డిజిటల్ జనగణనకు శ్రీకారం.. తెలంగాణలో మే 11 నుంచి తొలి దశ

తెలంగాణలో జనగణన-2027 పూర్తిగా డిజిటల్ విధానంలో నిర్వహించేందుకు ప్రభుత్వం సిద్ధమైంది. మే 11 నుంచి తొలి దశ ప్రారంభమవుతుండగా, పౌరులకు స్వయంగా వివరాలు నమోదు చేసుకునే అవకాశం కల్పించడం ఈసారి ప్రత్యేకత.

మే 11 నుంచి తెలంగాణలో ప్రారంభమవుతున్న డిజిటల్ జనగణన

Census Goes Digital: Telangana Starts Phase 1 from May 11

ఆధునిక సాంకేతికతను అందిపుచ్చుకున్న జనగణన

దేశంలో ప్రతి పది సంవత్సరాలకు ఒకసారి నిర్వహించే జనగణన ప్రక్రియలో ఈసారి కీలక మార్పు చోటుచేసుకోనుంది. ఇప్పటివరకు పేపర్‌ ఆధారంగా నిర్వహించిన ఈ విస్తృత సర్వే ఇక రూపు మార్చుకోనుంది. 2027 జనగణన పూర్తిగా డిజిటల్ విధానంలో నిర్వహించేందుకు కేంద్ర ప్రభుత్వం నిర్ణయించింది. తెలంగాణలో ఈ ప్రక్రియకు సంబంధించిన తొలి దశ మే 11 నుంచి జూన్ 9 వరకు జరగనుంది. హైదరాబాద్‌లో నిర్వహించిన సమావేశంలో జనగణన డైరెక్టర్ భారతి హొలికేరి మాట్లాడుతూ, 2011 వరకు పేపర్ ఫారంల ద్వారానే సమాచార సేకరణ జరిగిందని, ఈసారి మాత్రం యాప్‌లు, ఆన్​లైన్​  పోర్టల్‌ల సహాయంతో ఆధునిక పద్ధతిలో వివరాలు నమోదు చేయనున్నట్లు తెలిపారు. ఇది భారత జనగణన చరిత్రలోనే అతి పెద్ద మలుపుగా భావిస్తున్నారు.

రెండు దశల్లో విస్తృత కార్యాచరణ

పేపర్ ఆధారిత జనగణన నుంచి డిజిటల్ విధానానికి మారుతున్న భారత గణన ప్రక్రియ

జనగణనను రెండు దశల్లో నిర్వహించనున్నారు. తొలి దశలో గృహ గణన చేపట్టి, ఇళ్ల నిర్మాణం, సౌకర్యాలు, నివాస పరిస్థితులు వంటి అంశాలను నమోదు చేస్తారు. ఈ దశ మే 11 నుంచి జూన్ 9 వరకు జరుగుతుంది. రెండో దశలో 2027 ఫిబ్రవరిలో జనాభా వివరాలు సేకరిస్తారు. కుటుంబ సభ్యుల సంఖ్య, విద్య, వృత్తి, కుల సమాచారం వంటి వివరాలు ఈ దశలో నమోదు చేస్తారు. దేశవ్యాప్తంగా 33 ప్రశ్నలు కలిగిన ఒకే ప్రశ్నాపత్రం ఉంటుంది.

పౌరులే స్వయంగా నమోదు అవకాశం

ఈసారి ప్రత్యేకంగా ప్రజలకు స్వయంగా తమ వివరాలు నమోదు చేసుకునే అవకాశం కల్పించారు. ఏప్రిల్ 16 నుంచి మే 10 వరకు అందుబాటులో ఉండే సెల్ఫ్-ఎన్యుమరేషన్ పోర్టల్ ద్వారా కుటుంబ వివరాలను నేరుగా నమోదు చేయవచ్చు. అనంతరం ఎన్యూమరేటర్లు ఆ వివరాలను ధృవీకరిస్తారు. సెన్సస్ మేనేజ్‌మెంట్ మానిటరింగ్ సిస్టమ్ (CMMS), HLO యాప్ వంటి డిజిటల్ సాధనాల ద్వారా ప్రతి ఇంటి వివరాలు సేకరించబడతాయి. ఇది వేగవంతమైన, ఖచ్చితమైన సమాచార సేకరణకు దోహదపడనుంది.

భద్రత, పర్యవేక్షణకు ప్రాధాన్యం

గ్రామాల్లో ఇంటింటికీ వెళ్లి డిజిటల్ పద్ధతిలో వివరాలు సేకరిస్తున్న ఎన్యూమరేటర్

డిజిటల్ విధానంలో సమాచార భద్రతకు అత్యంత ప్రాధాన్యం ఇస్తున్నారు. సేకరించిన సమాచారం ఎన్యూమరేటర్ల ఉపకరణాల్లో నిల్వ ఉండకుండా, అప్​లోడ్ చేసిన వెంటనే కేంద్ర సర్వర్లకు చేరుతుంది. దీనివల్ల సమాచారం లీకయ్యే అవకాశం ఉండదు. జనగణన చట్టం ప్రకారం వ్యక్తిగత వివరాల గోప్యతను కాపాడటం తప్పనిసరి. తెలంగాణలో ఈ ప్రక్రియను విజయవంతంగా నిర్వహించేందుకు సుమారు 88 వేల మంది సిబ్బంది పనిచేయనుండగా, దాదాపు 94 వేల మందికి శిక్షణ ఇవ్వబడింది. ప్రతి ప్రాంతాన్ని సూక్ష్మంగా విభజించి, ఒక్క ఇల్లు కూడా తప్పకుండా పర్యవేక్షణ కొనసాగుతుంది.