Seethakka : మేడారంలో అభివృద్ది పనుల పరిశీలన

మేడారం జాతర పనులను నిర్ణీత సమయంలో పూర్తి చేయాలని అధికారులను మంత్రి సీతక్క ఆదేశించారు. జంపన్న వాగు, ఆలయ అభివృద్ధి పనులను క్షేత్రస్థాయిలో పరిశీలించి పలు సూచనలు చేశారు.

విధాత, ప్రత్యేక ప్రతినిధి: నిర్ణీత సమయంలో మేడారం మహా జాతర అభివృద్ధి పనులను పూర్తి చేయాలని రాష్ట్ర పంచాయతీ రాజ్, గ్రామీణాభివృద్ధి, గ్రామీణ నీటి సరఫరా, మహిళా శిశు సంక్షేమ శాఖ మంత్రి దనసరి అనసూయ సీతక్క సూచించారు. గురువారం ఎస్.ఎస్. తాడ్వాయి మండలంలోని మేడారంలో జరుగుతున్న శ్రీ సమ్మక్క సారలమ్మ దేవాలయం అభివృద్ధి పనులను, పార్కింగ్ స్థలాలను, బస్టాండ్ ప్రాంగణంలో జరుగుతున్న పనులను, విఐపి, వివిఐపి రోడ్లను శ్రీరామ్ సాగర్ చెరువును , రోడ్ల విస్తరణను , జంపన్న వాగు దగ్గర ఉన్న స్నానఘట్టాలను సీతక్క క్షేత్ర స్థాయిలో పరిశీలించారు. అనంతరం మంత్రి మేడారం లోని ఐటిడిఏ గెస్ట్ హౌస్ లో అధికారులతో సమీక్ష సమావేశం నిర్వహించి పలు సూచనలు చేశారు. ఈ సందర్భంగా మంత్రి సీతక్క మాట్లాడుతూ జంపన్న వాగు పరిసరాలలో జరుగుతున్న పనులను వేగవంతం చేయాలని అధికారులకు సూచించారు. భక్తులు అధిక సంఖ్యలో వస్తున్న సందర్భంలో స్నాన ఘట్టాలను ఎప్పటికప్పుడు పరిశుభ్రంగా చూసుకోవాలని, కొంగల మడుగు ఏరియా నుండి జంపన్న వాగు వరకు రోడ్లను వెంటనే మరమ్మతులు చేయాలని అధికారులను ఆదేశించారు. వివిధ రాష్ట్రాల నుండి వచ్చే భక్తులకు ఇబ్బందులు కలుగకుండా రోడ్ల విస్తరణ పనులను వేగవంతంగా పూర్తి చేయాలని, భక్తులకు ఎలాంటి అసౌకర్యాలు కలగకుండా ఉండేందుకు ముందస్తు చర్యలు తీసుకోవాలని అధికారులను ఆదేశించారు. పోలీస్ అధికారులు ఎప్పటికప్పుడు అప్రమత్తంగా ఉండాలని సూచించారు. సమ్మక్క సారలమ్మ ఆలయంలో జరుగుతున్న అభివృద్ది పనులను పరిశీలించి, పనులలో ఇంకా వేగం పెంచాలని, లేబర్ ను అదనంగా తెప్పించి షిఫ్ట్ ల వారిగా 24 గంటలు అభివృద్ధి పనులు చేపట్టాలని అధికారులను, కాంట్రాక్టర్లను మంత్రి ఆదేశించారు.

ఈ కార్యక్రమంలో జిల్లా కలెక్టర్ దివాకర టి.ఎస్, ఎస్.పి. సుధీర్ రామ్ నాథ్ కేకన్, ఐటిడిఏ పి ఓ చిత్ర మిశ్రా, వ్యవసాయ మార్కెట్ కమిటీ చైర్మన్ రేగ కళ్యాణి, సంబంధిత అధికారులు కాంట్రాక్టర్లు, ప్రజా ప్రతినిధులు, తదితరులు పాల్గొన్నారు.

ఇవి కూడా చదవండి :

Panaji Hyderabad Highway | ఆ రహదారి పూర్తయితే పనాజీకి ప్రయాణం ఏడు గంటల్లోనే! 
Phone Tapping Case : ఫోన్ ట్యాపింగ్ కేసు..ప్రభాకర్ రావు కస్టడీలో కీలక పురోగతి