Warangal | ఎమ్మెల్యే రాజయ్య VS సర్పంచ్ నవ్య.. మధ్యలో MPP కవిత! ఆడియో లీక్

Warangal నవ్య భర్త ప్రవీణ్‌తో ఎంపీపీ సంభాషణ రూ.20 లక్షల చుట్టూ పీఠముడి విధాత, వరంగల్ ప్రత్యేక ప్రతినిధి: స్టేషన్ ఘన్ పూర్ ఎమ్మెల్యే తాటికొండ రాజయ్యపై హ‌న్మకొండ జిల్లా ధర్మసాగర్ మండలంలోని జానకీపురం సర్పంచ్ నవ్య చేసిన లైంగిక వేధింపుల ఆరోప‌ణల్లో కీలకమైన ఫోన్ కాల్ రికార్డులు మంగళవారం లీకయ్యాయి. ఫోన్ కాల్ రికార్డులో ధర్మసాగర్ ఎంపీపీ నిమ్మ కవిత రెడ్డి, స‌ర్పంచ్ న‌వ్య భ‌ర్త ప్రవీణ్ మధ్య జ‌రిగిన సంభాష‌ణ‌లున్నాయి. గతంలో నవ్య ఎమ్మెల్యే […]

Warangal

• నవ్య భర్త ప్రవీణ్‌తో ఎంపీపీ సంభాషణ
• రూ.20 లక్షల చుట్టూ పీఠముడి

విధాత, వరంగల్ ప్రత్యేక ప్రతినిధి: స్టేషన్ ఘన్ పూర్ ఎమ్మెల్యే తాటికొండ రాజయ్యపై హ‌న్మకొండ జిల్లా ధర్మసాగర్ మండలంలోని జానకీపురం సర్పంచ్ నవ్య చేసిన లైంగిక వేధింపుల ఆరోప‌ణల్లో కీలకమైన ఫోన్ కాల్ రికార్డులు మంగళవారం లీకయ్యాయి. ఫోన్ కాల్ రికార్డులో ధర్మసాగర్ ఎంపీపీ నిమ్మ కవిత రెడ్డి, స‌ర్పంచ్ న‌వ్య భ‌ర్త ప్రవీణ్ మధ్య జ‌రిగిన సంభాష‌ణ‌లున్నాయి.

గతంలో నవ్య ఎమ్మెల్యే రాజయ్య పై లైంగిక ఆరోపణలు చేసిన అనంతరం జరిగిన రాజీ సందర్భంగా ఎమ్మెల్యే రాజయ్య గ్రామాభివృద్ధి కోసం రూ.20 లక్షలు ఇస్తానని చెప్పాడని సర్పంచ్ నవ్య చెబుతున్న విషయం తెలిసిందే.

అప్పుగా ఇవ్వడంలో అంతర్యమేమిటి

ఈ 20 లక్షలు ఇప్పుడు మాత్ర అప్పుగా ఇస్తున్నట్లు ఎమ్మెల్యే పీఏ శ్రీనివాస్ అప్పు పత్రం రాయించి అందులో సర్పంచ్ నవ్య సంతకం చేయించేందుకు య‌త్నించిన‌ట్లుగా నవ్య ఆరోపించిన విషయం తెలిసిందే. సంతకం పెట్టకుండా నిరాకరించానని ఇప్పటికే ప్రకటించారు.

తాజాగా లీక్ అయిన ఫోన్ కాల్‌లో జ‌రిగిన సంభాష‌ణ‌ల‌ ప్రకారం.. ఎమ్మెల్యే రాజయ్యపై గతంలో త‌ప్పుడు ఆరోపణలు చేశానని చెప్పి ఒప్పంద పత్రాలపై సంతకాలు చేస్తేనే డబ్బులు ఇస్తామని చెప్పారని నవ్య భర్త ప్రవీణ్ ఎంపీపీ కవిత దృష్టికి తీసుకొచ్చారు.

