Case on Dimple Hayati | పనిమనిషిని వేధించిన నటి డింపుల్ హయాతి, భర్తపై కేసు

హైదరాబాద్‌లో నటి డింపుల్ హయతి, ఆమె భర్త డేవిడ్‌పై పనిమనిషి వేధింపుల ఆరోపణలు. ఫిల్మ్‌నగర్ పోలీసులు కేసు నమోదు చేసి విచారణ చేపట్టారు.

Tollywood Actress Dimple Hayathi, Husband Booked for Harassing Domestic Help in Hyderabad

విధాత–హైదరాబాద్, అక్టోబర్ 2, 2025:

Case on Dimple Hayati | సినీ నటి డింపుల్ హయాతి, ఆమె భర్త విక్టర్ డేవిడ్‌లపై షేక్​పేట్‌లోని వారి అపార్ట్‌మెంట్‌లో ఇంట్లో పనిచేసే 22 ఏళ్ల యువతిని వేధించారనే ఆరోపణలతో ఫిల్మ్ నగర్ పోలీసులు కేసు నమోదు చేశారు. పోలీసులు ఫిర్యాదు  ఈ ఫిర్యాదులో ఉన్నాయి. ఒడిశాకు చెందిన ప్రియాంక బైబర్ ఈ హయాతి దంపతులపై ఈ ఆరోపణలు చేసింది.  ఆమె సెప్టెంబర్ 22 నుంచి ఈ దంపతుల ఇంట్లో పనిచేస్తోంది. దాడి, బెదిరింపు, మహిళాగౌరవాన్ని కించపరిచే చర్యల కింద పోలీసులు ఈ కేసు దర్యాప్తు ప్రారంభించారు.

డింపుల్​ హయాతి ఇంట్లో అసలేం జరిగిందంటే?

ప్రియాంక బైబర్ ఫిర్యాదు ప్రకారం, డింపుల్ హయాతి, డేవిడ్ ఆమెను తరచూ తిట్టి, భోజనం కూడా పెట్టకుండా ఇబ్బంది పెట్టారు. నీ జీవితం మా చెప్పులతో సమానమంటూ అవమానకరంగా మాట్లాడారని ఆమె చెప్పింది. సెప్టెంబర్ 29న వారి దురుసు ప్రవర్తనను ఫోన్‌లో రికార్డ్ చేయబోతుంటే, డేవిడ్ ఆమె ఫోన్‌ను లాక్కొని పగలగొట్టాడని, చేయి చేసుకోవడానికి కూడా యత్నించాడని ఆరోపించింది. భయంతో ఆమె ఇంటి నుంచి పారిపోయి, ఫిల్మ్ నగర్ పోలీస్ స్టేషన్‌లో ఫిర్యాదు చేసింది.

పోలీసులు భారతీయ న్యాయ సంహిత (BNS) సెక్షన్ 74 (మహిళపై దాడి, గౌరవాన్ని దెబ్బతీసే చర్యలు), సెక్షన్ 79 (మాటలు, చేష్టలతో వేధింపులు), సెక్షన్ 351(2) (నేరపూరిత బెదిరింపు), సెక్షన్ 324(2) (హాని కలిగించడం) కింద కేసు నమోదు చేశారు. ఈ దంపతులను విచారణకు పిలవనున్నట్టు సమాచారం.

డింపుల్ హయాతి తెలుగు ప్రేక్షకులకు పరిచయమే. 2017లో ‘గల్ఫ్’ సినిమాతో తెలుగులోకి ఎంట్రీ ఇచ్చిన ఆమె, ‘గద్దలకొండ గణేష్’, ‘ఖిలాడి’, ‘రామబాణం’ వంటి సినిమాలతో గుర్తింపు తెచ్చుకుంది. హిందీలో ‘అత్రంగి రే’, తమిళంలో ‘వీరమాయ వాగై సూడుమ్’ లాంటి చిత్రాల్లో కూడా నటించింది. అయితే, ఇంతకుముందు కూడా 2023లో జూబ్లీహిల్స్‌లో IPS అధికారి రాహుల్ హెగ్డే కారును పాడు చేసిన ఆరోపణలతో డింపుల్, డేవిడ్‌లపై కేసు నమోదైంది. ఆ సమయంలో వాహన డ్రైవర్‌తో వాగ్వాదం, డింపుల్ హెగ్డే కారును తన్నినట్టు ఆరోపణలు వచ్చాయి. అప్పట్లో రాహుల్​ హెగ్డేనుద్దేశించి ‘అబ్యూస్​ ఆఫ్​ పవర్​’ అని సోషల్​మీడియాలో పోస్ట్​ కూడా చేసింది.

సోషల్ మీడియాలో వైరల్

ఈ ఘటన ఎక్స్ ప్లాట్‌ఫామ్‌లో వైరల్‌గా మారింది. టాలీవుడ్‌లో ఈ వార్త అందరినీ ఆశ్చర్యపరిచింది. డింపుల్ లేదా డేవిడ్ ఇంతవరకు ఈ ఆరోపణలపై స్పందించలేదు. ఫిర్యాదు స్వీకరించి కేసు నమోదు చేశామని, సంబంధిత సాక్ష్యాలు సేకరిస్తున్నట్లు, నిందితులను విచారణకు పిలుస్తామని, తర్వాతి చర్యలు ఆధారాలపై ఆధారపడి ఉంటాయని ఫిల్మ్‌నగర్ పోలీసులు తెలిపారు.

దర్యాప్తు కొనసాగుతోంది. ఈ ఘటన హైదరాబాద్‌లో తీవ్ర చర్చనీయాంశంగా మారింది. తాజా అప్‌డేట్స్ కోసం విధాతను సందర్శించండి.