Hema | హైదరాబాద్లో డ్రగ్స్ వ్యవహారం మరోసారి సంచలనంగా మారింది. నగరంలోని కొండాపూర్ ప్రాంతంలో ఉన్న ‘క్వాక్ ఏరీనా పబ్’పై ఈగల్ టీమ్, స్థానిక పోలీసులు సంయుక్తంగా మెరుపు దాడులు నిర్వహించగా, పలువురికి డ్రగ్స్ పాజిటివ్ రావడం కలకలం రేపుతోంది. ఈ ఘటనలో టాలీవుడ్ సీనియర్ నటి హేమ కూడా పార్టీలో పాల్గొనడం హాట్ టాపిక్గా మారింది.
పబ్లో సడెన్ ఎంట్రీ.. 64 మందికి డ్రగ్ టెస్టులు
డ్రగ్స్ సరఫరా జరుగుతున్నట్లు విశ్వసనీయ సమాచారం అందడంతో అధికారులు పబ్పై ఆకస్మిక దాడులు చేపట్టారు. ఆ సమయంలో పబ్లో పార్టీ కొనసాగుతుండగా, ఒక్కసారిగా పోలీసులు ఎంట్రీ ఇచ్చి అక్కడ ఉన్న సుమారు 64 మందికి డ్రగ్స్ నిర్ధారణ పరీక్షలు నిర్వహించారు.
ఈ పరీక్షల్లో మొత్తం 8 మందికి పాజిటివ్గా తేలింది. వీరిలో ఆరుగురు గంజాయి సేవించినట్లు, మరో ఇద్దరు ఇతర మాదకద్రవ్యాలు తీసుకున్నట్లు పోలీసులు గుర్తించారు. నిందితులందరినీ అదుపులోకి తీసుకుని విచారణ నిమిత్తం గచ్చిబౌలి పోలీస్ స్టేషన్ కు తరలించారు.
హేమకు నెగెటివ్.. వీడియోతో క్లారిటీ
ఇదే సమయంలో నటి హేమకు కూడా డ్రగ్స్ టెస్ట్ నిర్వహించగా, ఆమెకు నెగెటివ్ వచ్చినట్లు తేలింది. ఈ విషయాన్ని హేమ స్వయంగా ఒక వీడియో ద్వారా సోషల్ మీడియాలో పంచుకున్నారు. మళ్లీ పబ్కి వచ్చాను.. ఈగల్ టీమ్ చేసిన డ్రగ్స్ టెస్ట్లో నాకు నెగెటివ్ వచ్చింది. మీ హేమక్క ఎప్పుడూ తప్పు చేయదు అంటూ తన యూరిన్ టెస్ట్ రిపోర్ట్ చూపిస్తూ క్లారిటీ ఇచ్చారు. మరిన్ని వివరాలతో మరో వీడియో కూడా పోస్ట్ చేస్తానని తెలిపారు.
పబ్ ప్రాంగణం నుంచే ఈ వీడియోను రిలీజ్ చేయడం ప్రస్తుతం సోషల్ మీడియాలో వైరల్గా మారింది. నెటిజన్లు దీనిపై భిన్నంగా స్పందిస్తున్నారు.
గత వివాదాల నేపథ్యంలో మళ్లీ చర్చ
గతంలో బెంగళూరులో జరిగిన రేవ్ పార్టీ కేసులో కూడా హేమ పేరు వినిపించడం పెద్ద సంచలనానికి దారితీసింది. ఆ కేసులో ఆమె కొంతకాలం జైలులో కూడా ఉన్నారు. అయితే తరువాత కోర్టు ఆమెకు క్లీన్ చీట్ ఇచ్చింది.
ఆ ఘటనపై స్పందించిన హేమ, డ్రగ్స్ ఆరోపణల వల్ల తన వ్యక్తిగత జీవితం తీవ్రంగా దెబ్బతిన్నదని, కుటుంబం కూడా ఇబ్బందులు ఎదుర్కొన్నదని ఆవేదన వ్యక్తం చేశారు. ఆ వార్తల షాక్తో తన తల్లి మానసికంగా కుంగిపోయి మరణించిందని ఆమె చెప్పడం అప్పట్లో చర్చనీయాంశమైంది.
సినిమాలకు దూరం.. మళ్లీ రీఎంట్రీ ఆశలు
డ్రగ్స్ వివాదాల తర్వాత హేమ సినిమాలకు దూరంగా ఉన్నారు. అయితే ఇటీవల ఒక ఇంటర్వ్యూలో మాట్లాడుతూ, మళ్లీ మంచి అవకాశాలతో రీఎంట్రీ ఇవ్వాలని ఆశిస్తున్నట్లు తెలిపారు. ముఖ్యంగా చిరంజీవి సినిమాలో అవకాశం వస్తే నటించాలని తన కోరికను వెల్లడించారు.
కొండాపూర్ పబ్ ఘటన మరోసారి హైదరాబాద్లో డ్రగ్స్ వినియోగంపై ఆందోళనలను పెంచింది. ఒకవైపు 8 మందికి పాజిటివ్ రావడం సంచలనం సృష్టిస్తే, మరోవైపు నటి హేమ వెంటనే స్పందించి క్లారిటీ ఇవ్వడం చర్చనీయాంశంగా మారింది. ప్రస్తుతం ఈ కేసు దర్యాప్తు కొనసాగుతోంది.
కొండాపూర్ ప్రాంతంలోని క్వాక్ ఏరీనా పబ్లో డ్రగ్స్ కలకలం
64 మందికి డ్రగ్స్ టెస్ట్ నిర్వహించగా, ఆరుగురికి గంజాయి పాజిటివ్, ఇద్దరికి డ్రగ్స్ టెస్ట్ పాజిటివ్ వచ్చినట్లు గుర్తింపు
పబ్లో జరిగిన పార్టీలో తాను ఉన్నానని, కానీ తనకు డ్రగ్స్ టెస్టులో నెగెటివ్ వచ్చిందని వీడియో పోస్ట్ చేసిన… pic.twitter.com/QxBwqkco9J
— Telugu Scribe (@TeluguScribe) April 3, 2026