WPL 2026 – MI vs UPW | లానింగ్–లిచ్‌ఫీల్డ్ మెరుపులతో ముంబైపై యూపీ మరో విజయం

లానింగ్–లిచ్‌ఫీల్డ్ అద్భుత భాగస్వామ్యం, షిఖా పాండే కీలక వికెట్లు, ముంబై పేలవ బ్యాటింగ్​తో యూపీ వారియర్స్ WPLలో ముంబై ఇండియన్స్​పై వరుసగా రెండో విజయం సాధించారు. 187 పరుగుల లక్ష్యాన్ని ఛేదించడంలో ముంబై విఫలమై 22 పరుగుల తేడాతో ఓడిపోయింది.

WPL 2026: Lanning–Litchfield Shine as UPW Beat MI Again

విధాత క్రీడా విభాగం | 17 జనవరి 2026 | హైదరాబాద్:

WPL 2026 – MI vs UPW | నవీ ముంబయిలో జరిగిన WPL మ్యాచ్‌లో యూపీ వారియర్స్ ముంబై ఇండియన్స్‌పై మరోసారి ఆధిక్యం ప్రదర్శించింది. ముందుగా బ్యాటింగ్​ చేసిన యూపీ, తొలి ఓవర్‌లో కిరణ్ నవగిరే గోల్డెన్ డకౌట్​గా వెనుదిరిగినా, మెగ్ లానింగ్, ఫీబీ లిచ్‌ఫీల్డ్ జంట అండతో 187 పరుగులు చేసింది. ఫలితంగా ముంబై 165 పరుగులే చేసి యూపీ చేతిలో మరో పరాజయం మూటగట్టుకుంది.

మరోసారి తడబడిన ముంబై బ్యాటింగ్ : కేర్–అమన్‌జోత్​ పోరాటం వృథా

యూపీ విధించిన 188 పరుగుల లక్ష్యంతో చేధన ప్రారంభించిన ముంబై బ్యాటింగ్ ఈ మ్యాచ్‌లో కూడా పవర్‌ప్లేలో బలహీనంగానే కనిపించింది. సజనా, హేలీ మ్యాథ్యూస్‌ల కొత్త ఓపెనింగ్ జంట నిలబడలేకపోయింది. 23 పరుగుల జట్టు స్కోరు వద్ద ఇద్దరు ఓపెనర్లు డగౌట్​కు చేరుకున్నారు. MI 6 ఓవర్లలో  ముంబై కేవలం 38 పరుగులే చేయడం వారి బ్యాటింగ్​ బలహీనతకు ఉదాహరణ. సివర్​-బ్రంట్ బాగానే కనిపించినా షిఖా పాండే బౌలింగ్‌లో కవర్స్​లో లానింగ్ చేతికి క్యాచ్ ఇవ్వడంతో ముంబైపై ఒత్తిడి మరింత పెరిగింది. కేరీ, హర్మన్‌ప్రీత్ కూడా త్వరగానే ఔట్ కావడంతో కావాల్సిన రన్‌రేట్ భారీగా పెరిగింది. చివర్లో అమీలియా కేర్–అమన్‌జోత్​ జంట 83 పరుగుల భాగస్వామ్యంతో ఆశలు రేపినా, అవసరమైన రన్‌రేట్‌ను అందుకోవడం సాధ్యం కాలేదు. అమన్‌జోత్​ కొంత పోరాడినా, పాండే బౌలింగ్‌లో ఆమె కూడా ఔట్ కావడంతో ముంబై విజయానికి దూరమైంది. చివరకు నిర్ణీత 20 ఓవర్లలో ముంబై 6 వికెట్ల నష్టానికి165 పరుగులే చేసి పరాజయం పాలైంది.

లానింగ్, లిచ్​ఫీల్డ్​ల పట్టుదలతో గట్టి స్కోరు చేసిన యూపీ

అంతకుముందు టాస్​ ఓడిపోయి, బ్యాటింగ్​ చేపట్టిన యూపీ వారియర్స్​ మొదటి ఓవర్లోనే కిరణ్​ నవ్​గిరేను కోల్పోగా, కెప్టెన్​ లానింగ్, లిచ్​ఫీల్డ్​ దూకుడుతో గాడిలో పడింది. వీరిద్దరూ మూడో వికెట్​కు 119 పరుగుల భాగస్వామ్యం నమోదు చేశారు. లిచ్‌ఫీల్డ్ 37 బంతుల్లో 61, లానింగ్ 45 బంతుల్లో 70 పరుగులు చేసి వెంటవెంటనే అవుటైనా, హర్లీన్​ డియోల్​, క్లో ట్రయన్​ సహకారంతో యూపీ 8 వికెట్ల నష్టానికి 187 పరుగులు చేసి పోరాటానికి తగ్గ స్కోరు అందుకుంది. చివరిలో ముంబై బౌలర్లు పుంజుకున్నప్పటికీ అప్పటికే మంచి స్థానానికి చేరుకున్న యూపీని దెబ్బతీయలేకపోయారు.

టాస్​ ఓడినా, లానింగ్ నాయకత్వం, లిచ్‌ఫీల్డ్ దూకుడు, పాండే కీలక వికెట్లు వారియర్స్​ విజయానికి ప్రధాన కారణాలు కాగా, ముంబై ఇండియన్స్​ను మాత్రం  బ్యాటింగ్ సమస్యలు వెంటాడుతునే ఉన్నాయి.