Vishwambhara | ప్రేయసి కోసం బ్రహ్మలోకానికి పయనమయ్యే ‘విశ్వంభర’

చిరంజీవి మళ్లీ ఫాంటసీ జానర్‌లో అడుగుపెట్టిన ‘విశ్వంభర’ 14 లోకాల కథతో ప్రత్యేకత సంతరించుకుంది. హీరోయిన్ రక్షణ కోసం సాగే ఈ అద్భుత కథకు అంతర్జాతీయ వీఎఫ్‌ఎక్స్ టీమ్ పనిచేసింది. ‘విశ్వంభర’ చిత్రానికి చెందిన టీజర్‌పై వచ్చిన విమర్శలు, వాటిపై దర్శకుడు వశిష్ఠ స్పందన, సెకండ్ హాఫ్ మొత్తం వీఎఫ్‌ఎక్స్‌తో నిండిపోతుందనే వివరాలతో పాటు దర్శకుడు స్టోరీలైన్​ చెప్పడంతో సినిమాపై అంచనాలు మరింతగా పెరిగాయి.

• ‘విశ్వంభర’లో చిరంజీవి 14 లోకాల అద్భుత యాత్ర
• టీజర్‌పై విమర్శలు – వీఎఫ్‌ఎక్స్ నాణ్యతపై దర్శకుడు క్లారిటీ
•  ‘ఖైదీ’ పాట రీమేక్‌తో మౌనీరాయ్‌తో చిరంజీవి మెలికలు
•  అక్టోబరులో ప్రేక్షకుల ముందుకు రానున్న విశ్వంభర సినిమా

మెగాస్టార్ చిరంజీవి నటిస్తున్న ‘విశ్వంభర’ చిత్రం పాన్-ఇండియా స్థాయి ఫాంటసీ జానర్‌లో భారీ అంచనాలను సృష్టిస్తోంది. వశిష్ఠ దర్శకత్వం వహిస్తున్న ఈ చిత్రానికి సంబంధించిన కథపై ఇప్పటికే అనేక రకాల రూమర్స్ వచ్చినప్పటికీ, తాజాగా వాటికి తెరదించుతూ, దర్శకుడు స్వయంగా కథాంశాన్ని వెల్లడించారు. ఆయన ప్రకారం, సృష్టిలో మొత్తం 14 లోకాలు ఉన్నాయని, 7 పై లోకాలు, 7 కింది లోకాలని, ఇప్పటివరకు యమలోకం, స్వర్గం, పాతాళం వంటి కొన్ని మాత్రమే సినిమాల్లో చూసినా, ‘విశ్వంభర’లో వీటన్నింటినీ మించి బ్రహ్మదేవుడు నివసించే సత్యలోకాన్ని చూపించబోతున్నామని తెలిపారు. హీరో ఆ లోకానికి ఎలా వెళ్తాడు, ప్రేయసిని ఎలా తిరిగి తెచ్చుకుంటాడు, అసలు నాయిక అక్కడెలా, ఎందుకు వెళ్లిందనేదే ఈ కథకి ప్రాణం అని దర్శకుడు అన్నారు.

గతేడాది విడుదలైన టీజర్‌పై వచ్చిన విమర్శలపై ఆయన స్పందిస్తూ, వచ్చిన నెగిటివ్ కామెంట్స్ అన్నీ కావాలని చేసినట్టుగా  అనిపించాయని, యూట్యూబ్ మరియు టీవీల్లో చూసిన వారికి ఒకలా అనిపించగా, థియేటర్లలో చూడగానే మరోలా అనిపించిందని చెప్పారు. రెండు గంటలకు పైగా నిడివి గల ఈ చిత్రంలో సుమారు 70 శాతం విజువల్ ఎఫెక్ట్స్ ఉంటాయని, ముఖ్యంగా సెకండ్ హాఫ్ మొత్తం గ్రాఫిక్స్‌తో నిండిపోతుందని వెల్లడించారు. ప్రపంచస్థాయి వీఎఫ్‌ఎక్స్ సృష్టించేందుకు టాప్ ఇంటర్నేషనల్ కంపెనీలు పనిచేస్తున్నాయని, అత్యున్నత నాణ్యత కోసం ప్రత్యేక శ్రద్ధ తీసుకుంటున్నామని ఆయన వివరించారు.

‘జగదేకవీరుడు అతిలోక సుందరి’, ‘అంజి’ తర్వాత చిరంజీవి ఫాంటసీ జానర్‌లో నటించడం ఇదే మొదటిసారి కావడంతో అభిమానుల్లో ఉత్సాహం రెట్టింపైంది. త్రిష హీరోయిన్‌గా నటిస్తుండగా, ఆషికా రంగనాథ్, సురభి, ఇషా చావ్లా తదితరులు కీలక పాత్రల్లో కనిపించనున్నారు. నాగిని సీరియల్‌తో ఫేమస్ అయిన మౌనీరాయ్ ఓ స్పెషల్ సాంగ్‌లో చిరంజీవితో స్క్రీన్ షేర్ చేసుకోనుందని సమాచారం. చిరంజీవి క్లాసిక్ హిట్ ‘ఖైదీ’(Khaidi)లోని ‘రగులుతోంది మొగలిపొద’ పాటను రీమేక్ చేసి, ప్రత్యేక గీతంగా వాడనున్నారని వార్తలు వస్తున్నాయి.

సినిమా షూటింగ్ దాదాపు చివరి దశలో ఉంది. ఇంకా రెండు రోజుల ప్యాచ్ వర్క్, స్పెషల్ సాంగ్ మాత్రమే మిగిలి ఉండగా, జూలై 25 నుంచి చివరి షెడ్యూల్‌ను పూర్తి చేసి, ఈ ఏడాది అక్టోబరులో విడుదల చేయాలని మేకర్స్ యోచిస్తున్నారు.