Minister Uttam | కేసీఆర్ డబుల్ బెడ్రూం పథకం ఒక అభూత కల్పన: మంత్రి ఉత్తమ్ కుమార్ రెడ్డి

తెలంగాణలో వచ్చే ఐదేళ్లలో ఇందిరమ్మ ఇళ్ల పథకం కింద అర్హులైన లబ్ధిదారులందరికీ ఇళ్ల స్థలాలు, ఇండ్లు అందించేందుకు కాంగ్రెస్ ప్రభుత్వం కట్టుబడి ఉందని పౌర సరఫరాలు, నీటి పారుదల శాఖ మంత్రి ఎన్.ఉత్తమ్ కుమార్ రెడ్డి అన్నారు.

అర్హులందరికి ఇందిరమ్మ ఇండ్లు
నీటి పారుదల శాఖ మంత్రి ఉత్తమ్ కుమార్ రెడ్డి
రాష్ట్రంలో తొలి విడతలో 4.5లక్షల ఇండ్లు
22వేల కోట్లతో నిర్మాణం
హుజూర్‌నగర్‌ కాలనీలో 2,160 గృహాలు 3 నెలల్లో పంపిణీ
హౌసింగ్ కాలనీని పరిశీలన

విధాత, హైదరాబాద్ : తెలంగాణలో వచ్చే ఐదేళ్లలో ఇందిరమ్మ ఇళ్ల పథకం కింద అర్హులైన లబ్ధిదారులందరికీ ఇళ్ల స్థలాలు, ఇండ్లు అందించేందుకు కాంగ్రెస్ ప్రభుత్వం కట్టుబడి ఉందని పౌర సరఫరాలు, నీటి పారుదల శాఖ మంత్రి ఎన్.ఉత్తమ్ కుమార్ రెడ్డి అన్నారు. మంగళవారం హుజూర్‌నగర్‌ పట్టణంలోని రామస్వామి గుట్టలోని హౌసింగ్‌ కాలనీని పరిశీలించిన అనంతరం ఉత్తమ్‌కుమార్‌రెడ్డి మీడియాతో మాట్లాడుతూ గత 10 ఏళ్లుగా హౌసింగ్‌ రంగాన్ని గత బీఆరెస్‌ హయాంలో పూర్తిగా నిర్లక్ష్యం చేశారని విమర్శించారు. డబుల్ బెడ్ రూమ్‌ హౌసింగ్ స్కీమ్ చుట్టూ ఒక హైప్ క్రియేట్ చేయబడిందని, వాస్తవానికి అది ఒక అభూత కల్పన, బోల్డు వాగ్దానం అని నిరూపించబడిందన్నారు.

కేసీఆర్ నేతృత్వంలోని గత ప్రభుత్వం డబుల్ బెడ్ రూమ్‌పేరుతో ఇళ్లులేని ప్రజలను మోసం చేసిందని, అరకొరగా కట్టిన వాటిని కూడా పంపిణీ చేయలేదని ఆరోపించారు. కాంగ్రెస్ హయాంలో ప్రారంభించిన బలహీన వర్గాల ఇళ్ల ప్రాజెక్టులను కేసీఆర్ ప్రభుత్వం నిలిపివేసిందన్నారు. హుజూర్‌నగర్‌ పట్టణంలో 2,160 యూనిట్లతో ఇందిరమ్మ ఇళ్ల ప్రాజెక్టును 2013-14లో తాను కాంగ్రెస్‌ ప్రభుత్వంలో గృహ నిర్మాణ శాఖ మంత్రిగా ఉన్నప్పుడు ప్రారంభించిన విషయాన్ని ఉత్తమ్‌కుమార్‌ రెడ్డి గుర్తు చేశారు. బీఆరెఎస్ ప్రభుత్వం ఈ ప్రాజెక్టును 10 సంవత్సరాలు ఆపేసిందని, . 2023 డిసెంబర్‌లో అధికారంలోకి వచ్చిన వెంటనే, మళ్లీ నేను ఈ హౌజింగ్ ప్రాజెక్టును పునరుద్ధరించి, పనులను వేగవంతం చేశానని, అవి ఇప్పుడు అధునాతన దశలో ఉన్నాయన్నారు. వచ్చే మూడు నెలల్లో 2,160 యూనిట్లను నిరాశ్రయులకు అందజేసే అవకాశం ఉందని వెల్లడించారు. .

