ప్రజలను తప్పుదోవ పట్టిస్తున్నారు.. మంత్రులపై హరీశ్ రావు ఫైర్

డిప్యూటీ సీఎం భట్టి పీపీటీ ప్రజెంటేషన్ పై బీఆర్ఎస్ మాజీ మంత్రి హరీశ్ రావు కౌంటర్ వేశారు. విద్యుత్ పై అసెంబ్లీ సాక్షిగా విడుదల చేసిన స్టేట్ పవర్ సెక్టార్ శ్వేతపత్రం, ఇటీవల విడుదల చేసిన క్లీన్ అండ్ గ్రీన్ ఎనర్జీ పాలసీ-2025, తాజా పీపీటీలో ప్రదర్శించిన విద్యుత్ గణాంకాలు ఒక దానికి మరొకటి పొంతన లేకుండా ఉందన్నారు.

విధాత, హైదరాబాద్ : డిప్యూటీ సీఎం భట్టి పీపీటీ ప్రజెంటేషన్ పై బీఆర్ఎస్ మాజీ మంత్రి హరీశ్ రావు కౌంటర్ వేశారు. విద్యుత్ పై అసెంబ్లీ సాక్షిగా విడుదల చేసిన స్టేట్ పవర్ సెక్టార్ శ్వేతపత్రం, ఇటీవల విడుదల చేసిన క్లీన్ అండ్ గ్రీన్ ఎనర్జీ పాలసీ-2025, తాజా పీపీటీలో ప్రదర్శించిన విద్యుత్ గణాంకాలు ఒక దానికి మరొకటి పొంతన లేకుండా ఉందన్నారు. డిప్యూటీ సీఎంగా, విద్యుత్ మంత్రిగా రెండేళ్లు పూర్తయినప్పటికీ.. ఆ శాఖలోని విషయాలపై ఏమాత్రం అవగాహన లేకుండా ఇతరులను అన్‌ఫిట్ ఫర్ పాలిటిక్స్ అని కామెంట్ చేయడం తగునా? అని భట్టిని హరీశ్ ప్రశ్నించారు. అధికారులు ఒక్కోసారి ఒక్కోలెక్కలను మీ ద్వారా ప్రదర్శింపజేస్తున్నా అది తెలియడం లేదా అని వివరించారు. ప్రభుత్వానికి కమీషన్లపై ఉన్న శ్రద్ద, పాలసీలపై ఉండి ఉంటే.. ఈ పొరపాట్లు జరగేవి కాదని ఎద్దేవా చేశారు.

క్లీన్ అండ్ గ్రీన్ ఎనర్జీ పాలసీని ప్రభుత్వం పూర్తిగా పట్టించుకోవడం లేదని, పునర్విభజన చట్టం ప్రకారం అందుబాటులో ఉన్న ఎన్టీపీసీ 1600 మెగావాట్ల విద్యుత్‌ను పక్కన పెట్టి, భారీ స్కాం లక్ష్యంతో 2400 మెగావాట్ల కొత్త థర్మల్ పవర్ ప్లాంట్ల నిర్మాణానికి తొందరపడుతోందని ఆరోపించారు. 2025 ఎనర్జీ పాలసీలో 2034–35 నాటికి థర్మల్ విద్యుత్ ఉత్పత్తి 16,966 మెగావాట్లు లక్ష్యంగా పెట్టుకున్న ప్రభుత్వం, ఇప్పుడు అకస్మాత్తుగా 5,000–6,000 మెగావాట్ల లోటు ఉందని చెప్పడం ఎలా సాధ్యమని ప్రశ్నించారు. పాలసీలోనే ప్రస్తుతం 14,164 మెగావాట్ల థర్మల్ జనరేషన్ అందుబాటులో ఉందని పేర్కొనగా, అంచనా ప్రకారం గరిష్టంగా 2,802 మెగావాట్ల లోటే ఉండాలి కానీ… ఇప్పుడు చెప్పే లెక్క ఎలా వచ్చిందని భట్టి విక్రమార్కపై నిప్పులు చెరిగారు.

‘2030 నాటికి 20,000 మెగావాట్ల పునరుత్పాదక శక్తి ఉత్పత్తి చేస్తామని గ్రీన్ ఎనర్జీ పాలసీలో ప్రభుత్వం స్పష్టంగా ప్రకటించింది. అంటే రాబోయే ఐదేళ్లలో 13,000 మెగావాట్ల సోలార్ ఎనర్జీని సాధించాల్సి ఉంటుంది. అలా ఉండగా, ఎందుకు థర్మల్ ప్లాంట్లపై ఇంత తొందర, క్యాబినెట్ ఏ ఆధారంపై నిర్ణయం తీసుకుందో ప్రభుత్వం వివరణ చెప్పాలి. 2400 మెగావాట్ల థర్మల్ ప్లాంట్ల నిర్మాణానికి ఆమోదించిన 50 వేల కోట్లలో 30–40 శాతం కమిషన్ లక్ష్యమే అసలు కారణమా?’ అని హరీశ్ రావు మండిపడ్డారు.

