srael vs Iran | ఇజ్రాయెల్​–ఇరాన్​ : ఎవరి బలమెంత?

పశ్చిమాసియాలో ఇరాన్​ కయ్యానికి కాలు దువ్విన వేళ, ఇజ్రాయెల్​ వ్యూహం ఎలా ఉండబోతోందనేది ఇప్పుడు మిలియన్​ డాలర్​ ప్రశ్నగా మారిపోయింది.

Israel vs Iran : ప్రతీకారం తప్పదు అన్న నెతన్యాహు ప్రకటన సత్యదూరం కాబోదు. అయితే ఎప్పుడు? ఎలా అన్నదే చూడాలి. ఈ సందర్భంగా ఇరు దేశాలు తమ సైనిక బలం, బలగాలను మోహరిస్తే ఎవరి స్థాయి ఏంటి అనేది చూద్దాం. ఇరాన్​ చిన్న దేశమేమీ కాదు. ఇజ్రాయెల్​తో పోలిస్తే చాలా పెద్దది. అయితే దాని మిలిటరీ సామర్థ్యం కూడా ఇజ్రాయెల్​ కంటే ఎక్కువనా అనేది ఎవరికీ అంతగా తెలియదు. పైగా నిన్నటి దాడిలో ప్రయోగించిన 180 క్షిపణులు వృధా అయితే కాలేదు. ఇజ్రాయెల్​ గగనతల రక్షణ వ్యవస్థ ప్రపంచమంతా పేరెన్నిక గన్నది. మరి నిన్నటి దాడుల్లో అది ఏ మేరకు విజయవంతమైంది? ఎన్ని ఇరాన్​ క్షిపణులను కూల్చేసిందనేది కూడా ప్రశ్నే.  ఈ యుద్ధానికి మూల కారణమైన హమాస్​ దాడిని కూడా అప్పట్లో ఇజ్రాయెల్​ గగనతల రక్షణ వ్యవస్థ ప్రతిఘటించలేకపోయింది. ఈ దాడులు విజయవంతమయ్యాయని ఇరాక్​, పాలస్తీనాల్లో ప్రజలు వీధుల్లోకి వచ్చి నృత్యం చేసారు. మరి ఇది దేనికి సంకేతం? ఇజ్రాయెల్​ యుద్ధ సామర్థ్యాన్ని తనను తాను, ఇతర దేశాలు ఎక్కువ ఊహించుకుంటున్నాయా అనే సందేహం కలుగుతోంది.  అయితే సాంకేతికంగా ఇజ్రాయెల్​ ఇరాన్​ కంటే, ప్రపంచంలోని చాలా దేశాల కంటే ఎంతో ముందున్నది.  ఈ యుద్ధం ముంగిట ఎవరి మిలిటరీ సామర్థ్యమెంతో చూద్దాం.

సైనిక బలగం (Military strength):

ఇజ్రాయెల్​కు 1,70,000ల మంది సైనికులు, 4,65,000 మంది రిజర్వ్​ దళాలు, 35వేల మంది పారా మిలిటరీ బలగం ఉంది. అదే ఇరాన్​కు 6,10,000ల మంది సైనికులు, 3,50,000ల మంది రిజర్వ్​ బలగం, 2,20,00ల మంది పారామిలిటరీ శక్తి ఉంది. ఇక్కడ స్పష్టంగా ఇరాన్​దే అధిపత్యం.

భూతల యుద్ధ వ్యవస్థలు (Land forces)  :

ఇజ్రాయెల్​ 1370 ట్యాంకులు, 43,407 సాయుధ శకటాలతో పాటు 650 స్వయంచాలిత ఫిరంగి వ్యవస్థలు, 150 రాకెట్​ ఫిరంగులను కలిగిఉండగా, ఇరాన్​కు​ 1996 ట్యాంకులు, 65, 765 సాయుధ శకటాలతో పాటు 580  స్వయంచాలిత ఫిరంగి వ్యవస్థలు, 775 రాకెట్​ ఫిరంగులున్నాయి. ఇక్కడా ఇరాన్​దే ఆధిక్యం.

గగనతల సామర్థ్యం (Air power):

ఇజ్రాయెల్​కు మొత్తంగా 612 యుద్ధ విమానాలు, హెలీకాప్టర్లు, ఇతరాలు ఉన్నాయి. ఇందులో 241 ఫైటర్​ జెట్లు, 146 హెలీకాప్టర్లు, ఇంకా ఇతర వాహనాలు ఉన్నాయి. అదే ఇరాన్​కు 551 యుద్ధ విమానాలు, ఇందులో 186 ఫైటర్​ జెట్లు, 102 హెలీకాప్టర్లు, ఇంకా ఇతరాలు ఉన్నాయి. ఇక్కడ ఇజ్రాయెల్​ ఆధిక్యంలో ఉంది.

నావికాదళ సామర్థ్యం (Naval capabilities ):

ఈ వ్యవస్థలో ఇజ్రాయెల్​ కనిపించేంత బలహీనమే. దానికి ఒక్క యుద్ధనౌక కూడా లేకపోగా, ఏడు మాత్రమే రక్షణ నౌకలున్నాయి. జలాంతర్గాములు 5 ఉండగా, గస్తీ నౌకలు 45 ఉన్నాయి. మందుపాతర వ్యవస్థ ఒకటి కూడా లేదు. అదే ఇరాన్​కు 7 యుద్ధనౌకలు, 3 రక్షణ నౌకలు, 19 జలాంతర్గాములు, 21 గస్తీ నౌకలు, ఒక మందుపాతర వ్యవస్థలు ఉన్నాయి. ఇక్కడ కూడా స్పష్టంగా ఇరాన్​దే ఆధిపత్యం.

ఈ ప్రకారంగా చూస్తే ఇరాన్​ ఆధిక్యం స్పష్టంగా ఉంది. ఒక్క గగనతల వ్యవస్థల్లోనే ఇజ్రాయెల్​ కొంచెం మెరుగ్గా ఉంది. మరి ఇజ్రాయెల్​ ఎలా ధైర్యం చేస్తోంది? అమెరికా తన అన్ని దళాలను సాయంగా పంపుతోంది. అది ఇక్కడ ఇజ్రాయెల్​కు లాభమే. అమెరికా ఇజ్రాయెల్​ తరపున పూర్తిస్థాయిలో పోరాడుతుంది కాబట్టి, తన బలగాలన్నీ ఇజ్రాయెల్​విగానే భావించాలి. అప్పుడు ఇజ్రాయెల్​ శక్తి అపారంగా పెరుగుతుంది. బహుశా ఇదే ఆ ధైర్యమేమో.