Dead Girl Revives | మరణించిందని ప్రకటించాక బతికొచ్చిన బాలిక : అవాక్కయిన డాక్టర్లు

పశ్చిమ బెంగాల్‌లో మృతిగా ప్రకటించిన 14 ఏళ్ల బాలిక అంబులెన్స్ టెక్నీషియన్ అప్రమత్తతతో మళ్లీ ప్రాణాలతో బయటపడింది. ఏడు రోజుల చికిత్స తర్వాత కోలుకుని ఆసుపత్రి నుంచి డిశ్చార్జ్ అయ్యింది.

Teen Girl Declared Dead Comes Back to Life in West Bengal | Miraculous Revival Shocks Doctors

విధాత వైరల్​ డెస్క్​ | హైదరాబాద్​:

Dead Girl Revives | పశ్చిమ బెంగాల్‌లోని తూర్పు మిడ్నాపూర్​ జిల్లాలో చోటుచేసుకున్న ఓ సంఘటన దేశవ్యాప్తంగా సంచలనం సృష్టిస్తోంది. క్రిమిసంహారక మందు తాగి అపస్మారక స్థితికి చేరిన 14 ఏళ్ల బాలికను పరీక్షించిన వైద్యులు అమ్మాయి మృతిచెందినట్టుగా ప్రకటించారు. కుటుంబసభ్యులు, బంధువులు అంతిమ సంస్కారాల ఏర్పాట్లు కూడా చేసారు. కానీ అప్పుడే ఓ అద్భుతం జరిగింది. అంబులెన్స్ ఐసీయూ టెక్నీషియన్ అప్రమత్తతతో ఆమెకు మళ్లీ ప్రాణం పోసిన ఘటన ఇప్పుడు ‘అద్భుత రక్షణ’గా మారింది.

ఈ సంఘటన వైద్యుల నిర్లక్ష్యం, బాధ్యత, మానవత్వం గురించి కీలక ప్రశ్నలు లేవనెత్తుతోంది.

క్రిమిసంహారక మందు తాగిన అమ్మాయి : కుటుంబ కలహాలే కారణం

తూర్పు మిడ్నాపూర్​ జిల్లా ఎరాఫత్‌పూర్ గ్రామానికి చెందిన 14 ఏళ్ల బాలిక, ఇటీవల కుటుంబంలో నెలకొన్న కలహాల కారణంగా తీవ్ర మానసిక ఒత్తిడికి లోనైంది. తన చదువు విషయంలో తల్లిదండ్రులతో ఏర్పడిన విభేదాల నేపథ్యంలో ఆమె పురుగులమందు (పెస్టిసైడ్) తాగింది. పరిస్థితి విషమించడంతో కుటుంబ సభ్యులు వెంటనే సమీపంలోని ఆసుపత్రులకు తీసుకెళ్లారు. పలు ఆసుపత్రుల్లో చికిత్స అందకపోవడంతో చివరకు తమ్లుక్‌లోని ఓ ప్రైవేట్ నర్సింగ్ హోమ్‌కు తరలించారు. అక్కడి వైద్యులు ఆమె మృతి చెందినట్టు ప్రకటించారు. తరువాత మరో ఆసుపత్రిలో కూడా వైద్యుడు చనిపోయిందని ధృవీకరించడంతో కుటుంబం ఆమె మరణించిందని నమ్మింది.

అంత్యక్రియల వేళ జరిగిన అద్భుతం : అంబులెన్స్​ టెక్నిషియన్​ అప్రమత్తత

బాలిక మృతి చెందినట్టు భావించిన కుటుంబ సభ్యులు సంప్రదాయ రీతుల్లో ప్రార్థనలు నిర్వహించారు. మసీదుల మైక్ ద్వారా మరణ వార్తను ప్రకటించారు. సమాధి తవ్వకం కూడా పూర్తయ్యింది. అయితే అదే సమయంలో ఐసీయూ అంబులెన్స్ టెక్నీషియన్ రవీంద్రనాథ్ మండల్ బాలిక శరీరంలో నాడి బలహీనంగా కొట్టుకుంటోందని గుర్తించాడు. వెంటనే కుటుంబ సభ్యులను అప్రమత్తం చేసి మరోసారి ఆసుపత్రికి తీసుకెళ్లాలని సూచించాడు.

ఆయన పట్టుదలతో బాలికను చివరిసారిగా కంటాయ్​ సబ్-డివిజనల్ ఆసుపత్రికి తరలించారు. అక్కడ వైద్యులు ఆమెను ఐసీయూలో చేర్చి తక్షణ చికిత్స ప్రారంభించారు. వైద్యుల కృషి, సమయస్ఫూర్తితో ఆమె నెమ్మదిగా స్పందించడం ప్రారంభించింది.

7 రోజుల చికిత్స తర్వాత కోలుకున్న బాలిక : ప్రాణదాతలకు సత్కారం

ఏడు రోజుల పాటు ఐసీయూలో చికిత్స అందించడంతో బాలిక పూర్తిగా కోలుకుంది. బుధవారం ఆమెను ఆసుపత్రి నుంచి డిశ్చార్జ్ చేశారు.

ఆసుపత్రి సిబ్బంది, అంబులెన్స్ టెక్నీషియన్, వైద్యులకు కృతజ్ఞతగా బాలిక స్వయంగా పూలమాలలు వేసి సత్కరించింది. ఈ దృశ్యాలు స్థానికంగా భావోద్వేగ వాతావరణాన్ని సృష్టించాయి. ఈ సందర్భంగా ఆసుపత్రి సూపరింటెండెంట్ అరూప్ రతన్ కరన్ మాట్లాడుతూ— “లిఖితపూర్వక ఫిర్యాదు వస్తే, మృతిగా ప్రకటించిన వైద్యులపై విచారణ చేసి చర్యలు తీసుకుంటాం. బాలిక ప్రాణాలను కాపాడగలగడం మా ఆసుపత్రికి గర్వకారణం.” అని తెలిపారు.

ఈ ఘటన వైద్యుల నిర్లక్ష్యంపై ప్రశ్నలు లేవనెత్తడమే కాకుండా, ఒక వ్యక్తి అప్రమత్తత ఎలా ఓ ప్రాణాన్ని కాపాడుతుందో చాటిచెప్పింది.

మరణానికి అతి సమీపంలోకి వెళ్లి మళ్లీ జీవితం పొందిన ఈ బాలిక కథ… మానవత్వానికి, బాధ్యతకు, అప్రమత్తతకు నిలువెత్తు ఉదాహరణగా నిలిచింది. ఒక చిన్న నిర్లక్ష్యం ప్రాణాలు లేవంటే, ఒక చిన్న జాగ్రత్త జీవితం ఇస్తుందని ఈ ఘటన మరోసారి నిరూపించింది.