SR NTR | చెన్నయ్‌లో మళ్లీ వెలుగులు నింపుకోనున్న ఎన్టీఆర్ స్మృతి నిలయం .. ప్రజల సందర్శనకు సిద్ధం

SR NTR | కలియుగ ప్రత్యక్ష దైవంగా భావించే తిరుమల శ్రీ వెంకటేశ్వర స్వామి దర్శనంతో పాటు, మహానటుడు నందమూరి తారక రామారావును కన్నులారా చూసినప్పుడే తమ యాత్ర పరిపూర్ణమయ్యేదని పాత తరం సినీ అభిమానులు ఇప్పటికీ గుర్తుచేసుకుంటారు. తిరుపతి నుంచి చెన్నయ్ వెళ్లి, బజుల్లా రోడ్డులోని ఎన్టీఆర్ ఇంటిని సందర్శించి ఆశీస్సులు తీసుకున్న అనుభవాలు ఎంతోమంది తెలుగువారి జీవితాల్లో చిరస్థాయిగా నిలిచిపోయాయి.

SR NTR | కలియుగ ప్రత్యక్ష దైవంగా భావించే తిరుమల శ్రీ వెంకటేశ్వర స్వామి దర్శనంతో పాటు, మహానటుడు నందమూరి తారక రామారావును కన్నులారా చూసినప్పుడే తమ యాత్ర పరిపూర్ణమయ్యేదని పాత తరం సినీ అభిమానులు ఇప్పటికీ గుర్తుచేసుకుంటారు. తిరుపతి నుంచి చెన్నయ్ వెళ్లి, బజుల్లా రోడ్డులోని ఎన్టీఆర్ ఇంటిని సందర్శించి ఆశీస్సులు తీసుకున్న అనుభవాలు ఎంతోమంది తెలుగువారి జీవితాల్లో చిరస్థాయిగా నిలిచిపోయాయి. అయితే కాలక్రమేణా ఎన్టీఆర్ చెన్నయ్‌ను వీడి హైదరాబాద్‌కు స్థిరపడటంతో, ఆ చారిత్రక ఇల్లు క్రమంగా వెలవెలబోయింది. కుటుంబ సభ్యులు ఇతర ప్రాంతాల్లో స్థిరపడటం, ఇంటి నిర్వహణపై దృష్టి లేకపోవడంతో అది కొన్నేళ్లుగా నిర్లక్ష్యానికి గురైంది. ఒక దశలో ఆ ఇంటిని విక్రయించాలన్న ఆలోచనలు కూడా వచ్చినప్పటికీ, అవి కార్యరూపం దాల్చలేదు.

ఇప్పుడు పరిస్థితి మారబోతోంది. ఎన్టీఆర్‌కు అత్యంత సన్నిహితులైన చదలవాడ సోదరులు – తిరుపతిరావు, శ్రీనివాసరావు ఆ చారిత్రక ఇంటిని కొనుగోలు చేసి, దానికి పూర్వ వైభవం తీసుకురావడానికి ముందుకొచ్చారు. వ్యాపార ప్రయోజనాల కోసం కాకుండా, ఎన్టీఆర్ జ్ఞాపకాలను సజీవంగా ఉంచాలన్న సంకల్పంతోనే ఈ నిర్ణయం తీసుకున్నారని వారు స్పష్టం చేశారు. చదలవాడ శ్రీనివాసరావు మీడియాతో మాట్లాడుతూ, ఎన్టీఆర్ ఇంటితో తనకు ఉన్న అనుబంధాన్ని గుర్తు చేసుకున్నారు. యువకులుగా ఉన్న రోజుల్లో తిరుపతి యాత్రికులను చెన్నయ్‌కు తీసుకొచ్చి, ఎన్టీఆర్‌ను చూపించిన రోజుల జ్ఞాపకాలు తన మనసును కదిలించాయన్నారు. అదే భావోద్వేగంతో ఆ ఇంటిని కొనుగోలు చేసి, ఎలాంటి వాణిజ్య మార్పులు చేయకుండా ‘ఎన్టీఆర్ ఇల్లు’గానే కొనసాగించాలని నిర్ణయించుకున్నట్లు తెలిపారు. ఈ ఆలోచనకు ఎన్టీఆర్ వారసులు కూడా సంతోషంగా అంగీకరించారని వెల్లడించారు.

ఇంటి రిజిస్ట్రేషన్ పూర్తైన వెంటనే, మరమ్మతుల పనులు మొదలయ్యాయి. నిర్మాణ స్వరూపం మార్చకుండా, పాత శైలిని కాపాడుతూ ఆధునిక సౌకర్యాలతో ఇంటిని తీర్చిదిద్దుతున్నారు. అంతేకాదు, ఇంటి ప్రధాన ద్వారం వద్ద ‘శ్రీకృష్ణపాండవీయం’లో సుయోధనుడిగా ఎన్టీఆర్ పోషించిన పాత్రను ప్రతిబింబించే విగ్రహాన్ని ఏర్పాటు చేయాలన్న ఆలోచన కూడా ఉంది. ఫ్లైఓవర్‌పై నుంచి వెళ్లేవారు సైతం ఆ విగ్రహాన్ని చూసేలా ప్రత్యేకంగా డిజైన్ చేయనున్నారు. ఇటీవల ఈ ఇంటిపై మళ్లీ చర్చ మొదలైనప్పటికీ, చదలవాడ సోదరులు తీసుకున్న నిర్ణయం స్పష్టమని వారి సన్నిహితులు చెబుతున్నారు. ఎక్కువ మొత్తానికి కొనుగోలు ఆఫర్లు వచ్చినా, వాటన్నింటినీ వారు తిరస్కరించారు. ఎందుకంటే, ఈ ఇల్లు కేవలం ఒక ఆస్తి కాదు… తెలుగు ప్రజల ఆత్మాభిమానం, ఎన్టీఆర్ అభిమానుల భావోద్వేగాలతో ముడిపడిన ఒక చారిత్రక గుర్తు. త్వరలోనే చెన్నయ్‌లోని ఈ ఎన్టీఆర్ ఇల్లు మళ్లీ ప్రజల సందర్శనకు తెరుచుకోనుంది. ఒక మహానటుడికి, ఒక ప్రజానాయకుడికి లభిస్తున్న అరుదైన గౌరవంగా ఈ ప్రయత్నాన్ని అభిమానులు అభినందిస్తున్నారు.