Ramayana | ఓటీటీ మార్కెట్‌లో రామాయ‌ణ హ‌వా.. వార‌ణాసిని మించి మరీ.. ?

Ramayana | భారతీయ చలనచిత్ర పరిశ్రమలో ఓటీటీ బిజినెస్ రోజు రోజుకీ కొత్త రికార్డులను సృష్టిస్తూ ముందుకు సాగుతోంది. ఒకప్పుడు థియేటర్ కలెక్షన్లు మాత్రమే సినిమా విజయాన్ని నిర్ణయించేవి. కానీ ఇప్పుడు డిజిటల్ రైట్స్, శాటిలైట్ డీల్స్, ఓవర్సీస్ మార్కెట్ కలిసి సినిమా బిజినెస్‌ను భారీ స్థాయికి తీసుకెళ్లాయి. తాజాగా వస్తున్న వార్తలు చూస్తే ఈ మార్కెట్ మరింత అంచనాలకు మించిన స్థాయికి చేరుకున్నట్టు స్పష్టమవుతోంది.

By: Sandeep | news | Published on : Apr 04, 2026 12:24 PM IST

Ramayana | ఓటీటీ మార్కెట్‌లో రామాయ‌ణ హ‌వా.. వార‌ణాసిని మించి మరీ.. ?

ప్రస్తుతం దర్శక ధీరుడు ఎస్‌.ఎస్‌. రాజమౌళి తెరకెక్కిస్తున్న భారీ అడ్వెంచర్ చిత్రం వారణాసి (SSMB29) కోసం దాదాపు రూ. 650 కోట్ల ఓటీటీ డీల్ చర్చల్లో ఉందన్న వార్తలు ఇండస్ట్రీలో సంచలనం సృష్టిస్తున్నాయి. రాజమౌళి బ్రాండ్, గ్లోబల్ మార్కెట్‌లో ఆయనకు ఉన్న క్రేజ్ దృష్ట్యా ఈ అంకె అసాధ్యం కాదని ట్రేడ్ విశ్లేషకులు అభిప్రాయపడుతున్నారు.

అయితే ఇదే సమయంలో దర్శకుడు నితీష్ తివారీ రూపొందిస్తున్న ప్రతిష్టాత్మక మైథాలజికల్ చిత్రం రామాయణం కోసం ఏకంగా రూ. 1000 కోట్ల డిజిటల్ రైట్స్ ఆశిస్తున్నారనే ప్రచారం మరింత హాట్ టాపిక్‌గా మారింది. భారతీయ సినీ చరిత్రలో ఇప్పటివరకు ఏ సినిమాకూ ఈ స్థాయి డిమాండ్ వినిపించకపోవడం గమనార్హం.

ఇప్పటి మార్కెట్ రియాలిటీ ఏమిటి?

ప్రస్తుతం ఉన్న ట్రెండ్‌ను పరిశీలిస్తే, భారీ క్రేజ్‌తో వచ్చిన పుష్ప 2 సినిమాకే డిజిటల్ రైట్స్ రూ. 275–300 కోట్ల మధ్యే ఫిక్స్ అయ్యాయి. ఈ నేపథ్యంలో ఒక్క సినిమాకే రూ. 500 కోట్లకు పైగా ఇవ్వడంపై ఓటీటీ సంస్థలు జాగ్రత్తగా వ్యవహరిస్తున్నాయి.

రామాయణంను రెండు భాగాలుగా తీస్తున్నారని ప్రచారం ఉన్నా… ఒక్కో పార్ట్‌కు రూ. 500 కోట్ల చొప్పున పెట్టుబడి పెట్టడం ఓటీటీ ప్లాట్‌ఫార్మ్‌లకు పెద్ద రిస్క్‌గా మారే అవకాశం ఉంది. ఎందుకంటే ఈ స్థాయి పెట్టుబడికి రిటర్న్స్ రావాలంటే సినిమా అంతర్జాతీయంగా భారీ విజయాన్ని నమోదు చేయాలి.

భారీ బడ్జెట్ – భారీ అంచనాలు

ఈ చిత్ర బడ్జెట్ దాదాపు రూ. 4000 కోట్లుగా ప్రచారం జరుగుతుండటం వల్లే నిర్మాతలు ఓటీటీ రైట్స్ ద్వారా పెద్ద మొత్తాన్ని రికవర్ చేయాలని చూస్తున్నారని టాక్ వినిపిస్తోంది. ఇప్పటికే ఒక ప్రముఖ ఓటీటీ సంస్థ రూ. 700 కోట్ల ఆఫర్ ఇచ్చిందని, కానీ నిర్మాతలు తిరస్కరించారనే వార్తలు కూడా వినిపిస్తున్నాయి.

రాజమౌళి ఉంటే కథ వేరేలా ఉండేదా?

ఇదే ప్రాజెక్ట్‌ను ఎస్‌.ఎస్‌. రాజమౌళి తెరకెక్కించి ఉంటే పరిస్థితి పూర్తిగా మారేదని నిపుణులు అంటున్నారు. బాహుబలి 2, ఆర్ఆర్ఆర్ వంటి చిత్రాలతో ఆయన ప్రపంచవ్యాప్తంగా సంపాదించిన గుర్తింపు వల్ల రూ. 1000 కోట్ల డీల్ కూడా సాధ్యమేనని భావిస్తున్నారు.

హైప్ క్రియేషన్ స్ట్రాటజీనా?

మార్కెట్‌లో రూ. 1000 కోట్ల ఫిగర్ వినిపించడం వెనుక పబ్లిసిటీ స్ట్రాటజీ కూడా ఉండొచ్చని ట్రేడ్ వర్గాలు చెబుతున్నాయి. ఈ రకమైన భారీ అంకెల ప్రచారం వల్ల సినిమాపై దేశవ్యాప్తంగా చర్చ పెరిగి, థియేట్రికల్ మరియు శాటిలైట్ బిజినెస్‌లో రేట్లు పెరగడానికి ఉపయోగపడుతుంది.

అయితే ఇటీవల విడుదలైన ప్రోమోషనల్ కంటెంట్‌పై సోషల్ మీడియాలో మిశ్రమ స్పందన రావడం కూడా డిజిటల్ డీల్‌పై ప్రభావం చూపే అవకాశం ఉందని విశ్లేషకులు హెచ్చరిస్తున్నారు.

ఫైనల్‌గా ఏమవుతుంది?

ఒకవేళ రామాయణం మొదటి భాగం బాక్సాఫీస్ వద్ద బాహుబలి 2 లేదా ఆర్ఆర్ఆర్ స్థాయిలో భారీ వసూళ్లు సాధిస్తే… అప్పుడు రెండు భాగాలకు కలిపి రూ. 1000 కోట్ల డీల్ సాధ్యమవుతుంది. లేదంటే ఇది ప్రస్తుతం కేవలం అంచనాలు, హైప్ వరకే పరిమితమయ్యే అవకాశమే ఎక్కువ.