విధాత, హైద‌రాబాద్‌:
Jamabandi | సాంకేతిక యుగంలో చాలా సులువుగా ప్ర‌జ‌ల‌కు అందుబాటులో ఉండాల్సిన భూముల వివ‌రాలు, సేవ‌లు అత్యంత సంక్లిష్టంగా మారాయి. అంత‌ర్జాలంలో అంతా నిక్షిప్తం చేశామ‌ని ప్రభుత్వం చెప్పుకొంటున్నప్పటికీ.. ఊరికి సంబంధించిన ఊరుమ్మ‌డి లెక్క‌లు ఒకేసారి దొరికే అవ‌కాశం లేదని అధికారులు అంగీకరిస్తున్నారు. ఏ వ్య‌క్తి త‌న భూమి వ‌ర‌కు మాత్రమే అది కూడా ఎంతో శ్ర‌మిస్తే కానీ చూసుకునే అవ‌కాశం లేదు. త‌న భూమి త‌క్కువ ప‌డితే ఎవ‌రికి ఖాతాలోకి వెళ్లిందో తెలుసుకునే అవ‌కాశం కూడా ఈ కంప్యూట‌ర్‌లో లేదని అంటున్నారు. త‌న భూమి వివ‌రాలు చూసుకోవాలంటే కూడా గ్రామంలో వ్య‌వ‌సాయం చేసుకునే రైతు మండ‌ల కేంద్రంలోని మీ- సేవ కేంద్రానికి వ‌చ్చి చూసుకోవాల్సిందే. ఇంత క‌ష్ట‌ప‌డితే కానీ అత‌ను త‌న భూమి వివ‌రాల‌ను చూసుకునే అవ‌కాశం ఉండ‌దు.
గ‌తంలో ఊర్లో ఉన్న ప‌ట్వారీ వ‌ద్ద‌కు వెళితే అన్నివివ‌రాలు చూసి చెప్పేవారు. ప‌ట్వారీ వ్య‌వ‌స్థ పోయిన త‌రువాత వీఆర్వో ఆప‌ని చేశాడు. మ‌నుషుల స్థానంలో కంప్యూట‌ర్ల ప్రవేశం త‌రువాత 2010 నుంచి అన్‌లైన్ ప‌హ‌ణీలు వ‌చ్చాయి. ఆన్ లైన్ ప‌హ‌ణీలు వ‌చ్చిన త‌రువాత మండ‌ల కార్యాల‌యానికి వెళ్లి ఆన్‌లైన్ ప‌హ‌ణీలు తీసుకునే వారు. 2020లో ధరణి వ‌చ్చిన త‌రువాత ప‌హ‌ణీలు కూడా లేవు. అధికారులు ప‌హ‌ణీలు రాయ‌డం పూర్తిగా వ‌దిలేశారు. ప్ర‌జ‌ల‌కు అందుబాటులోకి రికార్డులు తెచ్చామ‌ని చెప్పుకున్న‌ప్ప‌టికీ లెక్కలన్నీ గంద‌ర‌గోళంగా త‌యారు అయ్యాయనే అభిప్రాయాలు ఉన్నాయి. ప‌ట్టా భూములు అసైన్డ్ భూములుగా, ప్ర‌భుత్వ భూములుగా న‌మోదు కావ‌డం, విస్తీర్ణంలో తేడాలు, వైవాటి క‌బ్జాల స‌మ‌స్య‌లు, దీంతో పాటు ప‌ట్టా భూములు కొన్నినోష‌న‌ల్ ఖాతాలోకి వెళ్లాయి. పైగా అనేక భూములు నిషేధిత జాబితాలో ప‌డ్డాయి. భూ రికార్డుల ప్ర‌క్షాళ‌న సంద‌ర్భంగా మాన్యువ‌ల్‌గా రాయాల్సిన రికార్డుల‌ను రాయ‌క‌పోవ‌డంతో అనేక పొర‌పాట్లు చోటు చేసుకున్నాయన్న ఆరోపణలు వెల్లువెత్తాయి. దీనిని స‌కాలంలో స‌రిదిద్ద‌క‌పోవ‌డం వ‌ల్ల అనేక స‌మ‌స్య‌లు త‌లెత్తాయి.
