Donald Trump tariffs| ఆమె మాట్లాడిన తీరు నచ్చలేదని స్విస్ పై టారీఫ్ ల పెంపు: ట్రంప్‌ తెంపరితనం

స్విట్జర్లాండ్‌ ఫెడరల్‌ కౌన్సిల్‌ సభ్యురాలు కరీన్‌ కెల్లర్‌ సుట్టన్‌ తనతో మాట్లాడిన తీరు బాగోలేదని, అందుకే ఆ దేశంపై అదనంగా 9 శాతం టారిఫ్‌లు విధించినట్లు అమెరికా అధ్యక్షుడు డోనాల్డ్ ట్రంప్ పేర్కొనడం ప్రపంచాన్ని విస్మయపరిచింది.

విధాత: స్విట్జర్లాండ్‌ ఫెడరల్‌ కౌన్సిల్‌ సభ్యురాలు కరీన్‌ కెల్లర్‌ సుట్టన్‌ తనతో మాట్లాడిన తీరు బాగోలేదని, అందుకే ఆ దేశంపై అదనంగా 9 శాతం టారిఫ్‌లు విధించినట్లు అమెరికా అధ్యక్షుడు డోనాల్డ్ ట్రంప్ పేర్కొనడం ప్రపంచాన్ని విస్మయపరిచింది. ట్రంప్ చర్యలు సామ్రాజ్యవాద పోకడకు పరాకాష్టగా విమర్శలు వినిపిస్తున్నాయి. స్విట్జర్లాండ్‌పై 30 శాతం సుంకాలు విధించడంతో నాకు కాల్‌ వచ్చింది అని.. నేను కెల్లర్‌ను స్విస్‌ ప్రధాని అని భావించానని ట్రంప్ ఫాక్స్ బిజినెస్‌కు ఇచ్చిన ఇంటర్వ్యూలో తెలిపారు. ఫోన్ కాల్ లో తమది చాలా చిన్నదేశమని, అన్ని సుంకాలు భరించలేమని..సుంకాలు తగ్గించాలని పదే పదే స్విస్ ప్రతినిధి కోరిందని ట్రంప్‌ వెల్లడించారు.

అయితే స్విస్ నాయకురాలు తనతో మాట్లాడిన విధానం నచ్చకపోవడంతో స్విట్జర్లాండ్‌పై అదనంగా తొమ్మిది శాతం సుంకాలను పెంచాలని ఆదేశించానని అమెరికా అధ్యక్షుడు డొనాల్డ్ ట్రంప్ చెప్పుకొచ్చారు. సుంకాన్ని వెనక్కి తీసుకోవాలని కోరుతూ స్విస్ నాయకురాలు తనతో మాట్లాడిన విధానం తనకు నచ్చలేదని ట్రంప్ అన్నారు. అలాగే తనతో ఫోన్ లో మాట్లాడిన స్విట్జర్లాండ్‌ ఫెడరల్‌ కౌన్సిల్‌ సభ్యురాలు కరీన్‌ కెల్లర్‌ సుట్టన్‌ ను ఆ దేశ ప్రధాని అనుకున్నట్లుగా ట్రంప్ చెప్పడం మరింత అశ్చర్యపరిచింది.

వాస్తవానికి  స్విట్జర్లాండ్‌కు ప్రధాన మంత్రి లేదా కార్యనిర్వాహక అధ్యక్షుడు లేరు. బదులుగా ఆ దేశం ఏడుగురు సభ్యుల ఫెడరల్ కౌన్సిల్ ద్వారా సమిష్టిగా పరిపాలించబడుతుంది. స్విస్ పాలకవర్గం అవగాహాన లేనట్లుగా ట్రంప్ వ్యాఖ్యలు ఉండటం అశ్చర్యపరిచింది.

ముందు 30శాతం..మాటలు నచ్చలేదని 39శాతానికి పెంపు

స్విట్జర్లాండ్ పై నేను 30 శాతం సుంకం విధించాను, అది చాలా తక్కువ.. అప్పుడు నాకు స్విట్జర్లాండ్ ప్రధానమంత్రి నుండి అత్యవసర కాల్ వచ్చింది, ఆమె చాలా దూకుడుగా మాట్లాడిందని..పదేపదే ‘సార్, మాది చిన్నదేశం..ఇంత సుంకాల పెంపు భరించలేమంటూ చెప్పుకొచ్చిందని, ఆమె వాయిస్ బాగుండటంతో నేను ఆమెను ఫోన్ నుండి దూరం చేయలేకపోయాను అని ట్రంప్ చెప్పుకొచ్చాడు. ఆమె నాతో ఫోన్ లో మాట్లాడిన విధానం నాకు నిజంగా నచ్చలేదు అని, అందుకే సుంకాల తగ్గింపుకు బదులుగా నేను దానిని 30శాతం నుంచి 39 శాతానికి పెంచాను అని ఆయన ట్రంప్ వెల్లడించారు. ‘మీది చిన్న దేశమైనప్పటికీ, అమెరికాతో 42 బిలియన్ డాలర్ల భారీ వాణిజ్య లోటును ఎదుర్కొంటోందని స్విస్ నాయకురాలికి తాను చెప్పానని ట్రంప్ తన ఇంటర్వ్యూలో పేర్కొన్నారు.

అంతేగాకుండా అమెరికాకు వస్తువులను ఎగుమతి చేస్తూనే స్విట్జర్లాండ్ ఎటువంటి సుంకాలు చెల్లించడం లేదంటూ ట్రంప్ చెప్పడం మరింత గందరగోళానికి గురి చేసింది. కొన్ని వారాల క్రితం దావోస్‌లో జరిగిన ప్రపంచ ఆర్థిక వేదిక దావోస్ కు వెళ్లిన సందర్బంలో ఇచ్చిన ఇంటర్య్యూలో ట్రంప్ ఇలాంటి వ్యాఖ్యలు చేశారు.

అయితే, 2028 చివరి నాటికి అమెరికాలో 200 బిలియన్ డాలర్లు పెట్టుబడి పెట్టడానికి స్విస్ పరిశ్రమ కట్టుబడి ఉండటంతో, సుంకం రేటును 15 శాతానికి తగ్గించడానికి అమెరికా, స్విస్ ప్రతినిధులు నవంబర్‌లో ప్రాథమిక ఒప్పందానికి రావడం ఈ సందర్బంగా గమనార్హం. ఈ నేపథ్యంలో ట్రంప్ సుంకాల పెంపు వ్యాఖ్యల ఇంటర్వ్యూ స్విస్ పాలకులను కలవర పెట్టింది.