వీడియోలు తీశాడు, బెదిరించాడు – ప్రజ్వల్ రేవణ్ణకు జీవితాంతం జైలు!

ప్రజ్వల్ రేవణ్ణపై లైంగిక దాడి కేసులో కోర్టు జీవిత ఖైదు విధించి సంచలనం సృష్టించింది. దేవెగౌడ మనవడిగా,  ఎంపీగా ఉన్నప్పటికీ బాధితురాలిపై అత్యాచారానికి పాల్పడ్డారని కోర్టు తేల్చింది. మహిళలపై విచక్షణ లేని ‌‌‌‌దాడులకు పాల్పడిన వారికి ఎంత రాజకీయ శక్తి ఉన్నా న్యాయం ముందు నిలవలేదని ఈ తీర్పు చాటింది.

దేశ రాజకీయాల్లో అత్యంత సంచలన ఘట్టంగా ప్రజ్వల్ రేవణ్ణ అత్యాచార కేసు నిలిచింది. దేశ మాజీ ప్రధాని దేవెగౌడ మనవడు, మాజీ ముఖ్యమంత్రి కుమారస్వామి మేనల్లుడు అయిన ప్రజ్వల్ రేవణ్ణపై గత కొన్ని నెలలుగా వెల్లువెత్తుతున్న లైంగిక దాడుల ఆరోపణలు ఎట్టకేలకు న్యాయస్థానంలో నిశిత విచారణకు లోనయ్యాయి. బెంగళూరులోని ఎంపీలు, ఎమ్మెల్యేలపై నమోదైన క్రిమినల్ కేసుల విచారణకు ఏర్పాటైన ప్రత్యేక సెషన్స్ కోర్టు ప్రజ్వల్‌ను నేరస్థుడిగా తేల్చి, జీవితాంతం కఠిన కారాగార శిక్షను విధించింది. అత్యాచార బాధితురాలిపై తీసిన వీడియోలు సామాజిక మాధ్యమాల్లో వైరల్ కావడంతో వెలుగులోకి వచ్చిన ఈ కేసు రాజకీయంగానే కాకుండా నైతికంగా, మానవీయంగా పెద్ద దుమారమే రేపింది.

2021లో హసన్ జిల్లాలోని హోలెనరసిపురలో ఉన్న రేవణ్ణ కుటుంబానికి చెందిన ఫాం హౌస్‌లో ఇంటి పనిచేసే 48 ఏళ్ల మహిళపై అతను పలు మార్లు లైంగిక దాడికి పాల్పడ్డాడని బాధితురాలు పోలీసులకు ఇచ్చిన ఫిర్యాదులో పేర్కొన్నారు. ఈ అత్యాచారాన్ని ప్రజ్వల్ స్వయంగా వీడియో తీసి, అది బయటపెడతానని బెదిరింపులకు పాల్పడి, మౌనం పాటించమని ఆదేశించాడట. మొదట బాధితురాలు భయంతో ఎక్కడా ఫిర్యాదు చేయలేకపోయినప్పటికీ, ఆ వీడియోలు మీడియాలో తిరుగుతుండటంతో శారీరకంగా, మానసికంగా ఆమెలో ఆందోళన మొదలైంది. ఆ స్థితిలో ఆమె ఆత్మహత్యకు ప్రయత్నించాలనే ఆలోచనల్లోకి కూడా వెళ్ళినట్టు ప్రత్యేక పబ్లిక్ ప్రాసిక్యూటర్ బీఎన్ జగదీశ్ కోర్టుకు తెలిపారు. ఇది ప్రజ్వల్ క్రూరమైన మానసిక స్థితిని స్పష్టం చేస్తోందని, రాజకీయ నేతగా ఉండి చట్టం గురించి పూర్తిగా తెలిసి కూడా ఇటువంటి నేరాలు చేయడం అసహ్యకరమని న్యాయవాది స్పష్టం చేశారు.