ఫోన్ సంభాషణ ప్రకారం వివరాలు ఇలా ఉన్నాయి

ఎంపీపీ కవిత మాట్లాడుతూ ఈ అప్పు పత్రాలు ఏంటని ఎమ్మెల్యే రాజయ్యను తాను ప్రశ్నించానని ప్రవీణ్‌తో చెబుతోంది. అప్పుగా డబ్బులు ఇస్తే వారితో అవసరం తీరిన తర్వాత డబ్బులు తమకు చెల్లించాలని అడిగితే వాళ్ళు ఎక్కడి నుండి తెచ్చి ఇస్తారని ఎమ్మెల్యేను అడిగినట్లు ఎంపీపీ తెలిపారు. సర్పంచ్ నవ్య దిగి వచ్చి ఒప్పందం పేపర్లపై సంతకాలు పెడతానని చెప్పిన తర్వాత డబ్బులు ఎందుకు ఇవ్వరని ఎమ్మెల్యేను ప్రశ్నించానని అన్నారు.

ఆడబిడ్డల కడుపు కొట్టి సంపాదించినవే కదా?

మీకు సిగ్గు శరం లేదని నా అటువంటి ఆడబిడ్డల కడుపు కొట్టి సంపాదించినందుకు మా ఉసురు తగులుతుందని ఎమ్మెల్యే రాజయ్యను తాను అన్నట్లు ఆ కాల్ రికార్డుల్లో ఉంది. ప్రవీణ్, నవ్యలు అప్పు పత్రంపై సంతకాలు పెట్టరని, దానికి నేను కూడా ఒప్పుకోనని ఎమ్మెల్యేతో అన్నట్లు ఎంపీపీ కవిత మాట్లాడింది.

రేపు టికెట్ రాకుంటే ఎట్లా

రేపు ఎమ్మెల్యే రాజయ్యకు టికెట్ రాదని అప్పుడు ఇచ్చిన అప్పులు వసూలు చేస్తారా? అని అడిగినట్లు తాను తెలిపారు. గతంలో ముగ్గురం కలిసి వచ్చినప్పుడు అప్పు పత్రంపై సంతకాలు చేయాలని అడగలేదు కదా అని అన్నారు. 6 లక్షల రూపాయలు బంజరుపల్లికి చెందిన వ్యక్తికి ఎందుకు ఇచ్చినట్లని, వాడు మన పార్టీ వాడు కాదు కదా? అన్నారు. ఇప్పటివరకు మాకు రూపాయి కూడా ఇవ్యలేదని వాడికి ఎలా ఇస్తారని ఎమ్మెల్యే రాజయ్యను ప్రశ్నించినట్లు ప్రవీణ్‌తో కవిత అన్నారు.

అప్పు పత్రం గురించి నాకు తెలియదని, ఒప్పంద పత్రంపై మాత్రమే సంతకాలు పెట్టాలని చెప్పినట్టు ఆమె స్పష్టం చేసింది. ఇలాంటి ఆరోపణలు మళ్లీ చేస్తే సర్పంచ్ దగ్గరకు వెళ్లి నాది తప్పైందని బతిమాలుకుంటానని తర్వాత మీ (ఎమ్మెల్యే రాజయ్య) సంగతి వాళ్లే చూసుకుంటారని హెచ్చరించానని తెలిపారు.

గతంలో ఆరోపణలు వచ్చినప్పుడు కూడా నేనే వాళ్లతో మాట్లాడి మళ్లీ ఎమ్మెల్యే టికెట్ వస్తే మీకు ఏదో విధంగా సహాయం చేయిస్తానని అంటే అప్పుడు వాళ్లు సరేనని ఒప్పుకున్నారని ఆమె అన్నారు. ఎమ్మెల్యే పీఏ శ్రీనివాస్ ప్రవీణ్‌కు మధ్య జరిగిన సంభాషణలో కూడా డబ్బుల వ్యవహరమే ఉంది. ఎమ్మెల్యే రాజయ్యతో నాకు నా భర్తకు ప్రాణహాని ఉందని అన్నారు.