ధరణి సమస్యల పుట్ట అని చెప్పిన కాంగ్రెస్ పార్టీ అధికారంలోకి వ‌చ్చిన త‌రువాత ధ‌ర‌ణిని ర‌ద్దు చేసి భూ భార‌తి తీసుకువ‌చ్చింది. భూ భార‌తి వచ్చినా స‌మ‌స్య‌లు అలాగే అప‌రిష్కృతంగా ఉన్నాయ‌న్న చ‌ర్చ జ‌రుగుతున్న‌ది. గ‌త ప్రభుత్వం నుంచి వ‌చ్చిన నిషేధిత భూముల జాబితాను అలాగే అప్‌డేట్ చేస్తున్నార‌న్న విమ‌ర్శ‌లున్నాయి. చాలా చోట్ల గ్రామ భూమి మొత్తం ఎంత ఉన్న‌ది? స‌బ్ డివిజ‌న్లు అయిన త‌రువాత మొత్తం గ్రామ భూమి లెక్క‌కు స‌రిపోయిందా లేదా? అని కూడా ప‌రిశీలించ‌డం లేదేమో అనే సందేహాన్ని ఒక రిటైర్డ్ ఆర్డీవో వ్య‌క్తం చేశారు. గ‌తంలో ప్ర‌తి ఏటా జమాబందీ రాసేట‌ప్పుడు గోశ్వారా (గ్రామంలో ఉన్న భూమి మొత్తం.. రోడ్లు, ఇండ్లు, సాగు భూమి, బంజ‌రు భూమి, అట‌వీ భూమి, ప‌ట్టా భూములు క‌లిపి) లెక్క క‌లిసే వ‌ర‌కు ఒక‌టికి ప‌ది సార్లు చూసుకొని లెక్క‌లు పూర్తి చేసే వారిమ‌ని, ఎక్క‌డ కుంట భూమి తేడా వచ్చినా మొత్తం తిరిగి లెక్కించే వాళ్ల‌మ‌ని చెప్పారు. కానీ కంప్యూట‌ర్ యుగం వ‌చ్చిన త‌రువాత రెవెన్యూ డిపార్ట్‌మెంట్ గోశ్వ‌రాను పూర్తిగా వ‌దిలేసింది. దీంతో ఎవ‌రైనా కంప్లైట్ చేస్తే త‌ప్ప డ‌బుల్ ఎంట్రీల‌ను ప‌రిశీలించి తొల‌గించ‌డం లేదు. దీంతో అనేక భూముల‌కు ఆర్ ఎస్ ఆర్ లెక్క‌ల్లో తేడాలు క‌నిపిస్తున్నాయి. ఇలాంటి వాటిని స‌రిచేయ‌డానికి గ్రామంలో జ‌మాబంది చేయాల‌న్న చ‌ర్చ కూడా జ‌రుగుతోంది.
రాష్ట్ర ప్రభుత్వం భూ భార‌తి చ‌ట్టం ద్వారా ప్ర‌తి ఏటా జ‌న‌వ‌రి 1 వ తేదీ నుంచి డిసెంబ‌ర్ 31వ తేదీ వ‌ర‌కు జ‌రిగిన లావాదేవీల‌ను మూడు ప్రింట్లు తీసి ఎమ్మార్వో కార్యాల‌యంలో ఒక‌టి, ఆర్డీఓ కార్యాల‌యంలో ఒక‌టి, జిల్లా క‌లెక్ట‌ర్ కార్యాల‌యంలో ఒక ప్రింట్ భ‌ద్ర ప‌ర‌చాల‌ని నిర్ణ‌యించారు. ఇంత వ‌ర‌కు బాగానే ఉన్న‌ది. కానీ ప్ర‌తి గ్రామానికి గోశ్వారా లెక్క చేయాల్సిన అవ‌స‌రం ఉంద‌ని రెవెన్యూశాఖ‌లో ప‌ని చేసి పదవీ విర‌మ‌ణ చేసిన అధికారులు చెపుతున్నారు. ఇందు కోసం 2010 త‌రువాత నుంచి జ‌రిగిన అనేక పొర‌పాట్ల‌కు, పొర‌పాటున ప‌డిన త‌ప్పుడు ఎంట్రీల‌ను కూడా స‌రి చేయ‌డానికి అవ‌కాశం ఉండే విధంగా రెవెన్యూ సిబ్బంది గ్రామాల వారీగా జమాబందీ నిర్వ‌హించాల‌ని చెపుతున్నారు. ఫ‌లితంగా రైతుల స‌మ‌స్య‌లు అక్క‌డే ప‌రిష్కారం కావ‌డంతో పాటు, మొత్తం భూముల లెక్కలన్నీ రికార్డుల్లోకి వ‌స్తాయ‌ని, ప్ర‌తి ఏటా మాన్యువ‌ల్ రికార్డు త‌యారు అయితే రైతుల భూముల‌కు, ప్ర‌భుత్వ భూముల‌కు భరోసా ఉంటుంద‌ని చెపుతున్నారు. ఈ దిశ‌గా ప్ర‌య‌త్నాలు జ‌ర‌గ‌క పోతే ధ‌ర‌ణిలో జ‌రిగిన త‌ప్పులే ఇక్క‌డా దొర్లే ప్ర‌మాదం ఉంద‌ని నిపుణులు హెచ్చ‌రిస్తున్నారు.
ఇవి కూడా చదవండి
NRI lands Encroached | ఎన్‌ఆర్‌ఐల భూములు భద్రమేనా? వారికి భరోసా ఇచ్చేదెవరు?
Kokapet Lands | బంగారు భూములు.. కోకాపేటలో ఎకరం రూ.151 కోట్లు