Krishna Vamsi | ప్రఖ్యాత దర్శకుడు కృష్ణవంశీ తన సుదీర్ఘ సినీ ప్రయాణంలో ఎదురైన అనుభవాలు, విజయాలు, వైఫల్యాల గురించి ఇటీవల ఇచ్చిన ఓ ఇంటర్వ్యూలో మాట్లాడారు. తన కెరీర్లో తీసిన సుమారు 20 చిత్రాలపై ఆయన విశ్లేషణాత్మకంగా స్పందిస్తూ, కొన్ని సినిమాలు తనకు గర్వకారణమైతే మరికొన్ని తీవ్ర నిరాశను మిగిల్చాయని స్పష్టం చేశారు. ముఖ్యంగా ‘మొగుడు’ సినిమాపై ఆయన చేసిన వ్యాఖ్యలు సినీ వర్గాల్లో చర్చనీయాంశంగా మారాయి.
కృష్ణవంశీ మాట్లాడుతూ ‘మొగుడు’ చిత్రం మొదట ప్రారంభించినప్పుడు చాలా నమ్మకంతో, ఉత్సాహంతో పని చేశానని, అయితే సినిమా సాగుతున్న కొద్దీ పరిస్థితులు మారిపోయాయని తెలిపారు. “ఒక దశలో భగవంతుడా ఇది ఎప్పుడు అయిపోతుందా అనిపించేది” అంటూ ఆ అనుభవాన్ని గుర్తుచేసుకున్నారు. ఈ సినిమా అనుకున్న విధంగా రాకపోవడానికి కొంతమంది వ్యక్తుల మనస్తత్వాలు, వారి ఎజెండాలు ప్రధాన కారణమయ్యాయని, అది తన జీవితంలో ఒక “బిట్టర్ చాప్టర్” గా మిగిలిపోయిందని ఆయన వెల్లడించారు.
ప్రొడక్షన్ పరిస్థితులు ఒక దర్శకుడి సృజనాత్మకతపై ఎంతగానో ప్రభావం చూపుతాయని కృష్ణవంశీ స్పష్టం చేశారు. కథ, మేకింగ్ మాత్రమే కాదు, మొత్తం సినిమా దిశనే అవి మార్చగలవని అన్నారు. “ఒకడి మోసం వల్ల ఆ సినిమా ఒప్పుకోవాల్సి వచ్చింది, చేయాల్సి వచ్చింది” అంటూ మొగుడు చిత్రానికి సంబంధించిన చేదు జ్ఞాపకాలను పంచుకున్నారు. ఆ సినిమా కోసం పనిచేసిన ఎనిమిది నుంచి పది నెలల సమయం తన కెరీర్లో అత్యంత కఠిన దశగా నిలిచిందని చెప్పారు.
తన 20 సినిమాల్లో అత్యంత నిరాశ కలిగించిన చిత్రాలుగా ‘మొగుడు’ తో పాటు ‘పైసా’ ను కూడా పేర్కొన్నారు. ఈ రెండు సినిమాల వైఫల్యానికి పూర్తిగా తానే బాధ్యుడినని స్పష్టంగా అంగీకరించారు. “నా ఫెయిల్యూర్, నా అసహాయత, నా అసమర్థత, నా పరాజయం” అంటూ తన తప్పులను నేరుగా ఒప్పుకోవడం ఆయన నిజాయితీని ప్రతిబింబిస్తోంది.
అయితే, తన కెరీర్లో గర్వపడే చిత్రాల గురించి మాట్లాడినప్పుడు కృష్ణవంశీ స్వరం మారిపోయింది. ముఖ్యంగా ‘చందమామ’ సినిమాను తన కెరీర్లో టాప్ పొజిషన్లో ఉంచారు. ఈ చిత్రంతో పాటు ‘మురారి’, ‘అంతఃపురం’, ‘ఖడ్గం’, ‘డేంజర్’ సినిమాలను తన ప్రౌడ్ వర్క్స్గా పేర్కొన్నారు. ప్రత్యేకంగా ‘డేంజర్’ సినిమాపై ఆయన చేసిన వ్యాఖ్యలు ఆసక్తికరంగా నిలిచాయి. ఆ చిత్రంలో రొమాంటిక్ పాటలు, టిపికల్ కామెడీ లేకపోయినా కేవలం 80 లక్షల బడ్జెట్లో తీసి మంచి అవుట్పుట్ అందించగలిగానని చెప్పారు. ఆ సెటప్, ఆ బడ్జెట్కు అది ఎంతో మంచి చిత్రం అని అభిప్రాయపడ్డారు.