Kavitha Tweet : కేసీఆర్ పేరు లేకుండా కవిత దీక్షా దివస్ ట్వీట్

దీక్షా దివస్ పై ట్వీట్‌లో కేసీఆర్ పేరును ప్రస్తావించని కవిత.. “ఒక యోధుని దీక్ష” అంటూ చేసిన వ్యాఖ్య చర్చనీయాంశం.

Kavitha Tweet : కేసీఆర్ పేరు లేకుండా కవిత దీక్షా దివస్ ట్వీట్

విధాత, హైదరాబాద్ : తెలంగాణ రాష్ట్ర సాధన ఉద్యమంలో కేసీఆర్ నిరాహార దీక్ష చేపట్టిన నవంబర్ 29 దీక్షా దివస్ పురస్కరించుకుని తెలంగాణ జాగృతి అధ్యక్షురాలు, బీఆర్ఎస్ బహిష్కృత ఎమ్మెల్సీ కల్వకుంట్ల కవిత పెట్టిన ట్వీట్ చర్చనీయాంశమైంది. ఒక యోధుని దీక్ష..అమరుల త్యాగం యావత్ తెలంగాణ ..జాతికి మేలుకొలుపైంది, ఐక్యతా గీతమైంది..ఉద్యమ స్ఫూర్తిని నింపింది..తెలంగాణ ఉద్యమాన్ని విజయపథం వైపు నడిపింది !!!. రాష్ట్ర సాధనకు దారి దీపమైంది !!! భౌగోళిక తెలంగాణ సాధించాం !! సామాజిక తెలంగాణ సాధిస్తాం !! జై తెలంగాణ !! జై జై తెలంగాణ !! అంటూ కవిత ట్వీట్ చేసింది. కవిత తన ట్వీట్ లో కేసీఆర్ పేరు ప్రస్తావించకుండా ఒక యోధుని దీక్ష్ అని పేర్కొనడం చర్చనీయాంశమైంది.

కవిత తన చర్యతో తండ్రి కేసీఆర్ పేరు కూడా తియ్యడానికి ఇష్టపడటం లేదని..తన మనసులో మాట కవిత చెప్పకనే చెప్పారంటూ బీఆర్ఎస్ శ్రేణులు విమర్శిస్తున్నాయి. ”ఒక యోధుని దీక్ష” అంటూ ట్వీట్ పెట్టిన కవిత, ఆ యోధుని పేరు ఎందుకు రాయలేదు అని ప్రశ్నిస్తున్నారు. గతంలో కేసీఆర్ లేకపోతే తెలంగాణ లేదు అని చెప్పిన కవిత ఇప్పుడు మాత్రం ఆయన పేరును ఎత్తకపోవడం విడ్డూరమంటున్నారు.

బీఆర్ఎస్ నుంచి బహిష్కరించబడ్డాక కవిత తన సొంత రాజకీయ ఎజెండాతో ముందుకెలుతున్నారు. సామాజిక తెలంగాణ నినాదం వినిపిస్తున్నారు. ప్రస్తుతం జనం బాట పేరుతో జిల్లాల్లో పర్యటిస్తున్నారు. బీఆర్ఎస్ పదేళ్ల పాలనలో వైఫల్యాలను ఎత్తిచూపుతూ కేసీఆర్, కేటీఆర్, హరీష్ రావులపైన..జిల్లాలోని సమస్యలను ప్రస్తావిస్తూ బీఆర్ఎస్ మాజీ మంత్రులపైన కవిత విమర్శలు సంధిస్తున్నారు. బీఆర్ఎస్ సామాజిక తెలంగాణ సాధనలో విఫలమైందని ఆరోపిస్తున్నారు. సామాజిక తెలంగాణ సాధనకు మేధావులు, ప్రజల అభిప్రాయాలను తెలుసుకునేందుకు జిల్లాల పర్యటన చేపట్టినట్లుగా చెబుతున్నారు. ఈ నేపథ్యంలో కేసీఆర్ పేరు లేకుండా కవిత చేసిన దీక్షా దివస్ ట్వీట్ చర్చనీయాంశమైంది.