సోనీ చానెళ్లను తీసేస్తున్న టాటా ప్లే

టాటా ప్లే డిటిహెచ్​ సర్వీస్​, సోనీ నెట్​వర్క్​ల మధ్య ముదిరిన పంచాయితీ ఆఖరికి ప్రేక్షకుల మీద పడింది. సోనీ నెట్​వర్క్​కు చెందిన అన్ని చానెళ్లను ఆగస్టు 1 నుండి 10వ తేదీలోగా మొత్తంగా టాటా ప్లే ప్యాకేజీల నుండి తీసేస్తున్నట్లు ఆ డిటిహెచ్​ సర్వీస్​ ప్రొవైడర్​ ప్రకటించింది.

డిటిహెచ్​ సేవలలో అగ్రగామిగా ఉన్న టాటా ప్లే Tata Play( టాటా స్కై- Tata Sky) తమ ప్యాకేజీలనుండి సోనీ పిక్చర్స్​ నెట్​వర్క్​ ఇండియాకు(SPNI) సంబంధించిన అన్ని టివీ చానెళ్లను, వారి ముఖ్య చానెల్ అయిన సోనీ ఎంటర్​టైన్​మెంట్​ టెలివిజన్​(సెట్​-SET)తో సహా శాశ్వతంగా తొలగిస్తున్నట్లు తెలిపింది. ఈ మేరకు తమ చందాదారుల(Subscribers)కు సందేశాలను కూడా పంపిస్తున్నట్లు తెలిపిన టాటా ప్లే, సోనీ చానెళ్లకు వ్యూయర్​షిప్(Viewership)​ లేని కారణంగా ఈ నిర్ణయం తీసుకున్నట్లు,  వినియోగదారులకు ఇష్టం లేకపోతే వేరే డిటిహెచ్​ సేవకు మారవచ్చని కూడా చెప్పింది.  ఆగస్టు 1వ తేదీ నుండి పది లక్షల(1 Million) చందాదారులతో ప్రారంభించి, పది రోజులలోగా మొత్తం తొలగిస్తామని సంస్థ ఎండీ, సిఈఓ హరిత్​ నాగపాల్(Harit Nagpal)​ తెలిపారు.

కాగా, టాటా ప్లే నిర్ణయాన్ని ఏకపక్షం(Arbitrary)గా, ప్రతీకారధోరణి(retaliatory)తో తీసుకున్నదని సోనీ(SPNI) దుయ్యపట్టింది. నాగ్​పాల్​ మాత్రం తమ చందాదారులలో 40 నుండి 50 శాతం మంది సోనీ ప్యాకేజీలను తీసుకున్నప్పటికీ, కేవలం 25శాతం మాత్రమే ఆ చానెళ్లను వీక్షిస్తున్నారని వ్యూయర్​షిప్​ విశ్లేషణ ద్వారా(Viewership data) తెలిసిందన్నారు. సెట్​ టాప్​ బాక్స్​ నుండి చానెల్​ వీక్షణకు సంబంధించి వెనక్కిరావాల్సిన సమాచారం(Return path data) సరిగ్గా రాకపోతే, 75 శాతం మంది చందా కట్టీ, చానెల్​ చూడటంలేదనే విషయం తెలుసుకోవడం చాలా కష్టమనీ, వినియోగదారుల క్షేమాన్ని కోరే సంస్థగా టాటా ప్లే, ఈ చానెళ్లను తీసేయాలని నిర్ణయించుకున్నామని, తద్వారా తమ చందాదారులకు నెలవారీ బిల్లు(Reduction in monthly bill amount) తగ్గుతుందని నాగ్​పాల్​ స్పష్టం చేసారు. అయినప్పటికీ, సోనీ చానెళ్లు చూడాలనుకునేవారు తిరిగి విడిగా చందాదారులుగా(Can subscribe individually) చేరవచ్చని, అటువంటి వారు తమ యాప్​ ద్వారా గానీ, కాల్​సెంటర్​కు ఫోన్​ చేయడం ద్వారా గానీ లేదా ఒక ఎస్​ఎంఎస్​ పంపడం ద్వారా వెంటనే చానెళ్ల వీక్షణ ప్రారంభించుకోవచ్చని ఆయన తెలిపారు.

ఇదిలా ఉండగా, సోనీ వాదన వేరుగా ఉంది. టాటా ప్లే నిర్ణయం తమకు నిరాశ కలిగించిందని, తమకు కనీస సమాచారం ఇవ్వకుండా, వినియోగదారుల అభిరుచులను గౌరవించకుండా టాటా ప్లే ప్రవర్తించిందని ఆరోపించింది. గత కొన్నేళ్లుగా టాటా ప్లే వినియోగదారుల నిర్వహణ వ్యవస్థ(Subscriber Management System)లో లోపాలు, సమాచారంలో వ్యత్యాసాలు ఉన్నట్లు కనుగొన్న తాము, ఆడిట్​ (Audit)చేస్తామని  విజ్ఞప్తి చేసినందుకే వారు ప్రతీకార చర్యగా ఈ నిర్ణయం తీసుకున్నట్లు తాము భావిస్తున్నట్లు ఎస్​పిఎన్​ఐ తెలిపింది.

1995లో సోనీ ఎంటర్​టెయిన్​మెంట్​ టెలివిజన్​(SET) చానెల్​తో ప్రారంభించబడిన సోనీ ఎంటర్​టెయిన్​మెంట్​ టెలివిజన్ ఇండియా లిమిటెడ్​(SET India Limited), నేడు 26 చానెళ్ల(26 Channels)తో నడుస్తోంది. ఇవే కాక, సోనీలివ్(SonyLIV)​ స్ట్రీమింగ్​ ప్లాట్​ఫారం, స్టుడియో నెక్స్ట్(Studio NEXT)​ టెలివిజన్ స్టుడియో, సినీ నిర్మాణ సంస్థ సోనీ పిక్చర్స్​ ఇంటర్నేషనల్​ ప్రొడక్షన్స్(SPIP)​ కూడా ఎస్​పిఎన్​ఐ(SPNI)లో భాగమే.

కానీ, ఈ గొడవలకు ఇవేవీ కారణాలు కావని, పే చానెళ్లు, వాటి రుసుముల విషయంలో వచ్చిన తేడాలే ఈ స్పర్థలకు మూలమని డిటిహెచ్​ సర్వీసుల నిపుణుడొకరు తెలిపారు. గత కొన్నేళ్లుగా ఈ రెండు కంపెనీల మధ్య చిచ్చు రగులుతూనేఉందని, ఇప్పుడు ఈ విధంగా బయటపడిందని ఆయన అభిప్రాయపడ్డారు.