తొలి విడతగా 4.5లక్షల ఇందిరమ్మ ఇళ్ల నిర్మాణం

కాంగ్రెస్ ప్రభుత్వం ఇందిరమ్మ ఇళ్ల పథకంలో ఎస్సీ, ఎస్టీ, బీసీ, మైనార్టీలకు ప్రాధాన్యత ఇస్తోందని ఉత్తమ్‌కుమార్‌రెడ్డి తెలిపారు. ఈ పథకం కింద ఒక్కో నియోజకవర్గంలో కనీసం 3,500 ఇళ్ల చొప్పున రూ.22 వేల కోట్లతో మొత్తం 4.5 లక్షల ఇళ్లను నిర్మించేందుకు ప్రణాళిక సిద్ధం చేశామన్నారు. ఈ ఇండ్లు 400 చదరపు అడుగుల విస్తీర్ణంలో ఆర్‌సీసీ రూఫింగ్, వంటగది, టాయిలెట్‌తో ఉంటాయన్నారు. ఈ ఆర్థిక సంవత్సరంలో గృహ నిర్మాణ పథకానికి రూ.7,740 కోట్లు కేటాయించారని, ఇంకా, భూమిని కలిగి ఉన్న అర్హులైన వ్యక్తులకు ఇంటి నిర్మాణం కోసం రూ. 5 లక్షల ఆర్థిక సహాయం చేయనున్నామన్నారు. షెడ్యూల్డ్ కులాలు, షెడ్యూల్డ్ తెగల వర్గాలకు చెందిన వ్యక్తులు రూ. 6 లక్షలు అందుకుంటారని చెప్పారు.

ప్రధానమంత్రి ఆవాస్ యోజన (పీఎంఏవై) వంటి కేంద్ర గృహ నిర్మాణ పథకాల్లో కేంద్రంలోని బీజేపీ నేతృత్వంలోని ఎన్డీయే ప్రభుత్వం తెలంగాణను పూర్తిగా నిర్లక్ష్యం చేసిందని ఉత్తమ్ కుమార్ రెడ్డి విమర్శించారు. ప్రజలు ఎదుర్కొంటున్న సమస్యల పరిష్కారానికి బీఆరెస్‌, బీజేపీలకు భిన్నంగా కాంగ్రెస్ పరిష్కార కోణంలో ముందుకెలుతుందన్నారు. ఆ పార్టీలు కేవలం రాజకీయ ప్రచారంపైనే దృష్టి సారిస్తుండగా, కాంగ్రెస్‌ మాత్రం ప్రజలకు ఇచ్చిన వాగ్దానాలను అమలు చేస్తుందని తెలిపారు. ఈ కారణంగానే లక్ష్యాల సాధనకు స్పష్టమైన గడువు విధించడంతో పాటు ప్రతి హామీని నెరవేర్చేందుకు తగినన్ని బడ్జెట్ కేటాయింపులు చేశామన్నారు.

అనంతరం హుజూర్ నగర్ పట్టణంలో జరిగిన పలు అభివృద్ధి కార్యక్రమాల్లో ఉత్తమ్ కుమార్ రెడ్డి పాల్గొన్నారు. కల్యాణలక్ష్మి, షాదీ ముబారక్ చెక్కుల పంపిణీ, ఐటీఐ కళాశాల ఏటీసీ సెంటర్‌ వర్క్‌షాప్‌ శంకుస్థాపన, క్రిస్టియన్‌ శ్మశాన వాటిక పనుల పరిశీలన, టౌన్‌హాల్‌, 100 పడకల ప్రభుత్వాసుపత్రి, భవన నిర్మాణ పనులను పరిశీలించారు. స్టేడియం, ప్రభుత్వ డిగ్రీ కళాశాల భవనం, హుజూర్‌నగర్‌ పట్టణంలోని ఎన్‌జీవో కాలనీలో టీయూఎఫ్‌ఐడీసీ పనులకు శంకుస్థాపన చేశారు. షెడ్యూల్డ్ కులాల వర్గీకరణకు అనుకూలంగా సుప్రీంకోర్టు ఇచ్చిన తీర్పును పురస్కరించుకుని మాదిగ రిజర్వేషన్ పోరాట సమితి (ఎంఆర్‌పిఎస్) నిర్వహించిన ర్యాలీలో ఆయన పాల్గొన్నారు. ఎస్సీ వర్గీకరణ సాధనకు న్యాయ, రాజకీయ పోరాటంలో విశేష సహకారం అందించిన ఉత్తమ్‌కుమార్‌రెడ్డిని ఎమ్మార్పీఎస్ నాయకులు సన్మానించారు.