అసెంబ్లీలో మంత్రి శ్రీధర్ బాబు చేసిన వ్యాఖ్యలు, శ్వేతపత్రంలో ఉన్న వివరాలకు పూర్తిగా విరుద్ధంగా ఉన్నాయని విమర్శించారు. యాదాద్రి థర్మల్ పవర్ ప్రాజెక్టు కోసం కోల్ ట్రాన్స్‌పోర్ట్ ఖర్చు వత్సరానికి రూ.803 కోట్లు అవుతుందని శ్వేతపత్రంలో చెప్పి… ఇప్పుడు 1600 కోట్లు అవుతాయని చెప్పడం ప్రజలను తప్పుదోవ పట్టించటమేనని విమర్శించారు. ఒకప్పుడు యాదాద్రి ప్రాజెక్టును తప్పుబట్టిన కాంగ్రెస్ నాయకులే ఇప్పుడు మక్తల్ వద్ద 800 మెగావాట్ల థర్మల్ ప్లాంటు ఏర్పాటు చేస్తామని చెప్పడం ద్వంద్వ వైఖరికి నిదర్శనమని వ్యాఖ్యానించారు. మక్తల్‌లో థర్మల్, సోలార్, విండ్—ఏది ఏర్పాటు చేయాలన్నది ఇంకా పరిశీలనలో ఉందని భట్టి విక్రమార్క చెప్పడం హాస్యాస్పదమని అన్నారు. ఇటీవల మంత్రులే మక్తల్‌లో థర్మల్ ప్లాంటు ఏర్పాటు చేస్తామని ప్రకటించిన విషయాన్ని గుర్తుచేశారు. ఏది నిజం? ఏది అబద్ధం? అని ప్రశ్నిస్తూ ప్రభుత్వం ఒక నిర్ణయానికి రావాలని కోరారు.

యాదాద్రి ప్రాజెక్టు పర్ మెగావాట్ ఖర్చు 8.64 కోట్లు కాగా, NTPC రామగుండం ప్రాజెక్టులో 7.63 కోట్లు ఖర్చవుతుందని శ్వేతపత్రంలో పేర్కొన్నారని హరీశ్ రావు గుర్తు చేశారు. NTPC ఫేజ్2లో 3×800 మెగావాట్ల ప్లాంటు 2023 డిసెంబర్ 1 నాటికి కూడా ప్రారంభం కాలేదని మీరు శ్వేతపత్రంలోనే ప్రకటించారని, ఇప్పుడు బీఆర్ఎస్‌ను నిందించడం ఏమిటని ప్రశ్నించారు. రేవంత్ రెడ్డి ప్రభుత్వం ఏర్పడిన తర్వాతే 800 మెగావాట్ల అగ్రిమెంట్ చేసుకొని, మిగతా 1600 మెగావాట్లు అక్కర్లేదని చెప్పిన విషయం నిజమా? అబద్ధమా? అని నిలదీశారు. రామగుండం కొత్త ప్లాంటులో పర్ మెగావాట్ ఖర్చు 14 కోట్లు అవుతుందని ప్రభుత్వం స్వయంగా ప్రకటించగా, NTPC మాత్రం 12.3 కోట్లకే ప్లాంట్లు నిర్మిస్తోందని… ఈ భారీ వ్యత్యాసానికి కారణం ఏమిటి అని ప్రశ్నించకుండా, DPR ఇంకా సిద్ధం కాలేదంటూ తప్పించుకోవడం సరైంది కాదన్నారు. మహిళా సంఘాలకు 1,000 మెగావాట్ల సోలార్ పవర్ ప్లాంట్లు అప్పగిస్తామని ప్రభుత్వం చేసిన ప్రకటనల పురోగతి గురించి ప్రశ్నించగా, ప్రభుత్వం ఏ సమాధానమూ ఇవ్వకుండా ప్రతిపక్షాలపై ఆరోపణలు మాత్రమే చేస్తోందని ఆవేదన వ్యక్తం చేశారు. బాధ్యతాయుతమైన పదవుల్లో ఉన్న మంత్రులు ప్రజలను తప్పుదోవ పట్టించే ధోరణిని వెంటనే మార్చుకోవాలని హరీశ్ రావు హితవు పలికారు.

Also Read-
Cyclone : బంగాళాఖాతంలోనే తుఫాన్లు ఎక్కువగా ఏర్పడటానికి కారణాలు ఏంటి?
Telangana | విద్యుత్ ఉత్పత్తిని పెంచకపోతే భవిష్యత్తులో ఇబ్బందులు : డిప్యూటీ సీఎం భట్టి
Delhi | ఊపిరి ఆడడం లేదు.. ఢిల్లీలో పెరిగిపోతున్న వాయుకాలుష్యం