసం ఏర్పాట్లు చేస్తున్నట్లు తెలుస్తోంది. అంత్యక్రియలకు సంబంధించిన పూర్తి వివరాలు కుటుంబ సభ్యులు త్వరలో వెల్లడించనున్నారు.