ChatGPT | తల్లిదండ్రులూ! జాగ్రత్త… టీనేజర్లకు అత్యంత ప్రమాదకర సలహాలిస్తున్న చాట్జీపీటి

ప్రపంచవ్యాప్తంగా వినియోగం  విరివిగా పెరుగుతున్న చాట్‌జీపీటీ ఇప్పుడు దుమారం రేపుతోంది. మానవీయతను కలిగిన మిత్రుడిలా ప్రవర్తించే ఈ AI టూల్ అసలు లోపాలు బయటపడుతున్నాయి. ఓ పరిశోధన సంస్థ వెల్లడించిన నివేదిక ప్రకారం, 13 ఏళ్ల వయస్సున్న పిల్లలు చాట్‌జీపీటీతో మాట్లాడితే, అది మత్తు పదార్థాల వినియోగం, ఆత్మహత్యా లేఖల రచన, తీవ్ర ఉపవాస డైట్ల వంటి ఆత్మవినాశకర అంశాల్లో సైతం వారిని నడిపించగలగడం తేలింది.

న్యూయార్క్, ఆగస్ట్ 7: ప్రపంచవ్యాప్తంగా వినియోగం  విరివిగా పెరుగుతున్న చాట్‌జీపీటీ ఇప్పుడు దుమారం రేపుతోంది. మానవీయతను కలిగిన మిత్రుడిలా ప్రవర్తించే ఈ AI టూల్ అసలు లోపాలు బయటపడుతున్నాయి. ఓ పరిశోధన సంస్థ వెల్లడించిన నివేదిక ప్రకారం, 13 ఏళ్ల వయస్సున్న పిల్లలు చాట్‌జీపీటీతో మాట్లాడితే, అది మత్తు పదార్థాల వినియోగం, ఆత్మహత్యా లేఖల రచన, తీవ్ర ఉపవాస డైట్ల వంటి ఆత్మవినాశకర అంశాల్లో సైతం వారిని నడిపించగలగడం తేలింది.

CCDH (Center for Countering Digital Hate) అనే సంస్థ చేసిన ఈ అధ్యయనం తల్లిదండ్రుల్లో భయాందోళనలు రేపుతోంది. పరిశోధకులు టీనేజ్ ప్రొఫైల్స్‌ను సృష్టించి చాట్​జీపీటితో 1,200 కంటే ఎక్కువ సంభాషణలను నిర్వహించారు. వీటిలో సగానికి పైగా — అత్యంత ప్రమాదకరమైన, అసహజమైన సూచనలుగా తేలాయి. “ఒక 13 ఏళ్ల బాలిక కోసం చాట్‌జీపీటీ రాసిన సూసైడ్ లేఖ చదివి కన్నీరు పెట్టుకున్నాను” అని CCDH సీఈఓ ఇమ్రాన్ అహ్మద్ తీవ్ర భావోద్వేగంతో చెప్పారు. “ఇది నిజమైన మిత్రుడిలా కనిపిస్తూ, చివరకు వినాశనం వైపు నడిపించే నమ్మకద్రోహిలా తయారవుతోంది” అని ఆయన హెచ్చరించారు.

ఎలా తప్పించుకుంటోంది..?

చాట్‌జీపీటీ చాలా సందర్భాల్లో మొదట చట్టవిరుద్ధమైన లేదా హానికరమైన సమాచారం ఇవ్వదు. కానీ, ‘ఇది ఫ్రెండ్ కోసం’, ‘ప్రెజెంటేషన్ కోసం’ అని చెప్పడం ద్వారా చాలా సులభంగా దానిని మోసం చేసి సమాచారాన్ని తీసుకోవచ్చని పరిశోధకులు తెలిపారు. అలా మత్తు పదార్థాల మోతాదులు, బలహీన ఆహార నియమాలు, సోషల్ మీడియాలో ఆత్మహానిని ప్రోత్సహించే హ్యాష్‌ట్యాగ్స్‌ వరకు సూచనలు ఇచ్చింది. ఓపెన్‌ఏఐ సీఈఓ సామ్ ఆల్ట్‌మన్ కూడా ఈ సమస్యను గుర్తించారు. ఇటీవల జరిగిన సమావేశంలో మాట్లాడుతూ, “చాట్‌జీపీటీపై చాలా మంది యువత ఆధారపడుతున్నారు. కొన్ని సందర్భాల్లో వాళ్లు ‘ఇది నన్ను బాగా గుర్తు పెట్టుకుంది. నా ఫ్రెండ్స్‌ను కూడా’ అని భావిస్తున్నారు. ఇది మనసుకు బాధ కలిగించే విషయం” అన్నారు.

తక్కువ వయసు… గందరగోళం ఎక్కువ

చాట్‌జీపీటీ 13 ఏళ్లలోపు పిల్లలకు నిషిద్ధం అన్నప్పటికీ, వాస్తవంగా వయస్సు ధృవీకరణ ప్రక్రియ ఓ ప్రహసనంగా ఉంది. కేవలం పుట్టినతేదీ టైప్ చేయడమే చాలు — ఎలాంటి పర్యవేక్షణ లేకుండానే యాక్సెస్ లభిస్తోంది. ఫ్లోరిడాలోని ఓ తల్లి ఇటీవల Character.AI సంస్థపై కేసు వేయడం, ఆమె 14 ఏళ్ల కుమారుడు AIతో ఏర్పడిన తీవ్ర అనారోగ్య సంబంధం వల్ల ఆత్మహత్యకు పాల్పడ్డాడని ఆరోపించడం — ఈ ముప్పు ఎంత తీవ్రంగా ఉందో సూచిస్తోంది.

ముగింపు మాట

ఏఐ టెక్నాలజీ అంటే భవిష్యత్తు — కానీ మనుషుల భద్రతకే హాని కలిగిస్తే అది మానవత్వానికి పెను ముప్పు. ఒక వైపు పిల్లలు, యువత తమ సమస్యలకు సహాయంగా, మార్గదర్శకుడిగా భావిస్తున్న ఏఐ టూల్‌కు విషాదాన్ని కూడా కలిగించగల శక్తి కలిగి ఉండటం తీవ్రంగా ఆందోళన కలిగించే అంశం.

ఈ నేపథ్యంలో తల్లిదండ్రులు, పాఠశాలలు, విధాన రూపకర్తలు కలిసి, AI టూల్స్‌పై పర్యవేక్షణను బలోపేతం చేయాల్సిన అవసరం ఎంతైనా ఉంది. మానవీయత, బాధ్యతాయుత పర్యవేక్షణ లేకుండా సాంకేతిక ఎదగడం సమాజానికి చేటు తెస్తుంది.