Chicken Scientific Name | రప్పారప్పా కోసుకుని తినడమే కానీ.. దాని పేరెప్పుడైనా అడిగారా?

చాలా మందికి ఆదివారం వచ్చిదంటే చాలు.. మార్కెట్‌కు వెళ్లి నాటుకోడి, ఫారం కోడి.. ఏదైతేనేం ఒక కోడిని కోయించుకుని వచ్చి కమ్మగా పులుసు లేదా వేపుడు పెట్టించి.. వేడివేడిగా ఆస్వాదించాల్సిందే! కానీ.. ఆ కోడి పేరేంటో ఎప్పుడన్నా తెలుసుకున్నారా? కోడికి పేరేంటి? నాటుకోడి.. ఫారం కోడి.. నల్లకోడి.. ఇవే కదా? అంటారా! అయితే ఈ కథనం మీ కోసమే. చివరిలో అద్దిరిపోయే ట్విస్ట్‌ ఉందండోయ్‌!

Chicken Scientific Name | కోడి! నగరాల్లో అయితే కుదరదు కానీ.. చాలా చిన్న చిన్న పట్టణాలు, పల్లెల్లో అయితే ఇక చెప్పనక్కర్లేదనుకోండి! కోళ్లు పెంచుకోవడం సహజం. చాలా ఇళ్ల ముందు కోళ్లు పిల్లలనేసుకుని తిరుగుతూ ఉంటాయి. సాయంత్రానికి వాటిని పట్టుకుని గంప కింద కమ్మేయడం చాలా మందికి అనుభవమే. ఈ కోడికి బయొలాజికల్‌ వర్గీకరణలో మంచి ఆసక్తికరమైన స్థానమే ఉంది. ప్రపంచ వ్యాప్తంగా 2300 కోట్లకుపైగా కోళ్లు ఉంటాయని ఇటీవల ఒక అంచనా వెలువడింది. మరి ఇన్ని  ఉంటేనే కదా.. ఈ భూమిపై కోట్ల మంది మాంసాహార అవసరాలను, కోడిగుడ్ల ప్రియుల ఆకలిని తీర్చేది! ఆ విషయం పక్కన పెడితే.. ఈ కోళ్లకు శాస్త్రీయ నామం అంటూ ఒకటి ఉంది. అందుకోసం మనం పాతరాతియుగం దాకా వెళ్లనక్కర్లేదు కానీ.. ఆగ్నేయాసియాకు మాత్రం ఒకసారి వెళ్లిరావాలి. అక్కడ రెడ్‌ జంగిల్‌ఫౌల్‌.. అంటే ఎర్ర అడవి కోడి అనే అటవీ పక్షి ఒకటి ఉంది. దానిని గాలస్‌ గాలస్‌ అని పిలుస్తారు. అవును. ఒక్క గాలస్‌ కాదు.. రెండుసార్లు.. గాలస్‌ గాలస్‌! ఆ కోడి.. ఇప్పుడు మనం చూస్తున్న, కూర కోసం కోస్తున్న, మన పల్లెటూళ్లలో కనిపించే సాధారణ కోళ్లకు ‘పెంపుడు రూపం’ అన్నమాట. అంటే.. అటవీ కోళ్ల నుంచి.. ఇంట్లో పెంపుడు కోళ్లు వచ్చాయన్న మాట. వాటిని మాంసాహారులు మహా ఇష్టంగా కోసుకుని తింటుంటారు. దీన్ని కూడా కాసేపు పక్కన పెట్టేద్దాం. అసలు విషయంలోకి వచ్చేద్దాం.

ఈ వర్గీకరణ అనేది.. ఇప్పటి పెంపుడు కోళ్లు పరిణామ క్రమంలో అడవి కోళ్లకు ఎలా వారసులు అయ్యయనది తేల్చేందుకు ఉపయోగపడుతుంది. అసలు కోడి శాస్త్రీయ నామం ఏంటి? ఇప్పుడు ఇది చూద్దాం. మనం తినే సాధారణ కోడి శాస్త్రీయ నామం.. గాలస్‌ గాలస్‌ డొమెస్టికస్‌! ఈ మూడు పదాల పేరు (trinomial name) వెనుక శాస్త్రీయ కోణం ఉంది. దాని అర్థం ఏంటంటే.. గాలస్‌ గాలస్‌.. అదేనండి.. జంగిల్‌ఫౌల్‌కు ఇది డొమెస్టికేటెడ్‌ వెర్షన్‌ అన్నమాట. ఇక బ్రాయిలర్‌ కోడి అన్నా.. ఇదే అర్థం. కాకపోతే.. బ్రాయిలర్‌ కోడిని కేవలం మాంసం కోసం మాత్రమే పెంచుతారు. అంటే దీనిలో పునరుత్పత్తి లక్షణాలు ఏమీ ఉండవు. ఇలాంటి బ్రాయిలర్‌ చికెన్‌ తింటే హార్మోనల్‌ మార్పులు వస్తాయనే వాదన ఉంది. దాని సంగతి పక్కన పెట్టి.. కోడి.. దాని శాస్త్రీయ నామం సంగతికి వద్దాం.

కోడి ఏ కుటుంబానికి చెందింది?

