భవిష్యత్తు బీఆరెస్‌దే: మాజీ మంత్రి టి.హరీశ్ రావు

దురదృష్టవశాత్తు రాష్ట్రంలో బీఆరెస్‌ ప్రభుత్వం ఏర్పడలేదని, అందుకు పార్టీ కేడర్‌ కుంగిపోవాల్సిన అవసరం లేదని భవిష్యత్తు మనదేనని మాజీ మంత్రి టి.హరీశ్‌రావు అన్నారు.

విధాత : దురదృష్టవశాత్తు రాష్ట్రంలో బీఆరెస్‌ ప్రభుత్వం ఏర్పడలేదని, అందుకు పార్టీ కేడర్‌ కుంగిపోవాల్సిన అవసరం లేదని భవిష్యత్తు మనదేనని మాజీ మంత్రి టి.హరీశ్‌రావు అన్నారు. మంగళవారం సంగారెడ్డిలో బీఆరెస్ కృతజ్ఞత సభలో ఆయన పార్టీ శ్రేణులను ఉద్దేశించి మాట్లాడారు. కేవలం 2 శాతం ఓట్ల తేడాతో ఎన్నికల్లో ఒడిపోయామన్నారు. విపక్షాలు కొన్ని దుష్ప్రచారాలు చేశాయని, ప్రజలు వాటిని నమ్మి వాళ్ళకి అధికారం ఇచ్చారన్నారు. వాళ్ళు మనకంటే బాగా చేయాలని కోరుకుందామన్నారు. బాధ్యతాయుతమైన ప్రతిపక్షంగా ప్రజలకిచ్చిన హామీల కోసం కొట్లాడుదామన్నారు.

భవిష్యత్తు బీఆర్‌ఎస్‌కే ఉంటుందని.. కార్యకర్తలు ఎవరు కూడా అధైర్య పడొద్దన్నారు. వచ్చే పంచాయతీ ఎన్నికలు, ఎంపీ ఎన్నికల్లో బీఆర్‌ఎస్ సత్తా చూపించాలన్నారు. రాష్ట్రమంతా కొంత ఇబ్బంది ఉన్నా సంగారెడ్డిలో మాత్రం ఈ సారి గులాబీ జెండా ఎగిరిందన్నారు. ఎమ్మెల్యే చింతా ప్రభాకర్ ఆరోగ్యం దెబ్బ తిన్నా ప్రతి ఒక్క కార్యకర్త అభ్యర్థిగా కష్టపడి పని చేశారన్నారు. పార్టీ కోసం కష్టపడ్డ కార్యకర్తలను గుండెల్లో పెట్టుకుని చూసుకుంటామన్నారు. అధికార పార్టీ వాళ్లు బీఆరెస్‌ మానసిక స్థైర్యాన్ని దెబ్బతీసే ప్రయత్నం చేస్తారన్నారు. పార్టీ పెట్టినప్పుడు కూడా ఎన్నో ఇబ్బందులు పడ్డామని గుర్తుచేశారు. 2004లో కాంగ్రెస్ టీఆర్‌ఎస్‌తో పొత్తు పెట్టుకుని తెలంగాణ ఇవ్వలేదన్నారు.

తెలంగాణపై కేసీఆర్‌కు ఉన్న ప్రేమ ఇతరులకు ఉండదన్నారు. 14 ఏళ్ళు కష్టపడి, పదవులు గడ్డి పోచల్లా వదిలేసి తెలంగాణ తెచుకున్నామన్నారు. అధికారంలో ఉన్నప్పుడు పొంగిపోలేదని.. లేనప్పుడు కుంగిపోలేదన్నారు. బీఆర్‌ఎస్ అధికార పక్షంలో ఉన్నా ప్రతిపక్షంలో ఉన్నా ఎప్పుడూ ప్రజల పక్షమే అని చెప్పుకొచ్చారు. తెలంగాణాని అన్ని రంగాల్లో దేశంలో నెంబర్ 1 స్థానంలో నిలబెట్టింది బీఆర్‌ఎస్ అని అన్నారు. ఉమ్మడి మెదక్ జిల్లాలో ఏడుగురు ఎమ్మెల్యేలు ఉన్నారని… అందరం కలసి పని చేద్దామని పిలుపునిచ్చారు. ఓటమిపై సమీక్ష జరుపుదామని… తప్పు ఒప్పులు సరి చేసుకుందామని హరీష్‌రావు పేర్కొన్నారు.