Mokshagna | నందమూరి కుటుంబ వారసుడు, నటసింహం నందమూరి బాలకృష్ణ కుమారుడు నందమూరి మోక్షజ్ఞ వెండితెర అరంగేట్రం గురించి గత పదేళ్లుగా టాలీవుడ్లో చర్చలు కొనసాగుతూనే ఉన్నాయి. ఎప్పుడెప్పుడు మోక్షజ్ఞ హీరోగా ఎంట్రీ ఇస్తాడా అని అభిమానులు ఆసక్తిగా ఎదురుచూస్తున్నారు. అయితే ఈసారి మాత్రం ఆయన ఎంట్రీపై వస్తున్న వార్తలు కేవలం రూమర్స్ కాదని, పక్కా ప్లాన్తోనే గ్రాండ్ లాంచ్కు సిద్ధమవుతున్నారని ఇండస్ట్రీ వర్గాల్లో గట్టిగా వినిపిస్తోంది.
ఇటీవల వరకు మోక్షజ్ఞను దర్శకుడు ప్రశాంత్ వర్మ తన సినిమాటిక్ యూనివర్స్లో భాగంగా పరిచయం చేయబోతున్నారని వార్తలు వచ్చాయి. ముఖ్యంగా హను-మాన్ వంటి భారీ విజయంతో ప్రశాంత్ వర్మకు మంచి క్రేజ్ రావడంతో, మోక్షజ్ఞ డెబ్యూ కూడా అదే స్టైల్లో ఉంటుందని చాలా మంది భావించారు. కానీ కొన్ని అనివార్య కారణాల వల్ల ఆ ప్రాజెక్ట్ ప్రస్తుతం పక్కకు వెళ్లినట్లు టాక్ వినిపిస్తోంది. దీనిపై అధికారిక ప్రకటన లేకపోయినా, ప్లాన్లో మార్పులు జరిగాయని మాత్రం తెలుస్తోంది.
ఇక తాజాగా ఫిల్మ్నగర్లో వినిపిస్తున్న సమాచారం ప్రకారం.. బాలకృష్ణ కెరీర్లో మైలురాయిగా నిలిచిన ఆదిత్య 369 సినిమాకు సీక్వెల్గా ఆదిత్య 999 తెరకెక్కబోతోంది. ఈ ప్రతిష్టాత్మక చిత్రంతోనే మోక్షజ్ఞ హీరోగా పరిచయం కాబోతున్నాడనే వార్తలు సినీ వర్గాల్లో చర్చనీయాంశంగా మారాయి. విశేషమేమిటంటే ఈ చిత్రానికి కథను స్వయంగా బాలకృష్ణే అందించినట్లు తెలుస్తోంది.
టైమ్ ట్రావెల్ కాన్సెప్ట్తో వచ్చిన ‘ఆదిత్య 369’ అప్పట్లో తెలుగు సినిమా చరిత్రలో ప్రత్యేక స్థానం సంపాదించుకుంది. ఇప్పుడు అదే కథా నేపథ్యాన్ని ఆధునిక సాంకేతికతతో, నేటి తరం ప్రేక్షకుల అభిరుచులకు తగ్గట్టుగా రూపొందించే బాధ్యతను దర్శకుడు క్రిష్ జాగర్లమూడికి అప్పగించినట్లు సమాచారం. బాలకృష్ణకు గౌతమిపుత్ర శాతకర్ణి వంటి చారిత్రాత్మక విజయాన్ని అందించిన క్రిష్పై నందమూరి కుటుంబానికి పూర్తి నమ్మకం ఉంది.
సోషియో ఫాంటసీ, సైన్స్ ఫిక్షన్ అంశాలతో తెరకెక్కబోయే ఈ భారీ బడ్జెట్ చిత్రానికి ప్రముఖ రచయిత బుర్రా సాయి మాధవ్ మాటలు అందించనున్నారని తెలుస్తోంది. పాత కాలం నాటి ఘట్టాలు, భవిష్యత్తు ప్రపంచం వంటి విభిన్న అంశాలను ఈ సినిమాలో చూపించబోతున్నారని టాక్. విజువల్స్, గ్రాఫిక్స్ పరంగా ఈ చిత్రం ఇండియన్ స్క్రీన్పై ఒక విజువల్ వండర్గా నిలుస్తుందని సినీ వర్గాలు భావిస్తున్నాయి.
ఇక మోక్షజ్ఞ ఇప్పటికే నటన, డ్యాన్స్లలో ప్రత్యేక శిక్షణ తీసుకుని తన డెబ్యూ కోసం సిద్ధంగా ఉన్నాడని సమాచారం. త్వరలోనే ఈ ప్రాజెక్ట్పై అధికారిక ప్రకటన రావడంతో పాటు గ్రాండ్గా ఓపెనింగ్ వేడుక నిర్వహించే అవకాశముందని టాక్ వినిపిస్తోంది.
మరో ఆసక్తికర అంశం ఏమిటంటే.. ఈ సినిమాలో బాలకృష్ణ కూడా ఒక కీలక పాత్రలో కనిపించనున్నారనే ప్రచారం జరుగుతోంది. ఇదే నిజమైతే తండ్రి–కొడుకు ఒకే సినిమాలో కనిపించడం అభిమానులకు ప్రత్యేక ఆకర్షణగా మారే అవకాశం ఉంది. ఏదేమైనా మోక్షజ్ఞ వెండితెర ఎంట్రీ నందమూరి అభిమానుల్లో భారీ ఉత్సాహాన్ని రేకెత్తిస్తోంది.