మళ్లీ ఇదేం కొశ్చన్‌ అనుకోకండి.. ఈ జంతువు లేదా పక్షి అయినా ఒక కుటుంబానికి చెందినది అయి ఉంటుంది. సైన్స్‌ పరిభాషలో ఫ్యామిలీ! కోళ్లు.. ఫాసియానిడే అనే ఫ్యామిలీ మెంబర్‌! ఈ ఫ్యామిలీ.. భూమిపైనే నివసించే అతి భారీ పక్షుల భారీ సమూహం. ఫాసియానిడే ఫ్యామిలీ.. గల్లీఫార్మర్స్‌.. (వీధి రైతులు కాదు) అనే క్రమంలో అతిపెద్దది. వీటికి సంబంధించిన 54 జాతులలో 185 వర్గాలు ఉన్నాయి. యూరప్‌, ఆసియా, ఆఫ్రికాతో కూడిన ‘పాత ప్రపంచం’ ఈ జాతులకు పుట్టినిల్లు.

ఫాసియానిడే కుటుంబానికి చెందిన కొన్ని పక్షి జాతులు
1. కామన్‌ ఫేసెంట్‌. దీని శాస్త్రీయనామం ఫాసియనస్‌ కొల్చికస్‌. ఇది ఆసియా ఖండానికి చెందినదైనప్పటికీ.. విస్తృతంగా విస్తరించింది. 2. భారతీయ నెమలి. శాస్త్రీయ నామం.. పావో క్రిస్టాటస్‌. ఇది భారత ఉపఖండంలో ఎక్కువగా కనిపిస్తుంది. 3. వైల్డ్‌ టర్కీ (టర్కీ కోడి). దీని శాస్త్రీయనామం మెలియాగ్రిస్‌ గల్లోపావో. ఇది ఉత్తర, మధ్య అమెరికాల్లో ఎక్కువగా కనిపిస్తుంది. 4. గ్రే పాట్‌రిడ్జ్‌ పెర్డిక్స్‌. దీనిశాస్త్రీయ నామం పెర్డిక్స్‌. 5. కాలిఫోర్నియా క్వాయిల్‌. శాస్త్రీయనామం కాలిపెప్లా కాలిఫోర్నికా. ఇది పశ్చిమ అమెరికా, కెనడా ప్రాంతాల్లో ఎక్కువగా కనిపిస్తుంది.

మరి గుడ్డు సంగతేంటి?

ఆ సంగతీ తెలుసుకుందాం. గుడ్డుకు కూడా శాస్త్రీయ నామం ఉందండోయ్‌. కాకపోతే.. ఆ గుడ్డు పెట్టిన తల్లి కోడి ఏ జాతికి చెందినదో ఆ జాతి గుడ్డుగా పిలుస్తారు. సపోజ్‌.. మన సాధారణ కోడిపెట్ట పెట్టన గుడ్డు అయితే.. గాలస్‌ గాలస్‌ డొమెస్టికస్‌ ఎగ్‌ అని పిలుస్తారన్నమాట.

సాధారణ కోళ్లకూ సపరేట్‌ పేర్లు ఉన్నాయి..
పెంపుడు కోళ్లకు ఉమ్మడిగా గాలస్‌ గాలస్‌ డొమెస్టికస్‌ అని పేరు ఉన్నప్పటికీ.. వాటిని కూడా వేర్వేరు గ్రూపులుగా విభజించారు. అంటే వాటి వాడకాన్ని బట్టి, అవి కనిపించే తీరును బట్టి, అవి వచ్చిన ప్రాంతాలనుబట్టి వాటికి వేర్వేరు పేర్లు పెట్టారన్నమాట.. కన్‌ఫ్యూజ్‌ కాకుండా! వీటిలో పుంజైనా, పెట్ట అయినా ఒకే పేరు. వాటినీ చూసేద్దాం.. రండి.

లేయర్‌ బ్రీడ్స్‌ : వీటిని ప్రధానంగా కోడిగుడ్ల ఉత్పత్తి కోసం పెంచుతారు. తెల్లగా, ఎర్రటి టోపీతో ఉంటాయి. కానీ.. వాటి శాస్త్రీయ నామం మాత్రం గాలస్‌ గాలస్‌ డొమెస్టికస్‌.
బ్రాయిలర్‌ బ్రీడ్స్‌ : ఇవి ప్రధానంగా మాంసం ఉత్పత్తి కోసం పెంచుతారు. కోర్నిష్‌ క్రాస్‌ అనేది వీటిలో ఒక రకం. మనలో చాలా మంది చికెన్‌ షాప్‌కు వెళ్లి తెచ్చుకునేది ఇదే.
ఆర్నమెంటల్‌ బ్రీడ్స్‌ : వీటి అందమైన రూపం కారణంగా చాలా మంది వీటిని తమ స్టేటస్‌ కోసం పెంచుతూ ఉంటారు. బొచ్చుకోడి అనుకోవచ్చు.

ఇంతకీ ఈ ఆదివారం చికెన్‌ కొనేందుకు వెళుతున్నారా? అక్కడ ‘గాలస్‌ గాలస్‌ డొమెస్టికస్‌’ ఓ కిలో ఇవ్వు అంటే కుదరదండోయ్‌!!

ఇవి కూడా చదవండి..

Jaguar Attacks Crocodile | చిరుత..మొసలి ఫైట్..గూస్ బంప్స్..!
Panchayat Elections | పంచాయతీ ఎన్నికల ప్రక్రియ షురూ.. పోటీకి వీళ్లు కూడా అర్హులే
Labour Codes Explained | నాలుగు లేబర్‌ కోడ్‌లను కార్మికులు ఎందుకు వ్యతిరేకిస్తున్నారు?