Music Directors | హీరోలుగా మారుతున్న సంగీత ద‌ర్శ‌కులు… కోలీవుడ్ నుండి టాలీవుడ్‌కి వ‌చ్చిన కొత్త ట్రెండ్

Music Directors | తెలుగు సినీ పరిశ్రమలో తాజాగా ఓ ఆసక్తికరమైన మార్పు స్పష్టంగా కనిపిస్తోంది. ఇప్పటివరకు నేపథ్య సంగీతం, పాటలతో మాత్రమే ప్రేక్షకులను మంత్రముగ్ధులను చేసిన మ్యూజిక్ డైరెక్టర్లు ఇప్పుడు కెమెరా ముందుకు వచ్చి కథానాయకులుగా కొత్త ప్రయాణం ప్రారంభిస్తున్నారు.

Music Directors | తెలుగు సినీ పరిశ్రమలో తాజాగా ఓ ఆసక్తికరమైన మార్పు స్పష్టంగా కనిపిస్తోంది. ఇప్పటివరకు నేపథ్య సంగీతం, పాటలతో మాత్రమే ప్రేక్షకులను మంత్రముగ్ధులను చేసిన మ్యూజిక్ డైరెక్టర్లు ఇప్పుడు కెమెరా ముందుకు వచ్చి కథానాయకులుగా కొత్త ప్రయాణం ప్రారంభిస్తున్నారు. ఈ పరిణామం తొలుత కోలీవుడ్‌లో కనిపించినా, ఇప్పుడు అదే తీరు టాలీవుడ్‌లోనూ కనిపిస్తుంది. తమిళ చిత్ర పరిశ్రమలో జీవీ ప్రకాష్ కుమార్, విజయ్ ఆంటోనీ, హిప్ హప్ తమిళ్ వంటి సంగీత దర్శకులు హీరోలుగా మారి సక్సెస్‌ను అందుకున్నారు. సంగీతంతో పాటు నటనలోనూ తమ సత్తా చాటుతూ ప్రత్యేక గుర్తింపు తెచ్చుకున్నారు. బాలీవుడ్‌లో హిమేష్ రేష్మియా కూడా ఇదే తరహా ప్రయోగంతో హీరోగా మారి తనకంటూ ఓ మార్క్ వేసుకున్నారు. ఈ ఉదాహరణలే ఇప్పుడు తెలుగు పరిశ్రమలో కొత్త ఆలోచనలకు బీజం వేస్తున్నాయి.

ఈ ట్రెండ్‌కు టాలీవుడ్‌లో ముందడుగు వేసిన వ్యక్తి దేవి శ్రీ ప్రసాద్. టాప్ మ్యూజిక్ డైరెక్టర్‌గా తనకంటూ ప్రత్యేక స్థానం సంపాదించుకున్న DSP, త్వరలోనే ‘ఎల్లమ్మ’ అనే చిత్రంలో హీరోగా ప్రేక్షకుల ముందుకు రానున్నారు. స్టేజ్‌పై పాటలు పాడుతూ డ్యాన్స్ చేస్తూ కనిపించే ఆయన ఎనర్జీని ఇప్పుడు వెండితెరపై పూర్తి స్థాయిలో చూడబోతున్నామన్న అంచనాలు పెరుగుతున్నాయి. ఇది ఆయన కెరీర్‌లోనే కాదు, టాలీవుడ్ ట్రెండ్‌లో కూడా కీలక మలుపుగా మారుతుందని సినీ వర్గాలు భావిస్తున్నాయి. ఇక మరో స్టార్ మ్యూజిక్ డైరెక్టర్ తమన్ కూడా మళ్లీ నటన వైపు అడుగులు వేయనున్నారన్న ప్రచారం ఊపందుకుంది. గతంలో ‘బాయ్స్’ సినిమాలో నటించిన అనుభవం ఉన్న తమన్, మళ్లీ కెమెరా ముందుకు వస్తే అది అభిమానులకు ప్రత్యేక ఆకర్షణగా మారనుంది. సంగీత దర్శకుడిగా టాప్ ఫామ్‌లో ఉన్న ఆయన, నటుడిగా ఎలా మెప్పిస్తారన్నది ఇప్పుడు చర్చనీయాంశం.

ఈ మార్పు కేవలం వ్యక్తిగత ప్రయోగంగా మాత్రమే కాకుండా, సినిమా పరిశ్రమలో కొత్త అవకాశాలకు తలుపులు తెరుస్తోంది. సంగీత దర్శకుల్లో ఉన్న స్టేజ్ ప్రెజెన్స్, నటనా నైపుణ్యం, డ్యాన్స్ సామర్థ్యం వంటి అంశాలు ఇప్పుడు కథానాయక పాత్రలకు మరింత బలం చేకూర్చే అవకాశముంది. ఇప్పటికే కోలీవుడ్‌లో సక్సెస్ అయిన ఈ ఫార్ములా, టాలీవుడ్‌లో కూడా ఫలిస్తుందా అన్న ఆసక్తి పెరుగుతోంది. మొత్తంగా చూస్తే, మ్యూజిక్ డైరెక్టర్లు మైక్ వెనుక నుంచి బయటకు వచ్చి హీరోలుగా మెరవడం ఇప్పుడు కొత్త చర్చకు దారి తీస్తోంది. DSP, తమన్ లాంటి పేరున్న సంగీత దర్శకులు ఈ దిశగా అడుగులు వేస్తుండటంతో, తెలుగు ప్రేక్షకులు ఈ కొత్త ట్రెండ్‌ను ఎలా స్వీకరిస్తారన్నదే రాబోయే రోజుల్లో తేలనుంది.