ఇలాంటి ఘోరమైన నేరాలకు కఠిన శిక్ష తప్పనిసరని న్యాయవాది వాదించారు. ఇది ఒక ప్రత్యేక సంఘటన కాదని, ప్రజ్వల్ అనేకమంది మహిళలపై లైంగిక దాడులకు పాల్పడి, వీడియోలు తీసి వాటిని బ్లాక్ మెయిల్‌కు వాడిన అనుభవజ్ఞుడని చెప్పారు. ఈ కేసులో కోర్టు అతనిపై భారత శిక్షా స్మృతి (IPC) సెక్షన్ 376(2) ప్రకారం జీవితకాల శిక్ష విధించడమే కాకుండా, ఐటీ చట్టం సెక్షన్ 66E ప్రకారం మూడు సంవత్సరాల అదనపు శిక్ష విధించింది. అంతేగాకుండా బాధితురాలికి రూ.11 లక్షల పరిహారాన్ని కూడా ఇవ్వాలని పేర్కొంది.

తీర్పు వెలువడే ముందు ప్రజ్వల్ కోర్టులో కన్నీటి పర్యంతమయ్యాడు. తాను ఇంజినీరింగ్‌ పూర్తి చేసిన విద్యార్థి, మెరిట్‌లో ఉండేవాడిని, తల్లిదండ్రులను గత ఆరు నెలలుగా చూడలేదని చెప్పాడు. “ఎన్నికల సమయంలోనే ఈ ఆరోపణలు ఎందుకు వచ్చాయి? నేను ఎంపీగా ఉన్నపుడు ఎవరూ ఈ విషయంలో నన్ను నిందించలేదు. ఎందుకు ఇప్పుడు ఇలా జరుగుతోంది?” అంటూ కోర్టులో విచారం వ్యక్తం చేశాడు. తనపై కుట్ర జరుగుతోందన్న భావనను కూడా వ్యక్తీకరించే ప్రయత్నం చేశాడు. అయితే కోర్టు మాత్రం అతని వాదనలను ఉపేక్షించకుండా, నేరం తీవ్రంగా ఉన్నందున జీవిత ఖైదు తప్పదని తేల్చింది. ఈ కేసు గత ఏడాది ఏప్రిల్‌లో జరిగిన లోక్‌సభ ఎన్నికల సమయంలో ఒక్కసారిగా వెలుగులోకి వచ్చింది. హసన్ లోక్‌సభ స్థానం నుంచి ప్రజ్వల్ పోటీ చేసిన తెల్లవారే సోషల్ మీడియాలో వీడియోలు వైరల్ కావడంతో పెద్ద దుమారం రేగింది. అనేకమంది మహిళలపై లైంగిక దాడులకు సంబంధించిన దృశ్యాలు బయటకు వచ్చి, ప్రజ్వల్ పతనానికి నాంది పలికాయి. ఘటన వెలుగులోకి రాగానే అతను జర్మనీకి పారిపోయినప్పటికీ, మేలో తిరిగి వచ్చి అరెస్టయ్యాడు. అతనిపై మొత్తం నాలుగు లైంగిక దాడి కేసులు నమోదయ్యాయి. ప్రస్తుత తీర్పు మొదటి కేసుకు సంబంధించినదిగా పేర్కొనబడింది. మిగిలిన కేసులపై విచారణ కొనసాగుతోంది.

ఈ తీర్పుతో ప్రభావవంతులు, రాజకీయంగా శక్తివంతులైనవారు కూడా చట్టానికి అతీతులు కారనే సందేశాన్ని న్యాయ వ్యవస్థ స్పష్టంగా ఇచ్చిందని న్యాయవాది వ్యాఖ్యానించారు. ధనవంతులు, నాయకులు చట్టం నుంచి తప్పించుకుంటారని ఉండే అపోహను ఈ తీర్పు తొలగించిందని ఆయన అభిప్రాయపడ్డారు. ఇది న్యాయ వ్యవస్థకు, బాధితులకు న్యాయం కలిగించడంలో ఒక మార్గదర్శకమైన తీర్పుగా చరిత్రలో నిలుస్తుందనే అభిప్రాయాలు వెల్లువెత్తుతున్నాయి.