ఆయుధాలు వీడి.. జనంలోకి : 37 మంది మావోయిస్టుల లొంగుబాటు

మావోయిస్టులకు రోజుకో ఎదురు దెబ్బ తగులుతుంది. ఇటీవల పార్టీ కీలక నేతలతో పాటు సామాన్యం కార్యకర్తలు జనజీవన స్రవంతిలో కలిసిపోతున్నారు. తాజాగా ఛత్తీస్‌ఘడ్‌లోని దంతే వాడలో ఆదివారం 37 మంది మావోయిస్టులు పోలీసుల ఎదుట లొంగిపోయారు.

మావోయిస్టులకు రోజుకో ఎదురు దెబ్బ తగులుతుంది. ఇటీవల పార్టీ కీలక నేతలతో పాటు సామాన్యం కార్యకర్తలు జనజీవన స్రవంతిలో కలిసిపోతున్నారు. తాజాగా ఛత్తీస్‌ఘడ్‌లోని దంతే వాడలో ఆదివారం 37 మంది మావోయిస్టులు పోలీసుల ఎదుట లొంగిపోయారు. వీరిలో 27 మంది మహిళలు ఉండగా మొత్తం రూ.67 లక్షల రివార్డు ఉంది. వీళ్లు లొంగిపోవడంతో పాటు వారి వద్ద ఉన్న ఆయుధాలను పోలీసులకు అప్పంగించారు. దంతేవాడ ఎస్పీ గౌరవ్ రాయ్ వివరాలను వెల్లడించారు. మాజీ మావోయిస్టుల పునరావాసం, పునరేకీకరణ లక్ష్యంతో చేపట్టిన ‘పూనా మార్గమ్’ ఆపరేషన్‌లో భాగంగా వీరు లొంగిపోయారు. 2024–25లో జరిగిన నిరంతర కార్యకలాపాలు, ఎన్‌కౌంటర్‌లు, రాష్ట్ర పునరావాస ప్రయోజనాలతో పాటు, అనేక మంది మావోయిస్టు కార్యకర్తలు హింసను విడేలా చేసేందుకు ఉపయోగపడ్డాయన్నారు. గత 20 నెలల్లో, 508 మంది మావోయిస్టులు దంతేవాడలో లొంగిపోయినట్లు రాయ్ తెలిపారు.

లొంగిపోయిన వారిలో మావోయిస్టు పార్టీ కీలక నేతలు అయిన కుమాలి అలియాస్ అనితా మాండవి, గీత అలియాస్ లక్ష్మి మడ్కం, రంజాన్ అలియాస్ సోమా మాండవి, భీమా అలియాస్ జహాజ్ కల్ములపై ఒక్కరి మీద రూ.8 లక్షల రివార్డు ఉందని అధికారులు తెలిపారు. రాష్ట్ర ప్రభుత్వ పునరావాస విధానం ప్రకారం, లొంగిపోయిన ప్రతి మావోయిస్టుకు రూ.50,000 తక్షణ సహాయంతో పాటు నైపుణ్యాభివృద్ధి శిక్షణ, వ్యవసాయ భూమి వంటి సౌకర్యాలను కల్పిస్తారు. లొంగిపోయిన మావోయిస్టులలో చాలామంది ఇటీవల జరిగిన పెద్ద సంఘటనలలో పాల్గొన్నారు.

ఛత్తీస్‌ఘడ్‌లో గత 23 నెలల్లో, అగ్ర నాయకులతో సహా 2,200 మందికి పైగా మావోయిస్టులు లొంగిపోయారని అధికారులు వెల్లడించారు. దీంతో మావోయిస్టు పార్టీ దళ సంఖ్యాబలం తీవ్రంగా తగ్గినట్లయింది. కాగా, 2026 నాటికి దేశంలో నక్సలిజాన్ని నిర్మూలించాలని కేంద్రం లక్ష్యంగా పెట్టుకుంది. దంతే వాడ పోలీసులు హింసను విడనాడి సమాజంలోకి తిరిగి రావాలని మావోయిస్టులకు పోలీసు ఉన్నతాధికారులు విజ్ఞప్తి చేశారు.