Aggipetti macha | సోషల్ మీడియా స్టార్ ‘అగ్గిపెట్టె మచ్చా’ గల్లంతా?… కుటుంబ ఆవేదనతో పెరిగిన ఆందోళన

Aggipetti macha | సోషల్ మీడియాలో యువతను ఆకట్టుకుని ఒక్కసారిగా ప్రాచుర్యం పొందిన ‘అగ్గిపెట్టె మచ్చా’ ప్రస్తుతం కనిపించకపోవడం తీవ్ర చర్చకు దారితీసింది. ఆంధ్రప్రదేశ్‌లోని చిత్తూరు జిల్లాకు చెందిన కిరణ్ కుమార్, నెటిజన్లకు ‘అగ్గిపెట్టె మచ్చా’గా పరిచయమైన ఈ వ్యక్తి గత కొన్ని రోజులుగా కనిపించడం లేదని అతని కుటుంబ సభ్యులు ఆవేదన వ్యక్తం చేస్తున్నారు.

Aggipetti macha | సోషల్ మీడియాలో యువతను ఆకట్టుకుని ఒక్కసారిగా ప్రాచుర్యం పొందిన ‘అగ్గిపెట్టె మచ్చా’ ప్రస్తుతం కనిపించకపోవడం తీవ్ర చర్చకు దారితీసింది. ఆంధ్రప్రదేశ్‌లోని చిత్తూరు జిల్లాకు చెందిన కిరణ్ కుమార్, నెటిజన్లకు ‘అగ్గిపెట్టె మచ్చా’గా పరిచయమైన ఈ వ్యక్తి గత కొన్ని రోజులుగా కనిపించడం లేదని అతని కుటుంబ సభ్యులు ఆవేదన వ్యక్తం చేస్తున్నారు. ఈ విషయం ఇప్పుడు సోషల్ మీడియాలో హాట్ టాపిక్‌గా మారింది.

కుటుంబ సభ్యులు తెలిపిన వివరాల ప్రకారం, ఎక్కడికక్కడ వెతికినా అతని ఆచూకీ దొరకడం లేదని అంటున్నారు. “ఎక్కడ వెతికినా కనిపించడం లేదు… ఎలా ఉన్నాడో కూడా తెలియడం లేదు. సోషల్ మీడియాలో మాత్రం వీడియోలు వస్తున్నాయి” అంటూ వారు వ్యక్తం చేసిన ఆవేదన ప్రస్తుతం వైరల్ అవుతోంది. ఈ వీడియో చూసిన నెటిజన్లు కూడా ఆందోళన వ్యక్తం చేస్తున్నారు.

ర‌క‌ర‌కాల ప్ర‌చారాలు..

ఇక ఈ ఘటనపై సోషల్ మీడియాలో రకరకాల ప్రచారాలు జరుగుతున్నాయి. కొందరు అతను చిత్తూరు పట్టణంలోనే ఉన్నాడని చెబుతుంటే, మరికొందరు వేరే ప్రాంతాల్లో కనిపించాడని అంటున్నారు. అయితే ఈ సమాచారం అంతా నిర్ధారణ కానిదే కావడంతో, తప్పుడు వార్తలు ప్రచారం చేయొద్దని కొంతమంది నెటిజన్లు హెచ్చరిస్తున్నారు. కుటుంబ సభ్యులకు తప్పుదోవ పట్టించే సమాచారం ఇవ్వొద్దని కూడా సూచిస్తున్నారు.

‘అగ్గిపెట్టె మచ్చా’గా ప్రాచుర్యం పొందిన కిరణ్ కుమార్, తన ప్రత్యేకమైన మాట్లాడే విధానంతో సోషల్ మీడియాలో మంచి గుర్తింపు తెచ్చుకున్నాడు. “నమస్తే అన్నా…” అంటూ ప్రారంభించి, తనదైన శైలిలో మాట్లాడే విధానం యువతను బాగా ఆకట్టుకుంది. అతని మాటల్లో ఉండే సహజత్వం, కొన్నిసార్లు వినిపించే బూతు పదజాలం కూడా వీడియోలను వైరల్ కావడానికి కారణమయ్యాయి.

స‌ర‌దా వీడియోల‌తో ఫేమ‌స్..

మొదట్లో కొందరు యువకులు సరదాగా తీసిన వీడియోలు యూట్యూబ్‌లో వైరల్ కావడంతో అతనికి గుర్తింపు వచ్చింది. తర్వాత కొన్ని యూట్యూబ్ ఛానెల్లు, టీవీ ఛానెల్లు కూడా అతనిని ఇంటర్వ్యూలకు పిలిచి ప్రసారం చేయడం ప్రారంభించాయి. ఆ ఇంటర్వ్యూల ద్వారా అతనికి కొంత ఆదాయం కూడా వచ్చేది. ఈ విధంగా ఒక సాధారణ వ్యక్తి సోషల్ మీడియా ద్వారా మీమ్ పాత్రగా మారడం విశేషంగా నిలిచింది.

అంతేకాకుండా, అతని పేరుతో మొబైల్ గేమ్ కూడా విడుదల కావడం అతని ప్రాచుర్యానికి నిదర్శనం. ఆ గేమ్‌కు లక్షకు పైగా డౌన్‌లోడ్లు రావడం ద్వారా ‘అగ్గిపెట్టె మచ్చా’ పేరు మరింత విస్తరించింది. ఇలాంటి పరిస్థితుల్లో ఇప్పుడు అతను కనిపించకపోవడం అభిమానుల్లో ఆందోళనను పెంచుతోంది. ఇదిలా ఉండగా, అతని ఆచూకీ లభించిందని, ఇంటికి తీసుకెళ్లారని కూడా కొన్ని వార్తలు వినిపిస్తున్నాయి. అయితే దీనిపై ఎలాంటి అధికారిక సమాచారం లేకపోవడంతో గందరగోళం కొనసాగుతోంది.

మొత్తానికి, సోషల్ మీడియాలో ఒక గుర్తింపు పొందిన వ్యక్తి గల్లంతు కావడం అనేక ప్రశ్నలకు దారితీస్తోంది. అతని క్షేమం గురించి స్పష్టమైన సమాచారం రావాలని కుటుంబ సభ్యులు, అభిమానులు ఆశిస్తున్నారు.